بۇگىن - فيلولوگيا عىلىمدارىنىڭ دوكتورى، پروفەسسور رابيعا سىزدىق دۇنيەگە كەلگەن كۇن. عالىم قازاق ءتىل ءبىلىمىنىڭ دامۋىنا بار عۇمىرىن ارناپ، "انا ءتىلىنىڭ ابىز-اناسى" اتاندى. ع.مۇسىرەپوۆ ايتقانداي، ر.سىزدىقتىڭ ەكى تىلدە جەتىك ءبىلۋى ارىپتەستەرىنە دە، جاستارعا دا ۇلگى-ونەگە بولا الدى. م.اۋەزوۆ «ول ءبىر وتە اقىلدى، مادەنيەتتى جاس» دەگەن باعا بەرسە، ق.امانجولوۆ «كوپ تۋسا قازاق ءدال سىزدەي قىزدى...» دەپ ولەڭ ارناعان.
«ادىرنا» ۇلتتىق پورتالى ءبىرتۋار تۇلعانىڭ قاناتتى سوزدەرىن نازارلارىڭىزعا ۇسىنادى.
- عىلىمدا ازدى-كوپتى جۇمىس ىستەدىم. سونىڭ بارىنە جەتەلەپ اكەلگەن نامىس.
- ەڭ اۋەلى ايەل بولىڭدار. قوناعىڭ كۇتۋلى، اسىڭ ءپىسۋلى بولسىن. ەرىڭنىڭ جاعاسى كىر بوپ جۇرمەسىن. بالانى جاقسىلاپ تاربيەلە. توركىنىڭ مەن قايىن جۇرتىڭدى تابىستىرىپ وتىر. وسىلاردىڭ بارىنەن ۋاقىت ارتىلىپ جاتسا عانا ودان كەيىن عالىم بولاسىڭ با، زالىم بولاسىڭ با، ءوزىڭ ءبىل.
- مەكتەپ تابالدىرىعىن اتتاعان بالا انا تىلىندە عانا سويلەۋى كەرەك. بالا باستاۋىشتا ورىس تىلىندە دە ەمەس، اعىلشىن تىلىندە دە ەمەس، تەك قانا انا تىلىندە وقۋى كەرەك. ءۇش ءتىلدى بىردەن وقىتقاندا بالانىڭ انا ءتىلى بولمايدى. انا ءتىلى بولماعان ادامنان ەشقانداي اقىن دا، جازۋشى دا، سۋرەتشى دە شىقپايدى. عالىم شىعار، مامان شىعار، ءتىپتى اتاقتى ادام دا شىعار. بىراق وندا ەشقانداي مادەني ازىق بولمايدى.
- رەسمي دارەجە الۋ عالىمدىقتىڭ ناعىز بەلگىسى دەپ ايتا المايمىن.
- ءتىل ۇستارتۋعا تەك قازاق ءتىلى مۇعالىمى ەمەس، بارلىق قوعام مۇشەلەرى، وتباسى، باسقا ءپان مۇعالىمدەرى جۇمىلدىرىلۋى ءتيىس.
- جاڭالىق اشامىن، زەرتتەيمىن دەگەن ادامعا عىلىم اينا. سەنىڭ جازعان ەڭبەگىڭدى باسقا بىرەۋ دە جازۋى مۇمكىن. بىراق حالىققا قاجەتتىلىگىنە، قۇندىلىعىنا قاراي ۋاقىت وتە ءوزى اق سارالانادى.
- وقىتۋشىلىق دەگەن دۇنيەدەگى ەڭ جاقسى ماماندىق. ارينە، قيىن. تولەيتىنى از. سوعانقاراماستان, ەڭ جاقسى ماماندىق قوي. بۇنداي جۇمىستى دۇرىس ۇيىمداستىرۋ، وڭاي شارۋا ەمەس. 95 جىل ءومىر ءسۇرىپ، نەنى ءبىلدىڭ دەيسىزدەر عوي. وسىندايدى ءبىلدىم، نەنىڭ وڭاي، نەنىڭ قيىن ەكەنىن. مەنى 95-كە كەلدىڭىز دەپ قۋانىپ جاتىرسىزدار عوي. ەندى 1-2 جىلدا كەتىپ قالماۋعا تىرىسارمىن.
ەستەرىڭىزگە سالا كەتەيىك، رابيعا سىزدىق تاياۋدا عانا 96 جاسقا قاراعان شاعىندا دۇنيەدەن وزعان ەدى.
ديانا اسان،
«ادىرنا» ۇلتتىق پورتالى
Басқалармен бөлісе отырыңыз
