12 كىركۇيەك كۇنى جامبىل اتىنداعى جاسوسپىرىمدەر كىتاپحاناسىندا قارجىگەر-مەتسەنات، حالىق جاناشىرى، الماتى قالاسى ءماسليحاتىنىڭ دەپۋتاتى ەربولات بولاتۇلىنىڭ «قازاقستان جانە مەن» اتتى كىتابىنىڭ تۇساۋكەسەر ءراسىمى ءوتتى. كىتاپ كاسىپكەردىڭ ءجۇرىپ وتكەن جولىنا ءۇڭىلۋ، ەسەپ بەرۋ ماقساتىندا وزىنە ىستىق، وزگەگە وي سالار ساتتەرمەن، سوزدەرمەن فوتوالبوم رەتىندە شىعارىلعان. قارجىسىنىڭ ءبىر بولىگىن حالىق دەنساۋلىعىنا، الەۋمەتتىك دامۋىنا سالىپ جۇرگەن كاسىپكەردىڭ اتقارعان جۇمىستارى دا، فوتوالبومى دا قۇرمەتپەن قارارلىقتاي. ەندەشە كىتاپتىڭ ەل ءۇشىن، حالىق ءۇشىن ماڭىزدىلىعىن دەپۋتاتتىڭ وزىنەن جانە پرەزەنتاتسياعا كەلگەن ازاماتتاردىڭ پىكىرى ارقىلى بىلەيىك.
ەربولات بولاتۇلى، كاسىپكەر، الماتى قالاسى ءماسليحاتىنىڭ دەپۋتاتى: 2010 جىلى ءبىر اۋرۋحاناعا بارعان ەدىم. قاراسام، اۋرۋحاناداعى تەحنيكالىق قۇرال-جابدىقتاردىڭ باسىم بولىگى شەت ەلدەن كەلگەن ەكەن. سوعان قاراپ، ءوز ەلىمىزگە پايدامىزدى تيگىزۋ ماقساتىندا قوعامدىق قور اشتىق. اشا سالىسىمەن سول اۋرۋحانانىڭ رەانيماتسيالىق بولىمشەسىنىڭ ەدەنىن گەرمانيادان اكەلىپ جاسادىق. قور رەتىندە حالىققا تيگىزگەن پايدامىزدىڭ العاشقىسى وسى بولدى. كەيىننەن كىتاپحانا، عيماراتتار، قالانىڭ كوركەيۋىنە بايلانىستى ءىس-شارالاردى دا ابىرويمەن اتقارىپ شىقتىق. حالىق ءدان ريزا دەپ ويلايمىن. تاياۋدا عانا الماتى قالاسىنداعى مەشىتكە كولىك تارتۋ ەتتىك. مىنە، وسىلاي، جاقسى ىستەردىڭ جۇزەگە اسۋىنا مۇرىندىق بولىپ ءجۇرمىز. ال كىتابىمدى «قازاقستان جانە مەن» دەپ اتاۋىمنىڭ سەبەبى دە بەكەر ەمەس. قازاقستاننىڭ ءوسىپ-وركەندەۋىنە قانداي پايدام ءتيدى دەگەن سۇراققا جاۋاپ بەرگىم كەلدى. 2017 جىلى وسى تاقىرىپپەن كىتاپ شىعارامىن دەپ وزىمە ايتقان ەدىم. سونىڭ ءساتى بيىل ءتۇستى. قايىرىمدىلىقپەن اينالىسىپ جۇرگەنىمە 15 جىلداي بولدى. دەگەنمەن بيىل كارانتين جۇمىسقا ازداپ كەدەرگى كەلتىردى. ءبىر وكىنىشتىسى، ءدال وسىنداي ساتتە كومەك سۇراعاندار سانى ەكى ەسەلەپ ارتتى. ناۋرىز ايىنان تامىزعا دەيىن 200-دەن استام وتباسىعا ءوز قالتامنان كومەك قولىن سوزدىم. ادامداردىڭ جاقسى ءومىر ءسۇرۋى ءۇشىن، جاعدايلارى قالىپقا كەلۋ ءۇشىن، قازاعىمنىڭ الەۋمەتتىك جاعدايى كوتەرىلۋى ءۇشىن ءالى دە ەڭبەك ەتەتىن بولامىن.
"ەربولات بولاتۇلى-حالىقتىڭ ساناسىنا ساۋلە قۇيدى"
مۇراتحان شوقان، اقىن، جازۋشىلار وداعىنىڭ مۇشەسى: ءبىر سوقىر ادامدى جولدان جەتەكتەپ وتكىزسەڭىز ساۋاپ بولادى. ال ءتۇرلى ساۋالدارعا جاۋاپ تاپپاي جۇرگەن ادامنىڭ ساناسىنا ساۋلە تۇسىرسەڭىز، سوقىر ادامدى جەتەكتەپ وتكىزگەننەن دە ارتىق. شىنى كەرەك، ەربولات بولاتۇلىنىڭ كىتاپحاناعا، حالىققا جاساعان قامقورلىعى ساناعا ساۋلە قۇيعان ادامنىڭ ءىسى. اۋلانى اباتتاندىرۋ، قوعامدىق عيماراتتاردى جارىقتاندىرۋ، قاريالارعا قارايلاسۋ، جاستاردى دەمەپ جىبەرۋ، قالا تۇرعىندارىنا كومەكتەسۋ ەكىنىڭ ءبىرىنىڭ قولىنان كەلمەسى انىق. جاقسىنىڭ جاقسىلىعىن ايتۋ كەرەك. ەربولات بولاتۇلىنىڭ ەڭبەگى – ۇشان تەڭىز.
