سەناتور ءالي بەكتاەۆ قر پرەمەر-ءمينيسترى اسقار ءماميننىڭ اتىنا اۋىل مەديتسيناسىنىڭ جاي-كۇيىنە قاتىستى دەپۋتاتتىق ساۋال جولدادى، دەپ حابارلايدى “ادىرنا” قازاقپاراتقا سىلتەمە جاساپ.
دەپۋتاتتىڭ ايتۋىنشا، «اۋىل» پارتياسىنىڭ بەلسەندىلەرى مەن ەرىكتىلەرى 200-گە جۋىق ەلدى مەكەندى ارالاپ، جەرگىلىكتى دەنساۋلىق ساقتاۋ مەكەمەلەرىنىڭ مۇمكىندىكتەرىمەن تانىسقان. سونىڭ ناتيجەسىندە اۋىلدىق اۋرۋحانالارداعى جاعداي كۇردەلى ەكەنى انىقتالعان. دەپۋتات اۋىلدىق ەلدى مەكەندەردە تۇرعىنداردى ەمدەۋگە بەيىمدەلگەن ستاتسيونارلاردىڭ تاپشىلىعىن ءسوز ەتتى. سونىمەن قاتار سەناتور اۋىلدىق جەرلەردەگى قىزمەت ەتىپ تۇرعان دارىگەرلىك امبۋلاتوريالار مەن فەلدشەرلىك-اكۋشەرلىك پۋنكتتەردىڭ ماتەريالدىق جاعدايىنىڭ ناشارلىعىنا توقتالدى. ءا. بەكتاەۆتىڭ ايتۋىنشا، اۋىلداردا قىزمەت ەتەتىن ءدارىحانالاردىڭ تاپشىلىعى سەزىلۋدە. «نارىق تالاپتارىنا ساي اۋىل تۇرعىندارى تابىسىنىڭ تومەندىگىنە بايلانىستى اۋىلدىق جەرلەردە جەكەمەنشىك ءدارىحانالار اتىمەن جوق. ال مەديتسينا مەكەمەلەرىن ءدارى-دارمەكپەن قامتاماسىز ەتۋدىڭ دەڭگەيى وتە تومەن. ياعني، اۋىلدىقتاردى ءدارى-دارمەكپەن قامتاماسىز ەتۋ كۇردەلى پروبلەماعا اينالىپ وتىر دەپ ايتۋعا بولادى»، - دەدى سەناتور. دەپۋتات اۋىلداعى امبۋلاتوريالار مەن فەلدشەرلىك-اكۋشەرلىك بەكەتتەردە قىزمەت ىستەيتىن دارىگەرلەردىڭ كاسىبي دەڭگەيىنىڭ تومەن ەكەنىن، مامانداردىڭ جەتىسپەۋشىلىگى بايقالاتىنىن دا تىلگە تيەك ەتتى. وسى ماسەلەلەردى ايتا كەلىپ، سەناتور حالىق سانى 3 مىڭنان اساتىن ءاربىر ەلدى مەكەندە ءوزىنىڭ ءدارىحاناسى، جەدەل جاردەمى مەن پەرزەنتحاناسى بار اۋىلدىق اۋرۋحانالاردى قالپىنا كەلتىرۋدى تەز ارادا قولعا العان ءجون دەگەن ۇسىنىسىن ءبىلدىردى. «قاجەت جاعدايدا مەديتسينا قىزمەتكەرلەرىن تۇرعىن ۇيمەن قامتاماسىز ەتۋدىڭ دە، كوشپەلى ءدارىحانالاردى ۇيىمداستىرۋدىڭ دا تۇراقتى شارالارىن قاراستىرعان دۇرىس»، - دەدى ءالي بەكتاەۆ.
