وسى اپتادا بالا قۇقىقتارى جونىندەگى ۋاكىل ارۋجان سايىن فەيسبۋكتە 2017-2019 جىلدارى ارالىعىندا «111» سall-ورتالىعىنا بولىنگەن 533 630 000 تەڭگە شىعىننىڭ قايدا جۇمسالعانىنا كۇمانمەن قارايتىنىن جازعان بولاتىن. بۇل ماسەلەگە بۇرىنعى بالالار ومبۋدسمەنى زاعيپا باليەۆا جاۋاپ بەردى، دەپ حابارلايدى "ادىرنا" ۇلتتىق پورتالى «Azattyq Ruhy» سايتىنا سىلتەمە جاساپ.
ارۋجان سايىننىڭ سوزىنشە، قازىرگى ءماجىلىس دەپۋتاتى بۇرىنعى قىزمەتىندە بيۋدجەتى مول «150» call-ورتالىعىنا جەتەكشىلىك ەتكەن ءزۇلفيا بايساقوۆانىڭ كوپتەگەن ارىزدارىن جاۋاپسىز قالدىرعان. ال بۇل ءوز كەزەگىندە ورتالىقتاردى بىرىكتىرىپ، بىرلەسكەن قىزمەت كورسەتۋ ءتۇرىن ۇسىنساق دەگەن نيەتتەن تۋعان.
«بىرىنشىدەن، «150» تەلەفونى «داعدارىس ورتالىقتارى وداعىنا» تيەسىلى بولدى. ەلدەگى ءجابىر كورۋشى بالالارعا، جاستارعا، تۇرمىستىق زورلىق-زومبىلىق كورگەن ايەلدەرگە قىزمەت كورسەتتى. ەكىنشىدەن، مەن ول جەردىڭ تەحنيكالىق مۇمكىنشىلىگىن ەسكەردىم. ەكى بولمەدە، 2 كۇندىزگى، 1 تۇنگى كەزەكتەگى وپەراتورلار بار ەكەنىن كورىپ، ولار بۇنداي قارقىنمەن ەلىمىزدەگى 6 ميلليون جاس پەن جاسوسپىرىمگە قىزمەت كورسەتە المايتىنىن ءبىلدىم. ونىڭ ۇستىنە قۇرىلعىلار ەسكى بولاتىن. سوندىقتان بالالارعا ارنالعان جاڭا سەنىم تەلەفونىن اشۋ ماسەلەسىن جان-جاقتى قاراستىردىق. «111» call-ورتالىعىندا كۇن-ءتۇن دەمەي 30 وپەراتور جۇمىس جاسادى. «150» ءنومىرىن العاندا، ءبارىبىر دە ول جەردەگى شتاتتىڭ اۋقىمىن كەڭەيتۋگە تۋرا كەلەر ەدى. 3 وپەراتور جۇمىس اتقارعان ورتالىقتىڭ جۇمىسىنا جىلىنا 20 ملن تەڭگە جۇمسالسا، شتاتتى ۇلكەيتكەن جاعدايدا جىلدىق شىعىن ءبارىبىر دە 10 ەسەگە، ياعني 200 ملن تەڭگەگە دەيىن ۇلعايار ەدى،-دەدى زاعيپا باليەۆا.
ول بولىنگەن 533 ملن تەڭگەنىڭ دالاعا جۇمسالماعانىن سەنىممەن ايتتى. «ءتىپتى، ءبىر بالانىڭ ءومىرىن ساقتاي العان بولساق، ونىڭ ءوزى كوپكە تاتيدى»-دەدى.
بالالار كەز كەلگەن تەلەفون ارقىلى ءبىزدىڭ ورتالىقتارعا حابارلاسا الاتىنداي مۇمكىنشىلىككە يە بولدى. بۇنى مەن بالا قۇقىعىن قورعاۋشى ۋاكىل بولعاندىقتان نەگىزگى تالاپ رەتىندە قويدىم. سول ۋاقىتتا ءبىز بعم، الەۋمەتتىك قورعاۋ، دەنساۋلىق ساقتاۋ مينيسترلىكتەرىمەن جانە قاۋىپسىزدىك كەڭەسىمەن كەلىسىمدەرگە كەلدىك. ەستەرىڭىزدە بولسا، بالالار اراسىندا «سيني كيت» دەگەن ويىن تاراعان بولاتىن. ءبىز قۇقىق قورعاۋ ورگاندارىمەن بىرلەسە وتىرىپ، اتالعان ماسەلەنىڭ الدىن الدىق. ساراپتامالىق جۇمىستار جۇرگىزدىك.
سونىمەن قاتار، ارۋجان سايىننىڭ «111» ورتالىعى زاعيپا حانىمنىڭ اتىنا تىركەلگەن دەگەن ايىپتاۋىنا:
مەن زاڭدى تۇلعا ەمەس، ۋاكىلمىن. بۇيرىقپەن مۇقيات تانىسساڭىز، ول تەلەفون ءنومىرى مەنىڭ اتىما بالا قۇقىعىن قورعاۋشى ۋاكىل رەتىندە تىركەلگەن. بۇل مەنىڭ جەكە ءنومىرىم دەگەن ءسوز ەمەس،- دەدى ءماجىلىس دەپۋتاتى.
«ادىرنا» ۇلتتىق پورتالى
