الماتى اكىمى باقىتجان ساعىنتاەۆ ءبىرىنشى سىنىپقا باراتىنداردى وقىتۋعا پەداگوگيكالىق جوعارى وقۋ ورىندارىنىڭ تۇلەكتەرى تارتىلادى دەگەن اقپاراتقا تۇسىنىكتەمە بەردى دەپ حابارلايدى «ادىرنا» ۇلتتىق پورتالى Baq.kz سايتىنا سىلتەمە جاساپ.
الماتىنىڭ ءبىلىم سالاسى قىزمەتكەرلەرىنىڭ «الماتىنىڭ ءبىلىم بولاشاعى: جاڭا جاعدايداعى پەرسپەكتيۆالىق شەشىمدەر» فورۋمىندا ب. ساعىنتاەۆ كەزەكشى توپتارداعى 1-2 سىنىپ وقۋشىلارمەن تاجىريبەلى مۇعالىمدەردىڭ جۇمىس جاسايتىندىعىن اتاپ ءوتتى.
ءبىرىنشى سىنىپ وقۋشىلارىنىڭ اتا-انالارى جوعارى وقۋ ورىندارىنىڭ تاجىريبەسىز تۇلەكتەرى نەمەسە سوڭعى كۋرس ستۋدەنتتەرى ساباق بەرەدى ەكەن دەپ الاڭداۋشىلىق بىلدىرۋدە. بۇعان جول بەرىلمەيدى. مەكتەپ تابالدىرىعىن جاڭادان اتتاعان بالالارمەن تاجىريبەلى مۇعالىمدەر جۇمىس جاسايتىن بولادى. ەش كۇدىكتەنبەڭىزدەر. ءبىلىم باسقارماسىنا ءتيىستى تاپسىرمالار بەرەمىن، - دەدى الماتى اكىمى باقىتجان ساعىنتاەۆ.
فورۋمدا جاڭا جاعدايدا وقۋ پروتسەسسىن ۇيىمداستىرۋ ماسەلەلەرى تالقىلانۋدا. ونىڭ ىشىندە كەزەكشى توپتاردا سانيتارلىق قاۋىپسىزدىكتى ساقتاۋ، قاشىقتان وقىتۋدى ۇيىمداستىرۋ، پەداگوگتار مەن مۇقتاج وقۋشىلاردى كومپيۋتەرلىك تەحنيكامەن جانە ينتەرنەتپەن قامتاماسىز ەتۋ ماسەلەلەرى. سونىمەن قاتار، بالا باقشالار مەن مەكتەپتەردە ورىنمەن قامتاماسىز ەتۋدىڭ وزەكتى ماسەلەلەرى دە تالقىلانۋدا.
