قىتاي باسشىسى سي تسزينپين العاشقى بولىپ الەكساندر لۋكاشەنكونى پرەزيدەنتتىك سايلاۋداعى جەڭىسىمەن قۇتتىقتادى.
«قىتاي ۇكىمەتى مەن قىتاي حالقىنىڭ اتىنان، سونداي-اق جەكە ءوزىمنىڭ تاراپىمنان قۇتتىقتاۋلار مەن ىزگى تىلەكتەرىمدى بىلدىرگىم كەلەدى. بەلارۋس مەملەكەتى ءسىزدىڭ باسشىلىعىڭىزبەن تاماشا جەتىستىكتەرگە جەتەتىنىنە سەنىمدىمىن »، - دەلىنگەن جەدەلحاتتا.
قحر پرەزيدەنتى قىتاي-بەلارۋس قاتىناستارىن دامىتۋعا ۇلكەن ءمان بەرەتىنىن، ءارى لۋكاشەنكو ەكەۋىنىڭ اراسىنداعى جەكە دوستىقتى باعالايتىنىن جەتكىزدى.
وسىعان دەيىن لۋكاشەنكو ءوز حالقىنا جولداعان ۇندەۋىندە قحر-مەن دوستىق قارىم-قاتىناستا ەكەنىن ەرەكشە اتاپ وتكەن ەدى.
«بەلارۋس مەملەكەتى - ەۋرازيا ورتالىعىنداعى جالعىز تىنىش جەر. رەسەي ءبىزدى وداقتاس رەتىندە جوعالتىپ الۋدان قورقادى، ال ەۋروپا ءوز قىزىعۋشىلىعىن تانىتىپ وتىر. قىتاي ەلىمىزدى ءوزىنىڭ دوسى دەپ سانايدى»، - دەدى سول كەزدە ەل پرەزيدەنتى.
بۇل ۇندەۋدەن كەيىن ەكى مەملەكەت اراسىنداعى قاتىناستاردىڭ نىعايۋىنا نازار اۋدارىلدى.
واك-تىڭ 10 تامىزدا شىققان الدىن-الا مالىمەتتەرى بويىنشا، قازىرگى پرەزيدەنت لۋكاشەنكو 80,23%، ونىڭ باستى قارسىلاسى سۆەتلانا تيحانوۆسكايا 9,90% داۋىس جينادى.
«لۋكاشەنكو قىتايلىقتارعا ۇنەمى تاعزىم ەتەدى. ونىڭ تۇسىنىگى بويىنشا قىتاي رەسەيدەن گورى ۇلكەن دەرجاۆا»
ەكونوميكا جوعارى مەكتەبى، الەمدىك ەكونوميكا جانە حالىقارالىق قاتىناستار فاكۋلتەتىنىڭ دوتسەنتى اندرەي سۋزدالتسەۆ lenta.ru-عا بەرگەن سۇحباتىندا «بەلارۋس مەملەكەتى رەسەيدى قىتايعا الماستىرۋعا تىرىسىپ جاتىر»،- دەپ حابارلادى. ونىڭ ايتۋىنشا، قازىرگى تاڭدا بەلارۋس قىتاي ەلىنە قىزىعۋشىلىق تانىتىپ وتىر. سونداي-اق، ساراپشى قىتايدىڭ ەشقاشان بۇكىل ەلگە تەحنيكالىق قىزمەت كورسەتپەيتىنىن اتاپ ءوتتى.
ال ازيا-تىنىق مۇحيتى ايماعى زەرتتەۋ ورتالىعىنىڭ جەتەكشىسى الەكساندر لومانوۆ gazeta.ru سايتىنا بەرگەن سۇحباتىندا قحر بەلارۋس ەلىن ۇلگىلى سەرىكتەس بولعانى ءۇشىن تاڭداعانىن ايتتى.
ونىڭ پىكىرىنشە، بۇل قىتاي تاراپىنان جاسالعان وتە ساۋاتتى ستراتەگيا بولىپ سانالادى، ويتكەنى بەلارۋس پەكينگە بىلىكتى جۇمىسشىلاردى ۇسىنا الادى، ءارى بۇل مەملەكەت رەسەي جانە شىعىس ەۋروپا ەلدەرىنە جاقىن ورنالاسقان. سەرىكتەس بولۋ ارقىلى قىتاي ءوز تاۋارلارىن جانە ينۆەستيتسيالىق جوبالارىن العا جىلجىتادى.
