كۇز ايلارىندا كەلەتىن تۇماۋدىڭ الدىن الۋ ءۇشىن ەلىمىزدە ەكپە جاساۋ جۇمىسى باستالدى. ەكپە جاساتۋدى ءوزى ءبىرىنشى بولىپ باستاعان دەنساۋلىق ءمينيسترى تسوي تۋرالى اقپاراتتىڭ تاراعانىنا ساناۋلى ساعات تا وتپەدى. الايدا الەۋمەتتىك جەلىدە ءمينيستردىڭ ەكپە العانىنا دا، ەكپەنىڭ وزىنە دە جۇرت كۇمان ءبىلدىرىپ، كوممەنترايدى قارشا بوراتۋدا.
Facebook الەۋمەتتىك جەلىسىندەگى «ايتارىم بار!» توبىندا تسويدىڭ ەكپە العانى تۋرالى اقپاراتتى جاريالاعانىمىز سول ەدى، اينالاسى جارتى ساعاتتا توپ مۇشەلەرىنىڭ نارازىلىق پەن ىزاعا تولى پىكىرلەرى ءالى تولاستار ەمەس. ماقساتىمىز الەۋمەتتىك جەلىدەگى ءار پىكىرگە باعا بەرۋ ەمەس، وسى جازبالاردىڭ استارىنا ازداپ بولسا دا ءۇڭىلۋ.
ءا دەگەننەن تسويدىڭ ساۋساعىنا نازار بۇرعان مايرا يارقىزى اتتى وقىرمان: «ۆاكتسينانى ساۋساقتان سالا ما؟ سوسىن. اقشانى دالاعا شاشپاي، اۋىرىپ قالعان ادامداردى ەمدەسىن دە. ەرىكپەي. سوسىن اۋانى بۇلدىرمەسىن»،- دەپ جازدى.
ال دوسجان اپىشەۆتىڭ ويىنشا مينيستر سپيد-كە قارسى اناليز تاپسىرعان كورىنەدى. جازىلعان پىكىرلەردى ءبىر ءسۇزىپ شىعىپ، تۇيگەنىمىز كوپشىلىكتىڭ تسويعا دا، ەكپەگە دە ەش سەنىمى جوق ەكەن. ءبىرى «ۆيتامين سالدىرىپ، جارناما جاساۋدا» دەسە، ەندى ءبىرى «بۇعان ەۋروپادان الدىرعان يمپورتنىي قىمباتىنان سالادى، بىزگە ينديادان اكەلگەن ارزان-قۇرزان بىردەڭە سالادى. بولىنگەن اقشانى جەۋ كەرەك قوي» دەيدى.
قالاي دەسەك تە، پاندەميا قازاقستان حالقى مەن بيلىگىنىڭ اراسىن بۇرىنعىسىنان دا اشا تۇسكەنى شىندىق. بىلدەي ءبىر مەكەمەنىڭ ءمينيسترى حالىقتىڭ الدىنا شىعىپ تۇماۋعا قارسى ەكپەنى ءوزى دە الىپ جاتقانىن سۋرەتىمەن شىعارسا دا، وعان سەنەتىن ادام جوق سياقتى. ەكپەنىڭ قۇرامىنا دا، ءمينيستردىڭ راسىمەن ۆاكتسينا جاساتقانىنا دا بۇدان بىلاي حالىقتى سەندىرۋ وڭاي بولمايدى اۋ. بۇل سەنىمسىزدىك كەشە بۇگىن قالىپتاسپادى. سەنىمسىزدىك شيرەك عاسىردان اسقان سوڭعى جىلدارى قالىپتاستى. وكىنىشتى، ارينە.
مەرۋەرت حۋساينوۆا،
«ادىرنا» ۇلتتىق پورتالى.
فوتو دەنساۋلىق ساقتاۋ مينيسترلىگىنىڭ رەسمي سايتىنان الىندى.
