نۇر-سۇلتاندا جىلىتۋ ماۋسىمىنا دايىندىق جۇرگىزىلۋدە. ەلوردا اكىمى التاي كولگىنوۆ جىلۋ بەرۋ ماۋسىمى، كومىر ساتۋ جانە گازداندىرۋ بويىنشا بىرقاتار تاپسىرما بەردى، دەپ حابارلايدى adyrna.kz قالالىق اكىمدىكتىڭ ءباسپاسوز قىزمەتىنە سىلتەمە جاساپ.
اتالعان حابارلامادا: «ءبىرىنشى. الەۋمەتتىك نىساندار مەن تۇرعىن ۇيلەردى جىلۋعا ۋاقىتىندا قوسۋ قاجەت. قازىرگى ۋاقىتتا تۇرعىن ۇيلەردىڭ دايىندىعى – 97%، ءبىلىم بەرۋ نىساندارى – 99%، دەنساۋلىق ساقتاۋ – 100%، ەلەكترمەن جابدىقتاۋ جەلىلەرىنىڭ دايىندىعى – 82%. بارلىق كورسەتكىشتەردى 100%-عا جەتكىزۋ كەرەك" دەلىنگەن.
سونىمەن قاتار جاڭا نىسانداردى جىلۋعا قوسۋ كوزدەرىن انىقتاۋ، قۋاتتىلىقتى تەكسەرۋ قاجەت.
ەكىنشى. قالادا كومىر تاسىمالدايتىن 7 كومپانيا، ءتۇرلى اۋدانداردا ورنالاسقان وتىن ساتاتىن 11 نۇكتە بار. كومىردىڭ ورتاشا باعاسى، جەتكىزۋ قىزمەتىن قوسپاعاندا، سورتىنا بايلانىستى 12 مىڭ تەڭگەنى قۇرايدى. دۇرلىگىس تۋدىرۋعا، جاساندى كومىر تاپشىلىعىنا جول بەرمەۋ كەرەك، ويتكەنى قويمالاردا وتىن قورى جەتكىلىكتى.
تۇرعىندار كومىردى الدىن-الا ساتىپ الۋى قاجەت. وتىننىڭ باعاسى مەن مولشەرى تۋرالى تولىعىراق اقپاراتتى 109 جەدەل جەلى ءنومىرى ارقىلى بىلۋگە بولادى.
ءۇشىنشى. تۇرعىن الاپتاردىڭ تۇرعىندارىنا گازعا قوسىلۋعا تەحنيكالىق شارتتار بەرۋدى جالعاستىرۋ قاجەت.
جەلەزنودوروجنىي تۇرعىن الابىندا 100%، پرومىشلەننىي مەن كوكتال-2-دە 95%، كوكتال-1دە – 80% گاز تاراتۋ جەلىلەرى تارتىلدى. بۇل جۇمىستار وڭتۇستىك-شىعىس، اگروقالاشىق تۇرعىن الاپتارىندا دا جۇرگىزىلۋدە. الداعى جىلۋ بەرۋ ماۋسىمىندا وسى تۇرعىن الاپتار، سونداي-اق اگروقالاشىق تۇرعىن الابىنىڭ ءبىر بولىگى ۇيلەرىن گازبەن جىلىتادى. تۇرعىن الاپتا ۇيلەردى گازبەن جابدىقتاۋ جەلىلەرىنە قوسۋدىڭ تەگىن تەحنيكالىق شارتتارىن الۋ ءۇشىن فرونت-وفيستەر اشىلدى. سونىمەن قاتار بيىل جەو-1 جانە جەو-2 قازاندىقتارىنىڭ ءبىر بولىگىن گازعا اۋىستىرۋدى جوسپارلاپ وتىرمىز»، – دەدى ەلوردا اكىمى التاي كولگىنوۆ.
قىسقى ماۋسىمدا ورتا ەسەپپەن 500 مىڭ توننا كومىر جۇمسالادى، قازىر قالاعا جەتكىزىلىپ جاتقان كومىر مولشەرى بۇل نورمادان اسىپ تۇسەدى. ەرەجەگە سايكەس، جىلىتۋ ماۋسىمى بەس تاۋلىك بويى سىرتقى اۋانىڭ ورتاشا تەمپەراتۋراسى +10 °س جانە ودان تومەن بولعان كەزدە باستالادى.
