Almaty oblysy, Aysaı aýylynyń turǵyny Nurlan Ahmetovtiń qazasy týraly aqparat 16 tamyzda áleýmettik jelide tarady. Ishki ister mınıstrliginiń aıtýy boıynsha, kásipkerdi 15 tamyz kúni belgisiz bireýler óltirip ketken. Denesiniń toǵyz jerinen pyshaq jaraqatyn alǵan Ahmetov aýrýhanada kóz jumdy. Qazirgi tańda bul oqıǵaǵa baılanysty QR Qylmystyq kodeksiniń 99-babynyń 1-bóligi (Adam óltirý) boıynsha sotqa deıingi tergeý jumystary bastaldy. Turǵyndar ólimdi 13 jyl buryn bolǵan qazaq-sheshen qaqtyǵysymen baılanystyryp otyr. Qazirgi tańda sheshen ultynyń úılerin arnaýly polıııa kúzetýde.
Kásipkerge buǵan deıin de birneshe ret qastandyq jasalǵan
2007 jyldyń naýryzynda Almaty oblysynyń Báıdibek bı jáne Qazatkom aýyldarynda jergilikti birneshe qazaq jáne sheshen turǵyndarynyń arasynda qaqtyǵys boldy. Nurlan Ahmetov ultaralyq máseleni sheshýge belsendi túrde atsalysqan azamattardyń biri edi. Bul oqıǵadan keıin azamattyń basyna qara bult úıirilgen-di.
Osydan eki jyl buryn kásipkerdiń kóligine jarylǵysh zat qoıylǵan. Qastandyq jasaýshylar týǵan inisine de oq jaýdarǵan. Ahmetov 31-arnaǵa bergen suhbatynda «Pıstoletpen kelip atyp jatyr, avtomatpen kelip atyp jatyr. Jarylǵysh zat qoıyp jatyr. Endi bir kúni tankimen kelip taptap ketkenshe jatatyn shyǵarmyz osynda»,- dep óz janaıqaıyn bildirgen edi. Ókinishke oraı, besinshi márte jasalǵan qastandyq ólimmen aıaqtaldy. Mınıstrlik oryn alǵan qylmystyq isti 2 aı tergep, tıisti adamdardy jazalaımyz dep ýáde berdi. Alaıda 13 jyl boıy qolǵa túspegen qylmyskerlerdi 2 aıda anyqtaý múmkin be?! Bul joly polıeıler nátıjeli jumys atqaryp, nemquraılyq tanytpaıdy dep senemiz.
Nurlan Ahmetov qandaı adam edi?
Nurlan Ahmetov 1968 jyly Eńbekshiqazaq aýdanyndaǵy Aysaı aýylynda dúnıege kelgen. Ol - aýyldyń syıly azamaty, qysqa ǵumyrynda biraz ıgi isterdi atqarǵan belsendi. Aýyl turǵyndarynyń aıtýynsha, kásipker únemi ózgelerge kómektesip júretin qoly ashyq, «qazaq» dep jınalǵan jerden qalmaıtyn ultjandy azamat bolǵan. Sońǵy ret, 10 tamyz kúni Dýlat Aǵadildiń eske alý asyna nıettengen bir top jastardy jınap, olardyń jol-aqysyn kóterip barǵan.
Belsendiniń artynda áıeli men tórt qyzy qaldy.
«Adyrna» ulttyq portaly Nurlan Ahmetovtyń týǵan-týystaryna qaıǵyra kóńil aıtady. Másele tez arada sheshimin taýyp, jazyqtylar jazasyn tartady dep senemiz.
Dıana ASAN,
«Adyrna» ulttyq portaly
