Búgin - fılologııa ǵylymdarynyń doktory, professor RABIǴA SYZDYQ dúnıege kelgen kún. Ǵalym qazaq til biliminiń damýyna bar ǵumyryn arnap, "ana tiliniń Abyz-Anasy" atandy. Ǵ.Músirepov aıtqandaı, R.Syzdyqtyń eki tilde jetik bilýi áriptesterine de, jastarǵa da úlgi-ónege bola aldy. M.Áýezov «Ol bir óte aqyldy, mádenıetti jas» degen baǵa berse, Q.Amanjolov «Kóp týsa qazaq dál sizdeı qyzdy...» dep óleń arnaǵan.
«Adyrna» ulttyq portaly birtýar tulǵanyń qanatty sózderin nazarlaryńyzǵa usynady.
- Ǵylymda azdy-kópti jumys istedim. Sonyń bárine jetelep ákelgen namys.
- Eń áýeli áıel bolyńdar. Qonaǵyń kútýli, asyń pisýli bolsyn. Erińniń jaǵasy kir bop júrmesin. Balany jaqsylap tárbıele. Tórkiniń men qaıyn jurtyńdy tabystyryp otyr. Osylardyń bárinen ýaqyt artylyp jatsa ǵana odan keıin ǵalym bolasyń ba, zalym bolasyń ba, óziń bil.
- Mektep tabaldyryǵyn attaǵan bala ana tilinde ǵana sóıleýi kerek. Bala bastaýyshta orys tilinde de emes, aǵylshyn tilinde de emes, tek qana ana tilinde oqýy kerek. Úsh tildi birden oqytqanda balanyń ana tili bolmaıdy. Ana tili bolmaǵan adamnan eshqandaı aqyn da, jazýshy da, sýretshi de shyqpaıdy. Ǵalym shyǵar, maman shyǵar, tipti ataqty adam da shyǵar. Biraq onda eshqandaı mádenı azyq bolmaıdy.
- Resmı dáreje alý ǵalymdyqtyń naǵyz belgisi dep aıta almaımyn.
- Til ustartýǵa tek qazaq tili muǵalimi emes, barlyq qoǵam músheleri, otbasy, basqa pán muǵalimderi jumyldyrylýy tıis.
- Jańalyq ashamyn, zertteımin degen adamǵa ǵylym aına. Seniń jazǵan eńbegińdi basqa bireý de jazýy múmkin. Biraq halyqqa qajettiligine, qundylyǵyna qaraı ýaqyt óte ózi aq saralanady.
- Oqytýshylyq degen dúnıedegi eń jaqsy mamandyq. Árıne, qıyn. Tóleıtini az. Soǵanqaramastan, eń jaqsy mamandyq qoı. Bundaı jumysty durys uıymdastyrý, ońaı sharýa emes. 95 jyl ómir súrip, neni bildiń deısizder ǵoı. Osyndaıdy bildim, neniń ońaı, neniń qıyn ekenin. Meni 95-ke keldińiz dep qýanyp jatyrsyzdar ǵoı. Endi 1-2 jylda ketip qalmaýǵa tyrysarmyn.
Esterińizge sala keteıik, Rabıǵa Syzdyq taıaýda ǵana 96 jasqa qaraǵan shaǵynda dúnıeden ozǵan edi.
Dıana ASAN,
«Adyrna» ulttyq portaly
