قازىر ءبىزدىڭ قوعامدا يسلام ءدىنىن جاقتاۋشىلار مەن وعان قارسى توپتىڭ اراسىنداعى داۋدىڭ تۇتانۋى ءاپ-ساتتە. ەكى تاراپتى داۋلاستىرۋ ءۇشىن كەز كەلگەن تاقىرىپتى ورتاعا تاستاي سالسا، ءبىتتى. اپتالاپ ايتىسىپ، تارتىسىپ جاتقانى. «ادىرنا» ۇلتتىق پورتالىندا جاريالانعان «دونور» تۋرالى ماتەريال دا، قازاق دالاسىندا كرەماتوري سالۋعا قاتىستى ساۋالناما دا دىنشىلدەر مەن ءدىندى جاقتامايتىن توپ اراسىندا قىزۋ تالقىعا تۇسكەنى سونداي، قاي توپتىڭ اگرەسسيۆتى ەكەنىن اجىراتۋ وڭايعا تۇسكەندەي. ايتپاعىمىز بۇل ەمەس. سونداي داۋ بارىسىنداعى پىكىرلەردى وقىپ وتىرىپ، كەيبىرەۋلەر ءوزىنىڭ قاي ەلدە تۇرىپ جاتقانىن ۇمىتىپ كەتەتىنىن اڭعاراسىز.
ءداپ ءبىر يسلام مەملەكەتىندە كۇن كەشىپ جاتقانداي، شاريعاتتى العا تارتىپ، قۇراننان مىسال كەلتىرىپ شاپتىعىپ شىعاتىندار از ەمەس ارامىزدا. بىزدەگى ءدىن ۇستانۋشىلاردىڭ وسىلاي پايىمداۋىنا بالكىم، كەي ازاماتتاردىڭ پىكىرى دە ىقپال ەتەتىن شىعار، كىم ءبىلسىن. ماسەلەن، وسى كرەماتوري تاقىرىبىنا قاتىستى ءتىپتى كوزى اشىق، ءبىلىمدى ازاماتتارىمىزدىڭ ءوزى قازاقستاندى «مۇسىلمان ەلى» دەپ جازىپ، ايدى اسپانعا ءبىر-اق شىعاردى.
«استانا قالاسىندا 1 ميلليارد 519 ميلليون 285 مىڭ تەڭگەگە ءمايىتتى ورتەيتىن كرەماتوري سالىنباقشى. بۇل قالاي؟ ءبىز ولىگىن ورتەيتىن ءۇندىستان ەمەسپىز. ءمايىتىن ارۋلاپ جەرلەيتىن مۇسىلمان ەلىندە مۇنشا قاراجات شاشىپ كرەماتوري سالۋدىڭ قاجەتى قانشا؟! جەرلەۋ ءبىزدىڭ مادەنيەتىمىز، ءدىنىمىز. ەلىمىزدەگى تاريحي زيراتتارعا قاراپ، جەردىڭ يەسى ەكەنىمىزدى بىلەمىز. ارۋاق سيلاۋ ءبىزدىڭ قاسيەتىمىز. وسىناۋ بايتاق دالادا ءمايىتتى جەرلەۋگە ورىن جەتپەيدى دەۋ اقىلعا سىيىمسىز. ارينە مىنا زاماندا جەرلەۋدى بەلگىلى ءبىر ستاندارتتارعا كەلتىرۋ قاجەت. باي بولسىن، كەدەي بولسىن بولىنەتىن جەردىڭ مولشەرى شەكتەۋلى بولۋى كەرەك. قالاي بولسا، سولاي شاشىراڭقى، ىيقى-جىيقى بەيىت تۇرعىزۋدى دوعارۋىمىز قاجەت.
