ءبىلىم بەرۋ ونلاين پلاتفورمالارىنا قويىلاتىن بىرىڭعاي تالاپتار ازىرلەنەدى. بۇل تۋرالى قر ءبىلىم جانە عىلىم ءمينيسترى اسحات ايماعامبەتوۆ ءمالىم ەتتى، دەپ حابارلايدى قازاقپارات ءتىلشىسى.
«ورتا ءبىلىم سالاسىنا توقتالساق، قاشىقتان وقىتۋ اياسىندا وتاندىق نارىققا سەگىزدەن استام ءبىلىم بەرۋ پلاتفورماسى شىعۋدا. بىراق پلاتفورمالاردىڭ فۋنكتسيونالى مەن مۇمكىندىكتەرى ءارتۇرلى. مينيسترلىك وقىتۋ پروتسەسىن تولىققاندى ىسكە اسىرۋ ءۇشىن قاجەتتى فۋنكتسيونالدى الۋعا مۇمكىندىك بەرەتىن ءبىلىم بەرۋ ونلاين پلاتفورمالارىنا قويىلاتىن بىرىڭعاي تالاپتاردى ازىرلەپ، بىرىزدەندىرىپ، ىسكە اسىراتىن بولادى»، - دەدى مينيستر ۇكىمەتتىڭ وتىرىسىندا.
سونىمەن قاتار ول وقىتۋدىڭ ءداستۇرلى كۇندىزگى فورماتىنا قايتارۋ قادامىنا توقتالدى. «ءبىلىم بەرۋ ۇيىمدارىن وقىتۋدىڭ ءداستۇرلى كۇندىزگى فورماتىنا قايتارۋدىڭ ءتيىستى ءتارتىبى دەنساۋلىق ساقتاۋ مينيسترلىگىمەن بىرگە ازىرلەنەدى»، - دەدى ا. ايماعامبەتوۆ. بۇدان بۇرىن حابارلانعانداي، جولداۋ كەزىندە پرەزيدەنت تولىققاندى وقۋ ۇدەرىسى ءۇشىن قاجەتتى بارلىق فۋنكتسيالارى بار بىرىڭعاي ونلاين ءبىلىم بەرۋ پلاتفورماسىن شۇعىل ازىرلەۋدى تاپسىردى. مۇنىمەن قوسا، مەملەكەت باسشىسى ءبىلىم الۋدىڭ قالىپتاسقان ءداستۇرلى تاسىلىنە قايتا كوشۋدىڭ ءتارتىبىن ازىرلەۋدى جۇكتەدى.
