الماتى قالاسىنىڭ المالى اۋداندىق سوتىندا سانجار بوقاەۆقا قاتىستى ءىس بويىنشا وتكەن سوت وتىرىسىندا «BM Trust» جشس-ءنىڭ العاشقى باسشىسى ءارى نەگىزىن قالاۋشى جانبولات ماراتوۆ جاۋاپ بەردى.
تەرگەۋ نۇسقاسى بويىنشا، كاسىپوداقتىڭ حالىقارالىق اۆتوشەرۋدى ۇيىمداستىرۋعا بولگەن نەگىزگى قاراجاتى ءدال وسى كومپانيا ارقىلى وتكەن. كۋاگەر بەرگەن ايعاقتاردىڭ ارقاسىندا مەردىگەر كومپانيانىڭ تاريحىنا قاتىستى كۇتپەگەن جايتتار ءمالىم بولدى.
ماراتوۆتىڭ ايتۋىنشا، باستاپقىدا «BM Trust» جشس-ءنىڭ يۆەنت-يندۋسترياعا دا، ءىرى كورپوراتيۆتىك ءىس-شارالاردى ۇيىمداستىرۋعا دا ەش قاتىسى بولماعان. ول كومپانيانى ازاماتتارعا كاتامارانداردى جالعا بەرۋ ءۇشىن قۇرعان.
جاعداي 2017 جىلى وزگەرگەن. ول كەزدە سانجار بوقاەۆ «قازترانسگاز» قۇرىلىمىندا جۇمىس ىستەپ جۇرگەن. كۋاگەردىڭ مالىمدەۋىنشە، ول ءوز كومپانياسىن ءىس جۇزىندە ايىپتالۋشىعا ساتقانىمەن، مامىلە زاڭ جۇزىندە باسقا ادامنىڭ اتىنا راسىمدەلگەن.
«بوقاەۆ «BM Trust» كومپانياسىن مادياردىڭ اتىنا راسىمدەۋ كەرەكتىگىن ايتتى»، – دەدى ماراتوۆ ونىڭ جيەنى ماديار قالمەنوۆتى مەڭزەي وتىرىپ.
وسىلايشا، كاتامارانداردى جالعا بەرۋمەن اينالىسقان شاعىن فيرما قىزمەت باعىتىن وزگەرتىپ، ۇلتتىق كومپانيا جوبالارىن جۇزەگە اسىرۋ بويىنشا نەگىزگى مەردىگەرلەردىڭ بىرىنە اينالعان.
جاۋاپ الۋ بارىسىندا مامىلەلەردىڭ قالاي راسىمدەلگەنىنە قاتىستى تاعى ءبىر ماڭىزدى جايت انىقتالدى. كۋاگەردىڭ ايتۋىنشا، «BM Trust» پەن تاپسىرىس بەرۋشىلەر اراسىندا اۆتوشەرۋدى ۇيىمداستىرۋعا قاتىستى كەلىسىمشارتقا «قازترانسگاز» عيماراتىنداعى سانجار بوقاەۆتىڭ قىزمەتتىك كابينەتىندە قول قويىلعان.
اتاپ ايتقاندا، ماراتوۆتىڭ سوزىنشە، ءدال وسى كابينەتتە اۆتوشەرۋدى ۇيىمداستىرۋعا قاتىستى قۇجاتتاردان بولەك، جاڭا جىلدىق كورپوراتيۆتىك كەش وتكىزۋ جونىندەگى شارت تا جاسالعان.
بۇل دەرەك بۇرىن جاۋاپ بەرگەن كۋاگەرلەردىڭ ەكس-كەڭەسشىنىڭ مەردىگەرلەردى تاڭداۋدى جانە جوبالاردىڭ قۇجاتتامالىق راسىمدەلۋىن جەكە ءوزى باقىلاعانى تۋرالى ايعاقتارىن كەزەكتى رەت راستاپ وتىر.
جاريا بولعان دەرەكتەر سانجار بوقاەۆتىڭ ادۆوكاتتارى تاراپىنان قىزۋ قارسىلىق تۋعىزدى. ماراتوۆ جاۋاپ بەرىپ جاتقان كەزدە قورعاۋ تاراپى كۋاگەردى توقتاتۋعا ارەكەت جاسادى. الايدا سوتقا توراعالىق ەتكەن سۋديا كۋاگەردىڭ ايعاق بەرۋىنە كەدەرگى كەلتىرۋگە باعىتتالعان ارەكەتتەردىڭ جولىن كەستى.
ۋاجدەرى تاۋسىلعان ادۆوكاتتار پروتسەسسۋلدىق تۇرعىدا امالسىز سانالاتىن شاراعا بارىپ، سوت وتىرىسىنىڭ ءدال وزىندە سۋدياعا قارسىلىق ءبىلدىردى. الايدا سۋدياعا قارسىلىق ءبىلدىرۋ تۋرالى ءوتىنىش قاناعاتتاندىرىلمادى.
