مەكتەپتەرگە 600 مىڭنان اسا كومپيۋتەر جەتكىزىلەدى

1769
Adyrna.kz Telegram

2020 جىلدىڭ سوڭىنا دەيىن 9 وتاندىق ءوندىرۋشى ەلىمىزدىڭ مەكتەپتەرىنە قوسىمشا 606 مىڭ بىرلىك كومپيۋتەر تەحنيكاسىن ءوندىرىپ، جەتكىزەدى، - دەپ حابارلايدى "ادىرنا" ءتىلشىسى primeminister.kz  سايتىنا سىلتەمە جاساپ.

بۇل تۋرالى قر پرەمەر-ءمينيسترى اسقار ءماميننىڭ توراعالىعىمەن وتكەن ەلەكتروندى ونەركاسىپتى دامىتۋ ماسەلەلەرى جونىندە كەڭەستە ايتىلدى.

قازاقستاندا ەلەكتروندى ءونىم وندىرەتىن 64 كاسىپورىن جۇمىس ىستەيدى. سالاداعى جۇمىسكەرلەر سانى – 1,6 مىڭ ادام. 2019 جىلى ەلەكتروندى ونەركاسىپ ونىمدەرىن ءوندىرۋ كولەمى 44,5 ملرد تەڭگەنى قۇراپ، 2018 جىلمەن سالىستىرعاندا 35%-عا ارتتى. بۇل رەتتە جالپى يمپورت كولەمىن ەسكەرگەندە، اتالعان ونىمدەردىڭ جەرگىلىكتى قامتۋ ۇلەسى (1 ترلن تەڭگەگە جۋىق) نەبارى 4% قۇرايدى.

ەلەكتروندى ونەركاسىپ سالاسىندا بۇگىنگى تاڭدا جاڭا تولىق دايىن ونىمدەردى: باسپا پلاتالارىن («س.م. كيروۆ اتىنداعى زاۋىت» اق), تەلەكوممۋنيكاتسيا جابدىقتارىن («Digital System Servis» جشس), سۋدى، جىلۋ مەن جارىقتى ەسەپتەيتىن ەلەكتروندى قۇرالداردى، دەرەكتەردى سىمسىز جەتكىزۋگە ارنالعان مودۋلدەردى («كورپوراتسيا سايمان» جشس، «وريون-سيستەما» جشس جانە ت.ب.), كومپيۋتەرلەردى («س.م. كيروۆ اتىنداعى زاۋىت» اق، «PS4U» جشس جانە ت.ب.), تسيفرلىق بەينەكامەرالاردى («پەرسپەكتيۆا» عوب، «NG Vision» جشس), راديوستانتسيالاردى («رتس ينجينيرينگ» جشس) شىعارۋ يگەرىلگەن.

ەلەكتروندى ونەركاسىپتە وتاندىق قامتۋدى ودان ءارى ارتتىرۋدى ىنتالاندىرۋ ماقساتىندا وتاندىق وندىرۋشىلەرمەن وففتەيك-كەلىسىمشارتتاردى ارتتىرۋ، ساۋدا جەلىلەرى ارقىلى وتاندىق قۇراستىرىلعان كومپيۋتەرلەردى ساتىپ الۋ ءۇشىن جەڭىلدىكپەن نەسيەلەندىرۋدى ەنگىزۋ، ەلەكتروندى ونەركاسىپ سالاسىنداعى عزتكج-عا قارجى ءبولۋ جانە ت.ب. ارقىلى مەملەكەتتىك قولداۋدىڭ قوسىمشا شارالارى قابىلداناتىن بولادى.

2024 جىلعا قاراي ەلەكتروندى ونەركاسىپتەگى ءوندىرىستىڭ ورتاشا جىلدىق كولەمىن 382,6 ملرد تەڭگەگە ء(وسىم – 8,5 ەسە), ەكسپورت كولەمىن 45 ملرد تەڭگەگە، مەملەكەتتىك جانە كۆازيمەملەكەتتىك سەكتورلارداعى ساتىپ الۋدا جەرگىلىكتى قامتۋ ۇلەسىن سايكەسىنشە 30% جانە 20% دەيىن جەتكىزۋ ماقساتى قويىلدى. 60 مىڭنان اسا جاڭا جۇمىس ورنى قۇرىلىپ، ورتاشا جىلدىق ءوسىمى 28 مىڭ ادامدى قۇرايتىن بولادى.

كەڭەسكە قاتىسۋشىلار مەملەكەت باسشىسى قازاقستان حالقىنا ارناعان جولداۋىندا قويعان تسيفرلىق تەڭسىزدىكتى جويۋ جانە الەۋمەتتىك ءالجۋاز وتباسىلاردان شىققان بالالاردى كومپيۋتەر تەحنيكاسىمەن قامتاماسىز ەتۋ بويىنشا مىندەتتەردى ىسكە اسىرۋعا ەرەكشە كوڭىل ءبولدى. ماسەلەن، 2020 جىلدىڭ سوڭىنا دەيىن 9 وتاندىق ءوندىرۋشى ەلىمىزدىڭ مەكتەپتەرىنە قوسىمشا 606 مىڭ بىرلىك كومپيۋتەر تەحنيكاسىن (351 مىڭ كومپيۋتەر جانە 255 مىڭ نوۋتبۋك).  ءوندىرىپ، جەتكىزەدى. 2024 جىلعا قاراي كومپيۋتەر تەحنيكاسىنىڭ وتاندىق ءوندىرىسى 5 ەسە، 165 ملرد تەڭگەگە دەيىن ارتتىرىلاتىن بولادى.

كەڭەسكە تسيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى ب. مۋسين، يندۋستريا جانە ينفراقۇرىلىمدىق دامۋ ءمينيسترى ب. اتامقۇلوۆ، ءبىلىم جانە عىلىم ءمينيسترى ا. ايماعامبەتوۆ، ساۋدا جانە ينتەگراتسيا ءمينيسترى ب. سۇلتانوۆ، باسقا مينيسترلىكتەر مەن ۆەدومستۆولاردىڭ باسشىلارى، سونداي-اق  «قازاقتەلەكوم» اق باسقارما توراعاسى ق. ەسەكەەۆ قاتىستى.

"ادىرنا" ۇلتتىق پورتالى

                      

پىكىرلەر