"جامبىل كىتاپحاناسىنىڭ مودەرنيزاتسيالانۋىنا 140 000 000 تەڭگەنى ءوز قالتاسىنان شىعاردى"
عازيزا قۇدايبەرگەن، جامبىل اتىنداعى جاسوسپىرىمدەر كىتاپحاناسىنىڭ باسشىسى: مادەنيەت باسقارماسى كىتاپحانالاردى مودەرنيزاتسيالاۋ تۋرالى جوبا جاسادى. رەسەيدەن ديزاينەرلەر شاقىرتىرىلدى. سول كەزدە بىرقاتار شىعارماشىلىق توپ «وسى ءىستى نەگە ءوزىمىز جاسامايمىز؟» دەپ باس كوتەرمەك بولدى. ەربولات بولاتۇلى بۇرىندارى ءتۇرلى قايىرىمدىلىق ءىس-شارالارىن قولعا الىپ جۇرگەن ازامات ەكەن. الماتى قالاسى اكىمدىگى ەربولات بولاتۇلىن تاۋىپ، 5 كىتاپحانانى ارالاپ، ىشىنەن جامبىل كىتاپحاناسىن مودەرنيزاتسيالاۋ تۋرالى شەشىمگە كەلدى. 2017 جىلى جوندەۋ جۇمىستارى باستالدى. ەربولات بولاتۇلى 140 000 000 تەڭگە ءوز قارجىسىن كىتاپحاناعا قۇيىپ، بۇكىل جۇمىستىڭ باسى-قاسىندا ءجۇردى. كىتاپحانا بيۋدجەتتىك مەكەمە بولعاندىقتان ءالى كۇنگە دەيىن جاعدايىمىزدى ءبىلىپ، جەتپەيتىندەرىمىزدى تۇگەندەپ بەرىپ وتىرادى.
ء"ار ادام وسىلاي ەسەپ بەرۋى ءتيىس"
تەمىرحان تەبەگەن، فيلولوگيا عىلىمىنىڭ دوكتورى، پروفەسسور : اركىمدى وسىرەتىن، ادام ەتەتىن كىتاپحانا دەيدى عوي. مەنى وسىرگەن اۋىلىمداعى كىتاپحانا ەدى. كەيىن قىزىلوردا قالاسىنداعى، ودان كەيىن الماتىداعى كىتاپحانا رۋحاني ازىق الۋىما سەبەپشى بولدى. كانديداتتىقتى دا، دوكتورلىقتى دا كىتاپحانادا وتىرىپ قورعادىق. سوندىقتان كىتاپحانا دەگەن كەزدە ەلەڭدەپ تۇرامىن. كەزىندە «ادامدى ادام ەتكەن-ەڭبەك» دەگەندى ءجيى وقۋشى ەدىك. ال «قازاقستان جانە مەن» كىتابىندا «ادامدى ادام ەتكەن-كىتاپ، ادامزات ەتكەن-كىتاپحانا» دەپ وتە ورىندى جازىلعان. وسى كۇنگە دەيىن اتقارعان جۇمىسىڭدى، عىلىمي زەرتتەۋلەرىڭدى وسىلاي كىتاپ ەتىپ شىعارۋ، حالىققا تانىستىرۋ وتە ءتيىمدى جولى ەكەن. ەربولات بولاتۇلىنىڭ كىتابىنا قاراپ قىزىعىپ وتىرمىن. «قازاقستان جانە مەن» كىتابىندا بارلىعى بار. بۇل كىسىنىڭ جاستارعا، قارتتارعا قامقورلىعى، سپورتتىق مەكەمەلەر مەن دەنساۋلىق ساقتاۋ ورىندارىنا دەمەۋشىلىگى ۇلگى تۇتارلىق ءىس. سوڭعى 10 جىلدىقتا حالىققا دا، وزىنە دە «نە ىستەپ، نە قويدىم» دەگەن ويمەن شىعارىلعان كىتاپ سەكىلدى. راسىندا دا ءار ادام وزىنە وسىلاي ەسەپ بەرىپ وتىرۋى كەرەك قوي. ەربولات بولاتۇلى سەكىلدى حالىق جاناشىرلارى كوپ بولسىن!
اقگۇل ايداربەكوۆا،
«ادىرنا» ۇلتتىق پورتالى