ىسىراپ قىلىپ ءزاۋلىم-ءزاۋلىم كۇمبەزدى زيرات تۇرعىزۋدى توقتاتۋعا ءتيىسپىز. جالپى زيرات اۋماعىن عانا قورشاپ، بەلگى رەتىندە قۇلپى تاسقا كىسىنىڭ اتى-ءجونى جازىلسا، جەتكىلىكتى. مۇنىڭ ءبارىن زاڭدى تۇردە رەتتەۋگە بولادى. مۇفتيات كرەماتوري سالۋعا رەسمي تۇردە ءوز پوزيتسياسىن بىلدىرۋگە، زيارات تۇرعىزۋ، جەرلەۋ ءتارتىبىن ۇسىنۋعا ءتيىس». وسى جازبانىڭ اۆتورى كىم ەكەنىن بىلەسىز بە؟ بىلمەسەڭىز، ايتايىق. بۇل مىقتى ءدىنتانۋشىنىڭ ءبىرى قايرات جولدىبايدىڭ فەيسبۋكتاعى جازباسى.
ال ەندى ساياساتتان حابارى بار، شەتەلدە ءبىلىم العان، كەڭەستىك جۇيەنىڭ ەمەس، جاڭا زاماننىڭ ادامى سانالاتىن تاعى ءبىر ازاماتتىڭ پىكىرىنە نازار سالايىق. «استانادا كرەماتوري سالىنادى، قۇرىلىسىنا 1,5 ملرد تەڭگە بولىنەدى دەگەن اقپارات شىقتى. ءبىز مۇسىلمان ەلىمىز. ەرتەڭ حالىق قارسى شىعادى. قازاقتا جەر دە كوپ. قانداي قاجەتتىلىك بار؟..
بىزدە شەنەۋنىكتەر ەلدىڭ ويى مەن حالىقتان تىم الىستاپ كەتكەن. مەملەكەتتىك باسقارۋدى بيزنەس پروەكت رەتىندە قارايدى. بىراق ول شەشىمدەر حالىقپەن بايلانىسقان رۋحاني دۇنيەلەر سينتەزىنەن وتپەسە ءتۇبى جاقسى بولمايدى». جازبا اۆتورى ساياساتتانۋشى باۋىرجان سەرىكباەۆ.
ەكى جازبادا دا قازاقستاندى «مۇسىلمان ەلى» دەپ اتاپ كورسەتىلگەن. بۇل نە؟ ساۋاتسىزدىق پا، الدە بىلمەستىك پە؟ كەز كەلگەن ادامنىڭ نانىم سەنىمىنە قۇرمەتپەن قارايمىز، ارينە. الايدا ءوزىڭنىڭ ءدىني ۇستانىمىڭدى تىقپالاپ، ول ازداي، زاڭدى تۇردە زايىرلى سانالاتىن ەلىمىزدى «مۇسىلمان ەلى» دەپ اتاۋدى قالاي تۇسىنبەك كەرەك؟
كرەماتوري سالىنسا دا، سالىنباسا دا قۇرىپ كەتسىن! كرەماتويدى سالۋ سالماۋعا ءسىز بەن بىزدەن ەشكىم رۇقسات سۇرامايدى دا. الايدا زايىرلى قازاقستان مەملەكەتىن «مۇسىلمان ەلى» دەپ، ونسىز دا ىلىك ىزدەپ الاسۇرعان دۇمشەلەردى دۇرلىكتىرمەيىكشى. قازاقستان بۇعان دەيىن دە، قازىر دە مۇسىلمان ەلى بولعان ەمەس. قازاق دالاسىنا يسلام مەملەكەتىن ورناتۋعا جانتالاسىپ جۇرگەندەرگە مىناداي پىكىر جازىپ، قولتىعىنا سۋ بۇركىگەنشە، ءار قازاقتىڭ ءبىلىم الۋىنا، تەحنيكا ءتىلىن مەڭگەرۋىنە، ۋاقىت اعىنىنا ساي ازامات بولۋىنا ىقپال ەتەرلىك دۇنيە جازۋعا نە كەدەرگى؟ ءدىني سەنىم بە؟ ولاي بولسا، ءوزىڭىزدىڭ ءدىني ۇستانىمىڭىزدى ءار تۇسقا تىقپالاۋدى قازاقستان زاڭى دا قوش كورمەيتىنىن ەسكەرتۋگە تۋرا كەلەدى. جۇرتتى شاتىستىرماڭىزدار، قازاقستان ەشقانداي دا مۇسىلمان ەلى ەمەس!
شوقان باقىتۇلى،
«ادىرنا» ۇلتتىق پورتالى.
