كەدەي ەلدەرگە كومەكتەسۋ اگەنتتىگىن قۇرماقشى ءبىزدىڭ بيلىك. ول جاي عانا اگەنتتىك ەمەس. ونى قۇرۋ ءۇشىن بيۋدجەتتەن ميلليونداپ قارجى بولىنەدى. ال ەڭ باستىسى، مۇنداي اگەنتتىكتىڭ قازاقستانعا نە قاجەتى بار؟ وزگەگە اگەنتتىكپەن كومەكتەسەردەي ەلىمىز شىلقىعان باي، حالقى توقشىلىقتان سەكىرىپ ءجۇر مە ەدى؟ بۇل سۇراقتىڭ جاۋابىن تومەندە قۋانىش ەدىلحاننىڭ جازباسىنان الاسىزدار.
«اگەنتتىكتى قۇرۋعا ۇكىمەت 138 ملن تەڭگە ءبولىپ، جەدەل قۇرۋعا كىرىسىپ كەتتى دەپ جازىپ جاتىر وسىندا. سونشاما نەگە جەدەل كىرىستى؟ ونىڭ دا سەبەپتەرى ايتىلدى جوبامەن. ارينە، رەسمي ماعلۇمات ەمەس، بىراق شىندىققا كەلەدى: قازىر شەتەلگە اقشا شىعارۋدىڭ ەڭ دۇرىس جولى وسى - كەدەي ەلدەرگە كومەك كورسەتۋ.
نەگە؟ سەبەبى وففشورعا شىعارىلعان اقشالار تۇبىندە تەكسەرىلەدى. قازاقستانداعى بارلىق سچەتتاردى، ونىڭ ىشىندە بانكتەردەگى اقشا اۋدارىم قۇجاتتارىن جويىپ جىبەرگەننىڭ وزىندە دە شەتەل بانكتەرىندەگى قۇجاتتاردى جويا المايدى، سوندىقتان دۇرىستاپ تەكسەرسە ءبارىبىر ول اقشالار قالقىپ شىعادى. قازىرگى كەزدە ۇلتتىق قورداعى اقشالار 6 ەلدە بۇعاتتاۋلى تۇر دەيدى، ياعني ول دا قاۋىپتى جول. جىلجىمايتىن مۇلىك ساتىپ الۋ دا قاۋىپتى - ەرتەڭ ءبارىبىر بۇعاتتالادى.
ەندىگى جول - گۋمانيتارلىق كومەك دەگەن سىلتاۋمەن شەتەلگە اقشا شىعارۋ. ەكى كاماز جۇك بەرسەڭ، بەس كاماز بەردىم دەپ، قالعانىن اقشالاي شىعاراسىڭ. ايتپەسە ءوزى جالاڭبۇت وتىرىپ، بىرەۋلەرگە كومەك بەرەم دەگەنى ماسقارا عوي. مەن سولاي ويلايمىن. بۇلار تەگىننەن-تەگىن ەشتەڭە دە جاساي قويماس».
«ادىرنا» ۇلتتىق پورتالى.
فوتو: اشىق دەرەككوزدەن الىندى.
