بالا قۇقىقتارى جونىندەگى ۋاكىل دينارا زاكيەۆا مەن الماتى وبلىسىنىڭ اكىمى مارات سۇلتانعازيەۆ دەمالىس كۇندەرى تالعاردا بولعان قايعىلى وقيعاعا قاتىستى تۇسىنىكتەمە بەردى، دەپ حابارلايدى "ادىرنا" ۇلتتىق پورتالى Tengrinews.kz-كە سىلتەپ.
دينارا زاكيەۆانىڭ ايتۋىنشا، قازىر سۇمدىق جاعدايدى باستان وتكەرگەن ەكى جاسار قىز اناسىمەن بىرگە اۋرۋحانادا جاتىر.
«ولارمەن پسيحولوگتار جۇمىس ىستەپ جاتىر»، – دەدى بالا قۇقىقتارى جونىندەگى ۋاكىل.
ال الماتى وبلىسىنىڭ اكىمى مارات سۇلتانعازيەۆ تە بالانىڭ قازىرگى جاعدايى جايلى پىكىر ءبىلدىردى.
«تەرگەۋ ءجۇرىپ جاتىر. بالا اناسىمەن بىرگە، جاعدايى قالىپتى»، – دەدى ول جۋرناليستەرگە.
ەسكە سالا كەتەيىك، 6 قىركۇيەكتە تالعار ماڭىنداعى قىزىلقايرات اۋىلىندا قاندى قىلمىس تىركەلدى. ەر ادام اۋىل تۇرعىنىن اتىپ ءولتىرىپ، ونىڭ ەكى جاسار جيەنىن ۇرلاپ اكەتكەن. ارنايى جاساقتىڭ جەدەل ارەكەتىنىڭ ارقاسىندا ءبۇلدىرشىن امان-ەسەن قۇتقارىلىپ، اناسىمەن قاۋىشتى. كۇدىكتى ۇستالدى.
كەيىننەن كىشكەنتاي قىزدىڭ العان جاراقاتىنا قاتىستى ءتىلىنىڭ بىرنەشە جەرىن تىككەنى تۋرالى حابارلانعان.
قازىر قىلمىسقا قاتىستى تەرگەۋ امالدارى جۇرگىزىلىپ جاتىر.
