يلون ريۆ ماسك - ميللياردەر، SpaceX, Tesla Motors كومپانيالارىنىڭ نەگىزىن قالاۋشى.بولاشاق ينجەنەر 9 جاسىندا
باعدارلامالاۋ تىلدەرىن ۇيرەنىپ، 12 جاسىندا ءوزىنىڭ ۆيدەو ويىنىن ويلاپ تاپقان. ول بىردەن باي ادامداردىڭ تىزىمىنە ەنبەگەنىن، تابىسقا جەتۋ جولىندا قارا جۇمىس جاساعانىن ۇنەمى ايتىپ جۇرەدى. «ادىرنا» ۇلتتىق پورتالى نازارلارىڭىزعا قازاندىق تازالاۋشىدان ميللياردەرگە دەيىن كوتەرىلگەن كاسىپكەردىڭ نەگىزگى ۇستانىمدارىن ۇسىنادى.
وزگەرىس ءوز قولىڭىزدا
- جەتىستىككە ءوز-ءوزىڭىزدى تاربيەلەۋ ارقىلى جەتە الاسىز. مەن ءجاسوسپىرىم كەزىمدە ەنتسيكلوپەديانى كوپ وقىدىم، ال كوپتەگەن قۇرداستارىم ويىن-ساۋىقتى جاقسى كوردى. الەۋمەتتىك جەلىلەردە التىن ۋاقىتىڭىزدى بوس وتكىزبەي، ىزدەنىڭىز.
جارناماعا ەمەس، ساپاعا كوڭىل ءبولىڭىز
ماسكتىڭ ايتۋىنشا، بيزنەستى دامىتۋدىڭ باستى باعىتى ءونىمدى جاقسارتۋعا باعىتتالۋى كەرەك. اقشانى جارناماعا ەمەس، تاۋاردىڭ ساپاسىنا سالعان دۇرىس. سول كەزدە اۋزىڭىزدان شىققان سوزدەر ناتيجەلى بولادى. جاقسى ءونىم جارناماسىز-اق سۇرانىسقا يە بولادى.
شارشاۋدى بىلمەڭىز
«شارشاۋ دەگەن ۇعىم جوق. ەگەر ءسىز ارمانىڭىزدى يا يدەياڭىزدى جۇزەگە اسىرعىڭىز كەلسە، بارلىق كۇشىڭىزدى جۇمساڭىز. ايتپاقشى، ساتسىزدىككە دە دايىن بولىڭىز». ميللياردەر ءوز مۇمكىندىگىن تولىق پايدالانىپ، اپتاسىنا 100 ساعات جۇمىس ىستەيدى.
باسەكەلەستىك تۋرالى ۇمىتىڭىز
- باسەكەلەستەرىڭىزگە كوپ كوڭىل ءبولۋدىڭ قاجەتى جوق. كۇشىڭىز پەن ەنەرگياڭىزدى ساپالى جاڭا ءونىم جاساۋعا جۇمساعانىڭىز دۇرىس.
سىنعا نازار اۋدارۋ قاجەت
- سىندى تىڭداۋ ماڭىزدى. ول دۇرىس شەشىمدەر قابىلداۋعا جانە تابىسقا جەتۋگە كومەكتەسەدى.
قامقور بولىڭىز
«ەگەر ءسىز قىزمەتكەرلەرىڭىزگە قامقور بولساڭىز، ولار دا جۇمىسىن ىنتامەن ىستەيدى» . ماسك كليەنتتەر مەن كومەكشىلەرگە وتباسىنىڭ ءبىر مۇشەسى رەتىندە قاراۋ كەرەك دەپ ەسەپتەيدى.
ديانا اسان،
«ادىرنا» ۇلتتىق پورتالى
