ءنوۆوسىبىردىڭ تولماچەۆ اۋەجايىندا ءبىر قاناتى جۇلىنىپ كەتكەن ۇشاق تۇر دەپ حابارلايدى «ادىرنا» ۇلتتىق پورتالى «تايگا.ينفو» اقپارات اگەنتتىگىنە سىلتەمە جاساپ.
ۇشاقتىڭ بەلىندە Kazakhstan Air Force دەگەن جازۋى بار. قازاقشاعا اۋدارساق، بۇل جازۋ قازاقستان اسكەري اۋە كۇشتەرىنە تيەسىلى ەكەنىن اڭعارتادى. Boeing 757−200 اۋە كەمەسىنىڭ سول جاق قاناتى جۇلىنىپ كەتكەن جانە بۇل ۇشاق قايدان كەلگەنى دە ازىرگە بەلگىسىز. سونىمەن قاتار ۇشاقتىڭ قاناتى نەدەن جۇلىنعانى تۋرالى دا ناقتى اقپارات جوق. UP-B5701 ءنومىرلى ۇشاقتى Flightradar24 بازاسىندا تەكسەرتۋ بارىسىندا راسىمەن دە بۇل اۋە كەمەسى قازاقستانعا تيەسىلى ەكەنى انىقتالدى.
قورعانىس مينيسترلىگى ۇشاققا قاتىستى اقپاراتقا قاتىستى تۇسىنىك بەرىپ، ۇشاقتى جوندنەۋ جۇمىسى ءجۇرىپ جاتقانىن حابارلادى.
"قازاقستاننىڭ اسكەري-اۋە كۇشتەرىنىڭ ۇشاعى رەسەيدىڭ ءنوۆوسىبىر قالاسىندا "وو S-7 ينجينيرينگ"-تە جوسپارلى تەحنيكالىق قىزمەت كورسەتۋدەن ءوتىپ جاتىر. جوندەۋ جۇمىستارى كەزىندە فيۋزەلياج بولىكتەرى مەن اگرەگاتتارى الىنعان. بۇل سەنساتسيالىق جاعداي ەمەس،" - دەلىنگەن حابارلامادا.
