الماتى وبلىسى، اششىساي اۋىلىنىڭ تۇرعىنى نۇرلان احمەتوۆتىڭ قازاسى تۋرالى اقپارات 16 تامىزدا الەۋمەتتىك جەلىدە تارادى. ىشكى ىستەر مينيسترلىگىنىڭ ايتۋى بويىنشا، كاسىپكەردى 15 تامىز كۇنى بەلگىسىز بىرەۋلەر ءولتىرىپ كەتكەن. دەنەسىنىڭ توعىز جەرىنەن پىشاق جاراقاتىن العان احمەتوۆ اۋرۋحانادا كوز جۇمدى. قازىرگى تاڭدا بۇل وقيعاعا بايلانىستى قر قىلمىستىق كودەكسىنىڭ 99-بابىنىڭ 1-بولىگى (ادام ءولتىرۋ) بويىنشا سوتقا دەيىنگى تەرگەۋ جۇمىستارى باستالدى. تۇرعىندار ءولىمدى 13 جىل بۇرىن بولعان قازاق-شەشەن قاقتىعىسىمەن بايلانىستىرىپ وتىر. قازىرگى تاڭدا شەشەن ۇلتىنىڭ ۇيلەرىن ارناۋلى پوليتسيا كۇزەتۋدە.
كاسىپكەرگە بۇعان دەيىن دە بىرنەشە رەت قاستاندىق جاسالعان
2007 جىلدىڭ ناۋرىزىندا الماتى وبلىسىنىڭ بايدىبەك بي جانە قازاتكوم اۋىلدارىندا جەرگىلىكتى بىرنەشە قازاق جانە شەشەن تۇرعىندارىنىڭ اراسىندا قاقتىعىس بولدى. نۇرلان احمەتوۆ ۇلتارالىق ماسەلەنى شەشۋگە بەلسەندى تۇردە اتسالىسقان ازاماتتاردىڭ ءبىرى ەدى. بۇل وقيعادان كەيىن ازاماتتىڭ باسىنا قارا بۇلت ۇيىرىلگەن-ءدى.
وسىدان ەكى جىل بۇرىن كاسىپكەردىڭ كولىگىنە جارىلعىش زات قويىلعان. قاستاندىق جاساۋشىلار تۋعان ىنىسىنە دە وق جاۋدارعان. احمەتوۆ 31-ارناعا بەرگەن سۇحباتىندا «پيستولەتپەن كەلىپ اتىپ جاتىر، اۆتوماتپەن كەلىپ اتىپ جاتىر. جارىلعىش زات قويىپ جاتىر. ەندى ءبىر كۇنى تانكىمەن كەلىپ تاپتاپ كەتكەنشە جاتاتىن شىعارمىز وسىندا»،- دەپ ءوز جانايقايىن بىلدىرگەن ەدى. وكىنىشكە وراي، بەسىنشى مارتە جاسالعان قاستاندىق ولىممەن اياقتالدى. مينيسترلىك ورىن العان قىلمىستىق ءىستى 2 اي تەرگەپ، ءتيىستى ادامداردى جازالايمىز دەپ ۋادە بەردى. الايدا 13 جىل بويى قولعا تۇسپەگەن قىلمىسكەرلەردى 2 ايدا انىقتاۋ مۇمكىن بە؟! بۇل جولى پوليتسەيلەر ناتيجەلى جۇمىس اتقارىپ، نەمقۇرايلىق تانىتپايدى دەپ سەنەمىز.
نۇرلان احمەتوۆ قانداي ادام ەدى؟
نۇرلان احمەتوۆ 1968 جىلى ەڭبەكشىقازاق اۋدانىنداعى اششىساي اۋىلىندا دۇنيەگە كەلگەن. ول - اۋىلدىڭ سىيلى ازاماتى، قىسقا عۇمىرىندا ءبىراز يگى ىستەردى اتقارعان بەلسەندى. اۋىل تۇرعىندارىنىڭ ايتۋىنشا، كاسىپكەر ۇنەمى وزگەلەرگە كومەكتەسىپ جۇرەتىن قولى اشىق، «قازاق» دەپ جينالعان جەردەن قالمايتىن ۇلتجاندى ازامات بولعان. سوڭعى رەت، 10 تامىز كۇنى دۋلات اعادىلدىڭ ەسكە الۋ اسىنا نيەتتەنگەن ءبىر توپ جاستاردى جيناپ، ولاردىڭ جول-اقىسىن كوتەرىپ بارعان.
بەلسەندىنىڭ ارتىندا ايەلى مەن ءتورت قىزى قالدى.
«ادىرنا» ۇلتتىق پورتالى نۇرلان احمەتوۆتىڭ تۋعان-تۋىستارىنا قايعىرا كوڭىل ايتادى. ماسەلە تەز ارادا شەشىمىن تاۋىپ، جازىقتىلار جازاسىن تارتادى دەپ سەنەمىز.
ديانا اسان،
«ادىرنا» ۇلتتىق پورتالى
