ءۇشىنشى مەگاپوليستە ءبىلىم سالاسى «قر ءبىلىم بەرۋدى جانە عىلىمدى دامىتۋدىڭ 2020-2025 جىلدارعا ارنالعان مەملەكەتتىك باعدارلاماسى» اياسىندا وڭىرلىك باعدارلامامەن جۇمىس جۇرگىزۋدە.
شاھاردا ءبىلىم سالاسىنىڭ اعىمداعى جاعدايىنا تالداۋ جۇرگىزىلىپ، مەملەكەتتىك باعدارلامادا بەلگىلەنگەن نىسانالى ينديكاتورلار مەن كورسەتكىشتەرگە قول جەتكىزۋ بويىنشا ءىس-شارالار جوسپارى بەكىتىلگەن.
ونلاين تامىز كەڭەسىندە بايانداما جاساعان شىمكەنت قالاسىنىڭ ءبىلىم باسقارماسىنىڭ باسشىسى ج. تاجيەۆا جاڭا وقۋ جىلىندا بىرقاتار ءبىلىم وردالارى اشىلاتىنىن مالىمدەدى.
جاڭا وقۋ جىلىنان باستاپ شىمقالادا حالقىمىزدىڭ ۇلى پەرزەنتى اباي قۇنانباەۆتىڭ 175 جىلدىعىنا وراي «ا. قۇنانباەۆ اتىنداعى دارىندى بالالارعا ارنالعان مامانداندىرىلعان گيمنازيا مەكتەبى» جۇمىسىن باستايدى.
مىنەكەي، ءبىلىم سالاسى قىزمەتكەرلەرى وسىنداي قۋانىشقا كەنەلىپ وتىر. دارىندى بالالارعا ارنالعان مەكتەپ قالادا ورتا ءبىلىم بەرۋ سالاسىن دامىتۋ، ءبىلىم ساپاسىن جوعارىلاتۋ ماقساتىندا اشىلىپ وتىر.
ۇلى اقىننىڭ ەسىمىن يەلەنگەن ءبىلىم ورداسىنان ءبىلىمدى، العىر ازاماتتاردىڭ كوپتەپ شىعاتىنىنا سەنىم زور.
شىمكەنت قالاسىنىڭ اقپاراتتىق-كوممۋنيكاتسيالار ورتالىعى
