ەسسە جازۋدىڭ ءتيىمدى ءتاسىلى

1121

جالپى ەسسە تەك مەكتەپ ەمتيحاندارىنداعى عانا ەمەس، ءتۇرلى بايقاۋلار مەن حالىقارالىق ەمتيحاندارعا ەنەتىن ماڭىزدى سىناق بولىپ ەسەپتەلەدى. سوندىقتان ەسسە جازۋدىڭ ءادىس-ءتاسىلىن بىلە جۇرگەنىمىز ءجون. 

ەسسەنى كوبى شىعارمامەن شاتاستىرىپ جاتادى. ال شىندىعىندا ەكەۋىنىڭ جازىلۋ ءستيلى ەكى بولەك. الدىمەن، شىعارما مەن ەسسەنىڭ اراجىگىن اجىراتىپ الساق:

ەسسە – بۇل ادامنىڭ سۋبەكتيۆتى پىكىرى، كوزقاراسى مەن ويى ەركىن تۇردە جازىلاتىن ادەبي جانردىڭ ءبىر ءتۇرى. ەسسەنىڭ باسقا جانرلاردان باستى ايىرماشىلىعى وي ەركىندىگى جانە كولەمى جاعىنان قىسقا بولىپ كەلۋى.

ەسسەنىڭ شىعارمادان ايىرماشىلىعى

ونى جازار ۋاقىتتا اۆتور جوسپار قۇرادى، سول بويىنشا تاقىرىپتى اشۋعا تىرىسادى. دەمەك مۇندا وي تىزبەكتى تۇردە جەتكىزىلەدى.

شىعارما قۇرىلىم مەن جوسپارعا نەگىزدەلگەن جازبا جۇمىسى.

قۇرىلىم بويىنشا: كىرىسپە، نەگىزگى ءبولىم، قورىتىندى بولىمدەردىڭ بولۋى ماڭىزدى. ودان بولەك، شىعارمانىڭ كولەمى ۇزاق، ءار ءبولىم كەم دەگەندە ءبىر-ەكى داپتەر پاراعىنداي بەت قۇراۋى ءتيىس.

ەسسە كوبىنە ەركىن تاقىرىپتا جازىلادى جانە اۆتور قانداي كوزقاراستى، پىكىردى قولداپ جازسا دا، ءوز ەركى. ەسسە جازۋ كەزىندە دە بەلگىلى ءبىر قۇرىلىم ساقتالادى، بىراق جوسپار قۇرىلمايدى، تەك لوگيكالىق تىزبەك: كىرىسپە ابزاتس، نەگىزگى ابزاتس جانە قورىتىندى ابزاتسقا ويشا ءبولىنىپ تۇرۋى كەرەك.

تاقىرىپتان اۋىتقىماۋ

كەز كەلگەن ماقالا، ەسسە، شىعارما جازۋ كەزىندە شەگىنىس جاساۋدىڭ قاجەتتىلىگى جوق. ياعني تاقىرىپ ناقتى “كوپ بالالى بولۋدىڭ ارتىقشىلىقتارى مەن كەمشىلىكتەرى” بولسا، سول تاقىرىپ اياسىندا وي تولعاعان دۇرىس.

ويدى ەركىن جەتكىزۋ

ويىڭىزدى جيناقى، ناقتى، انىق ەتىپ جازۋ ماڭىزدى. جازۋىڭىزعا دا ءمان بەرىڭىز: ناشار جازۋدان ەمتيحان تەكسەرۋشى ءسىزدىڭ نە ايتقىڭىزدى كەلگەنىن تۇسىنبەۋى مۇمكىن، سوندىقتان شيماي-شاتپاقسىز، تازا ءارى تۇسىنىكتى ەتىپ جازۋعا تىرىسىڭىز.

ناقتى مىسالدار كەلتىرۋ

ەسسەدە ءسىز پىكىرىڭىزدى ارگۋمەنتتەر مەن مىسالدار ارقىلى دالەلدەۋىڭىز كەرەك. دەمەك كوپ بالالى بولۋ دۇرىس دەپ ويلاساڭىز، نەگە وسى پوزياتسيانى قولدايتىنىڭىزدى ءتۇسىندىرىڭىز.

مۇنداعى ارگۋمەنتتەر:

  • دەرەكتەر مەن دايەكتەر.
  • ومىردەن الىنعان جاعدايلار، ومىرلىك شىنايى تاجىريبەلەر.
  • عىلىمي زەرتتەۋلەر.
  • عالىمداردىڭ پىكىرلەرىنە سىلتەمە.

تاقىرىپ اشىلۋى ءۇشىن ءبىر ەسسەدە كەم دەگەندە ەكى ناقتى مىسال بولعانى دۇرىس.

قورىتىندى جازۋ

مىندەتتى تۇردە ويىڭىزدى قورىتىندىلاڭىز. سوڭىندا بەلگىلى ءبىر ماسەلە جونىندە پىكىرىڭىز بەن كوزقاراستارىڭىزدى ايتىپ كەلىپ، ونى قايتكەندە جۇزەگە اسىرۋعا بولادى نەمەسە ناتيجەسى مەن ءتۇيىنىن ايتىپ ءوتۋ قاجەت.

ەموتسيانالدى-ەكسپرەسسيۆتى سوزدەردىڭ قولدانىلۋى

ەسسەدە ەموتسيانالدىلىققا رۇقسات ەتىلەدى، كوركەم ادەبي ستيلدە جازىلادى. الايدا، جارگون، قىسقارعان سوزدەردى قولدانۋ جانە اۋىزەكى سوزدەردى پايدالانۋعا تىيىم سالىنادى.

بەرىلگەن كولەمدى ساقتاۋ

ادەتتە ەسسەنىڭ كولەمى 200-250 ءسوزدى قۇرايدى. ودان از نەمەسە كوپ ءسوز جازۋ ەمتيحاننان تومەن ناتيجە الىپ كەلۋى مۇمكىن، سوندىقتان بەرىلگەن ستاندارت پەن فورماتقا سايكەس جازۋعا تىرىسۋ كەرەك.

bilimland.kz

پىكىرلەر
رەداكتسيا تاڭداۋى