"انداي-مىنداي" سوزىمەن ەستە قالعان ەرعالي سىدىمانوۆقا سوگىس جاريالانۋى مۇمكىن

595

كەشە الماتى وبلىسىندا ادەپ جونىندەگى كەڭەستىڭ وتىرىسى ءوتتى. وندا وبلىستىڭ باس مەملەكەتتىك سانيتار دارىگەرى ەرعالي سىدىمانوۆپەن بولعان جاعداي تالقىلاندى. بۇل تۋرالى تالدىقورعان اكىمىنىڭ ءباسپاسوز حاتشىسى نۇر قاناتۇلىنى حابارلادى. 

ادەپ جونىندەگى كەڭەس قازاقستاننىڭ دەنساۋلىق ساقتاۋ مينيسترىنە وبلىستىڭ سانيتار دارىگەرىنە قاتاڭ سوگىس تۇرىندەگى تارتىپتىك جازا قولدانۋدى ۇسىنعان.

"كوپ ادام ەرعالي سىدىمانوۆتى جۇمىستان شىعارۋ كەرەك دەسە دە، مەن مۇنى ەڭ وڭتايلى جانە ءادىل شەشىم دەپ سانايمىن.

بىرىنشىدەن، ول ءوز كىناسىن تولىق مويىنداپ، قالا مەن وبلىس تۇرعىندارىنان كەشىرىم سۇرادى. ەكىنشىدەن، ۆيدەودا بالاعات سوزدەر نەمەسە ادامداردى قورلاۋ بولعان جوق. ۇشىنشىدەن، ول دەنساۋلىق ساقتاۋ سالاسىندا تاجىريبەسى مول جانە ەڭبەك ءوتىلى بار ءوز ءىسىنىڭ مامانى", - دەپ جازدى Instagram جەلىسىندەگى پاراقشاسىندا.

ەسكە سالا كەتسەك، ەرعالي سىدىمانوۆ الماتى وبلىسىنىڭ كاسىپكەرلەرىنە دورەكى سوزدەر ايتقانى الەۋمەتتىك جەلىدە تاراپ كەتىپ، ونى مينيستر الەكسەي تسوي كورىپ،  تۇرعىندارمەن كەلىسە وتىرىپ، مۇنداي ارەكەت مەملەكەتتىك قىزمەتكەرگە ساي ەمەس دەپ ەسەپتەيتىنىن ايتقان. ال 12 تامىزدا ول ءوز كىناسىن مويىنداپ، قازاقستاندىقتاردان كەشىرىم سۇرادى.

"ادىرنا" ۇلتتىق پورتالى

پىكىرلەر
رەداكتسيا تاڭداۋى