بۇگىن شىمكەنت قالالىق №3 ەمحاناسىندا كوروناۆيرۋس پاندەمياسىنا قارسى وقۋ-جاتتىعۋ جۇمىستارى جۇرگىزىلدى. وقۋ-جاتتىعۋ بارىسىندا ەمحاناعا كەلىپ تۇسكەن شاقىرتۋ قابىلداندى. شاقىرتۋ تۇسكەننەن كەيىن ناۋقاستىڭ ۇيىنە دارىگەرلەر مەن فەلدشەرلەر بارىپ، ونىڭ حال-جاعدايىن تولىققاندى تەكسەرىپ، مەديتسينالىق كومەك كورسەتتى. تەكسەرۋ كەزىندە ناۋقاسقا قوسىمشا دياگنوستيكالىق كومەك كەرەك بولعاندىقتان «مەديكەر» ورتالىعىنا اپارىپ، كومپيۋتەرلىك توموگرافياعا ءتۇسىردى.
وسى ورايدا جەتكىزە كەتسەك، ەگەر ناۋقاستىڭ وكپە قابىنۋ دەڭگەيى 15 پايىزدان جوعارى بولسا، «اتامەكەن» مەديتسينالىق ورتالىعىنا جەتكىزىلەدى. شىمكەنت قالالىق دەنساۋلىق ساقتاۋ باسقارماسى باسشىسىنىڭ ورىنباسارى ايگۇل جاقىپقىزىنىڭ ايتۋىنشا، «اتامەكەن» پروۆيزورلى ستاتسيونارعا ورتا دارەجەلى ناۋقاستار تۇسەدى. ناۋقاس ەنتىگۋ حالىندە تۇسسە، پروۆيزورلى ورتالىقتاعى قىزىل جولاقپەن پالاتاعا جەتكىزىلەدى. ەگەر ءوزى تىنىس الا الاتىن بولسا سارى جولاقپەن جۇرگىزىلىپ، ءاناليزى تولىق الىنىپ، پالاتاعا جايعاستىرىلادى.
وقۋ-جاتتىعۋ بارىسىندا شىمكەنت قالالىق №3 ەمحاناسىنىڭ باس دارىگەرى اقمارال ۋاليحانقىزى ەمحاناعا كۇندەلىكتى شاقىرتۋلار تۇسەتىنىن، بۇل شاقىرتۋلار اۆتوماتتى تۇردە 4 كاتەگورياعا بولىنەتىنىن جەتكىزدى.
ايتا كەتەيىك، بۇل وقۋ-جاتتىعۋدىڭ ماقساتى – قالانىڭ بارلىق مەديتسينالىق ۇيىمدارىن كوروناۆيرۋستىق ينفەكتسيامەن كۇرەسكە بارىنشا دايىندىعىن پىسىقتاۋ.
شىمكەنت اقپاراتتىق-كوممۋنيكاتسيالىق ورتالىعى
