ارگەنتينادا ZOOM ارقىلى وتكەن ونلاين-ءدارىس كەزىندە دە لا ەمپرەس ۋنيۆەرسيتەتىنىڭ وقىتۋشىسى قايتىس بولدى، دەپ حابارلادى جەرگىلىكتى باسىلىم Clarin.
وقيعا سارسەنبى كۇنى بولعان. باسىلىمنىڭ حابارلاۋىنشا، 46 جاستاعى پاولا دە سيمونە ستۋدەنتتەرگە ارنالعان ونلاين-ءدارىس كەزىندە دەم الا الماي باستاپ، كوپ ۇزاماي ەسىنەن تانىپ، قايتىس بولعان.
پريستۋپ باستالعان ساتتە-اق ستۋدەنتتەر دارىگەرلەردى شاقىرۋ ءۇشىن دە سيمونەنىڭ مەكەن-جايىن سۇراعان، بىراق وقىتۋشى ونى ايتا الماي، ءۇزىلىپ كەتكەن.
باسىلىمنىڭ حابارلاۋىنشا، تامىز ايىنىڭ سوڭىندا دە سيمونە ءوزىنىڭ تۆيتتەردەگى پاراقشاسىندا ءبىر ايعا جۋىق ۋاقىت وزىندە كوروناۆيرۋستىڭ بەلگىلەرى بار ەكەنىن جاريالاپتى.
بۇعان دەيىن ارگەنتينا بيلىگى كوروناۆيرۋسقا بايلانىستى ەنگىزىلگەن كارانتيندى 20 قىركۇيەككە دەيىن ۇزارتۋعا شەشىم قابىلداعان بولاتىن. سوڭعى مالىمەتتەرگە سايكەس، بۇل ەلدە كوروناۆيرۋس جۇقتىرعاندار سانى 472 000-كە جەتىپ، 9 739 ناۋقاس قايتىس بولعان.
فوتو اشىق دەرەككوزدەن الىندى
«ادىرنا» ۇلتتىق پورتالى