لۋكاشەنكو وتانداستارىنا جاساعان ۇندەۋىندە رەسەي فەدەراتسياسىنىڭ باۋىرلاستىق قاتىناستاردى سەرىكتەستىككە وزگەرتكەنىن دە اتاپ ءوتتى. سۋزدالتسەۆ ايتقانداي، لۋكاشەنكو بىرنەشە رەت رەسەي مەن قىتاي اراسىن ارانداتۋعا تىرىستى. باسشى بەيجىڭگە ماسكەۋ تۋرالى بىرنەشە رەت شاعىمداندى. بىراق رەسەي فەدەراتسياسى دا، قحر دا مۇنداي ارەكەتتەردى قولدامادى.
«لۋكاشەنكو ماسكەۋدەن قارجىلىق كومەك الۋ ءۇشىن ەلدى بوپسالاۋعا تىرىسۋدا»، - دەدى سۋزدالتسەۆ.
قىتاي مەملەكەتى بەلارۋسكە قارجىلىق كومەك كورسەتتى
لۋكاشەنكو جۋرناليست دميتري گوردونعا بەرگەن سۇحباتىندا
«مەن سي تسزينپينمەن كەزدەسۋدەمىن. ول توراعا بولماعان كەزدىڭ وزىندە دە ءبىز جاقسى قارىم-قاتىناستا بولدىق. قىتاي باسشىسى «الەكساندر گريگورەۆيچ، ەگەر ءسىز قىتايدىڭ قارۋىنا ريزا بولساڭىز، ءبىز سىزگە كومەكتەسەمىز»،-دەدى. الايدا مەن ونى جاساۋعا قاراجاتىم جوق ەكەنىن جەتكىزدىم. سي تسزينپين مەنەن قانشا قارجى قاجەت ەكەنىن سۇرادى. مەن سومانى اتادىم، ول ءبولدى. وسىلايشا ءبىز ءوز راكەتامىزدى جاسادىق »، - دەپ حابارلادى. بۇل ۆيدەو ءجۋرناليستىڭ YouTube كانالىندا جاريالاندى.
الەكساندر لومانوۆتىڭ ايتۋىنشا، قىتاي مۇنداي سەرىكتەستى ەڭ الدىمەن ءوز بەدەلى ءۇشىن جاسادى.
«قىتاي بۇل ىنتىماقتاستىقتان كوپ اقشا الماسا دا، قىتاي قارۋى پوستكەڭەستىك رەسپۋبليكالاردىڭ نارىعىنا ەندى. ول رەسەي مەن ەۋروپانىڭ تۇيىسكەن جەرىندە ساتىلادى. بۇل قىتايدىڭ بولاشاقتا دامۋى ءۇشىن وتە ماڭىزدى»، - دەپ اتاپ ءوتتى ساراپشى.
ەستەرىڭىزگە سالا كەتسەك، بۇل قىتايدىڭ بەلارۋسكە قارجىلىق كومەك كورسەتىپ وتىرعان العاشقى جاعدايى ەمەس.
وتكەن جىلدىڭ جەلتوقسان ايىندا مينسك پەكينمەن 500 ميلليون دوللار نەسيە تۋرالى كەلىسكەن بولاتىن. بەلارۋس قارجى مينيسترلىگىنىڭ حابارلاماسىندا الىنعان قاراجاتتى كەز كەلگەن ماقساتتا پايدالانۋعا بولاتىنى ايتىلدى.
ال بۇعان دەيىن مينسك ماسكەۋدەن ءدال وسىنداي نەسيە الۋدى جوسپارلاعان ەدى. رەسەي پرەزيدەنتىنىڭ ءباسپاسوز حاتشىسى دميتري پەسكوۆتىڭ ايتۋىنشا، وسى ماسەلە كەلىسسوزدەردىڭ كۇن تارتىبىندە بولدى جانە لۋكاشەنكو مەن رەسەي پرەزيدەنتى ۆلاديمير ءپۋتيننىڭ كەزدەسۋىندە تالقىلاندى. ءساۋىر ايىندا رەسەيلىك تاراپ بەلارۋسكە مەملەكەتتىك نەسيە بەرۋگە دايىن ەكەندىگىن جاريالادى، الايدا قازان ايىندا مينسك قارىز المايتىنىن مالىمدەگەن بولاتىن.
ديانا اسان،
«ادىرنا» ۇلتتىق پورتالى
