قازاقستان رەسپۋبليكاسى ءبىلىم جانە عىلىم مينيسترلىگى عىلىم كوميتەتىنىڭ بيولوگيالىق قاۋىپسىزدىك ماسەلەلەرى عىلىمي-زەرتتەۋ ينستيتۋتىندا جاسالعان QazCovid-in® كوروناۆيرۋس ينفەكتسياسىنا قارسى قازاقستاندىق ۆاكتسيناسىنىڭ كلينيكالىق سىناقتارىنا 627 ادام قاتىسۋعا نيەت ءبىلدىردى. بۇل تۋرالى ادىرنا ۇلتتىق پورتالى ءبىلىم جانە عىلىم ءبىلىم مينيسترلىگىنىڭ عىلىم كوميتەتىنە سىلتەمە جاساي وتىرىپ حابارلايدى.
قازاقستان رەسپۋبليكاسى ءبىلىم جانە عىلىم مينيسترلىگى عىلىم كوميتەتىنىڭ بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتى (بقپعزي) قازاقستاندىق كوروناۆيرۋس ۆاكتسيناسىنىڭ كلينيكالىق سىناقتارىنا قاتىسۋ ءۇشىن ەرىكتىلەردى تارتۋدى جالعاستىرىپ وتىر.
«قۇجاتتاردى قابىلداۋ وسى جىلدىڭ 10 قىركۇيەگىندە اياقتالادى. بۇگىنگى كۇنى 627 ادام ءبىز جاساعان ۆاكتسينانى وزدەرىنە سالدىرۋعا نيەت ءبىلدىردى. ءبىرىنشى كەزەڭدە ءبىز 44 ادامدى، ەكىنشىسىندە 240 ادامدى تاڭداۋدى جوسپارلاپ وتىرمىز. ءبىز ۆاكتسينا تۋرالى جوعارى حاباردارلىققا، قازاقستاندىقتاردىڭ جاعىمدى موتيۆاتسياسى مەن پاتريوتيزمىنە قۋانىشتىمىز. مۇنداي سەنىم ءىس جۇزىندەگى قولداۋ عانا ەمەس، سونىمەن قاتار ءبىز سياقتى ءوندىرۋشى ءۇشىن جانە بۇكىل قازاقستاندىق عىلىمعا ۇلكەن مورالدىق قولداۋ بولاتىنى انىق. 627 ادامنىڭ ارقايسىسى، ءتىپتى ولار ەرىكتىلەر قاتارىنا كىرمەسە دە، ءبىز ءۇشىن باتىر دەۋگە بولادى. ءبىز ولارعا بارلىق قازاقستاندىقتاردىڭ دەنساۋلىعى مەن قاۋىپسىزدىگىن ساقتاۋعا قوسقان جەكە ۇلەسى ءۇشىن وتە ريزامىز»، - دەدى بقپعزي باس ديرەكتورى كۇنسۇلۋ زاكاريا.
31 شىلدە كۇنى دۇنيەجۇزىلىك دەنساۋلىق ساقتاۋ ۇيىمى (ددسۇ) QazCovid-in كوروناۆيرۋسىنا قارسى قازاقستاندىق يناكتيۆتەندىرىلگەن ۆاكتسينانى كلينيكالىق سىناقتارعا جىبەرىلگەن كانديدات ۆاكتسينالار تىزىمىنە ەنگىزدى.
ينستيتۋت ديرەكتورى باستاعان جەتى ۆاكتسينا جاساۋشى ۆيرۋسپەن جۇمىس كەزىندە قاۋىپسىزدىگىن قورعاۋ ءۇشىن ۆاكتسينانى قابىلداعان العاشقى ەرىكتىلەر بولدى. تەست ناتيجەلەرى بويىنشا ۆاكتسينا سالعانداردىڭ بارىندە ۆيرۋسقا قارسى انتيدەنەلەر پايدا بولدى، قىزمەتكەرلەردىڭ دەنى ساۋ جانە عىلىمي-تەحنيكالىق باعدارلاما شەڭبەرىندە جۇمىستارىن جالعاستىرىپ جاتىر.
فوتو اشىق دەرەككوزدەن الىندى
«ادىرنا» ۇلتتىق پورتالى
