تۇركىمەنستاننىڭ شىعىسىنداعى لەباپ ءۋالاياتىنىڭ تۇرعىندارى پرەزيدەنت گۋربانگۋلى بەردىمۇحامەدوۆتءىڭ فوتوپورترەتتەرىن ساتىپ الۋعا ءماجبۇر.
ازاتىقتىڭ وسى وڭىردەگى ءتىلشىسى ازىق-تۇلىك تاۋارلارىنىڭ تاپشىلىعىنا تاپ بولعان ەلدىڭ فاراپ اۋدانىنىڭ مەملەكەتتىك دۇكەندەرىندە ۇن مەن نان ساتىلىمدا پايدا بولعانىن، ال ازىق- تۇلىك العان ادام بەردىمۇحامەدوۆتىڭ سۋرەتىن دە بىرگە قوسىپ الۋعا ءماجبۇر ەكەنىن ايتادى. سۋرەتتىڭ ولشەمى 50ح35 سانتيمەتر، باعاسى 20 ماناتتان تۇرادى (ورتالىق بانكتىڭ رەسمي باعامى بويىنشا شامامەن التى دوللار، قارا نارىقتاعى باعامنان ايتارلىقتاي ەرەكشەلەنەدى).
سۋرەتتى ساتىپ الۋدان باس تارتۋعا ەشكىمدە قاۋقار جوق. ويتكەنى، دۇكەندەردە ىشكى قاۋىپسىزدىك جانە پوليتسيا قىزمەتكەرلەرى جۇرتتى ءجىتى باقىلاۋدا ۇستاپ تۇر. ال اتىن ايتپاي، ءتىلشىنىڭ سۇراعىنا جاۋاپ بەرگەن تۇركىمەن پوليتسەيى بيلىك ەگەر بەردىمۇحامەدوۆتىڭ سۋرەتى ءار ۇيدە بولسا، وندا حالىق "ونى كوبىرەك جاقسى كورەدى"دەپ سانايتىنىن ايتادى.
ءدال وسىنداي جاعداي قازاقستاندا ورىن السا، قالاي بولار ەدى؟ ءوزىڭىز تيىن ساناپ شامامەن 4200 تەڭگەگە، ياعني 10 دوللارعا ۇيىڭىزگە تاماق ساتىپ الىپ تۇرسىز دەلىك. دۇكەنشى توقاەۆتىڭ سۋرەتىن قوسىپ ەسەپتەپ، سىزگە 16 دوللار، ياعني 6720 تەڭگە تولەۋدى تالاپ ەتسە...
ديماش بەكتالى، جۇمىسسىز: «ادام ءوزى ءار نانىنىڭ اقشاسىن ساناپ، كۇنىن زورعا كورىپ جۇرسە، پرەزيدەنتتىڭ سۋرەتىن ماجبۇرلەپ العىزۋ ادامگەرشىلىك ەمەس قوي! ءبىزدىڭ ەلدە ادام قۇقىقتارى الدەقايدا دۇرىس ساقتالادى ەكەن، تۇركىمەن اعايىنمەن سالىستىرعاندا. وسىندايدا حالقىمەن ساناساتىن ءوز پرەزيدەنتىمىزدىڭ قادىرىن تۇسىنەسىڭ».
اۋەلحان شونجان، زەينەتكەر: «باسىمدى كەسىپ السا دا، ساتىپ الماس ەدىم ەشكىمنىڭ سۋرەتىن. حالقىن ۇلدە مەن بۇلدەگە وراپ تاستاپ بارىپ، سۋرەتىمدى ساتىپ ال دەسە، ويلانىپ كورۋگە بولار ەدى. ال تمد ەلدەرىندەگى ءبىر دە ءبىر پرەزيدەنتتىڭ سۋرەتى تەگىن تاراتىلسا دا، قۇرمەتكە يە بولا المايدى دەپ سانايمىن».
ءلايلا الشىنباي، دارىگەر: «ەگەر، زاڭمەن بەكىتىپ، «الۋعا ءتيىسسىڭ» دەسە، امال جوق قوي، الامىز عوي. بىراق شىن قۇرمەتكە لايىق بولسا، كەز كەلگەن پرەزيدەنتتىڭ سۋرەتىن ادامدار وزىدەرى ساتىپ الۋعا ۇمتىلار ەدى. تۇركىمەنستان پرەزيدەنتى سياقتى تاماققا قوسىپ سۋرەتىن ساتۋ سول پرەزيدەنتتىڭ ابىرويىنىڭ قاي دەڭگەيدە ەكەنىن كورسەتسە كەرەك».
مەرۋەرت حۋساينوۆا،
«ادىرنا» ۇلتتىق پورتالى.
فوتو اشىق دەرەككوزدەن الىندى.
