بەلارۋس پرەزيدەنتى الەكساندر لۋكاشەنكو مينسكىدە ۆەنەسۋەلاداعى جاعدايعا پىكىر ءبىلدىرىپ، اقش تاراپىنان ەلدىڭ پرەزيدەنتىن كۇشتەپ اكەتۋدە تۋىنداعان وقيعالارعا توقتالدى، دەپ حابارلايدى "ادىرنا" ۇلتتىق پورتالى بەلتا-عا سىلتەپ.
لۋكاشەنكونىڭ ايتۋىنشا، بەلارۋستە مۇنداي ستسەناريدىڭ قايتالانۋى مۇمكىن ەمەس. ول وتكەن جىلى وتكەن قاۋىپسىزدىك كەڭەسىنىڭ وتىرىسىن ەسكە سالدى.
«وتكەن جىلى قاۋىپسىزدىك كەڭەسىندە “ەگەر پرەزيدەنت بولماي قالسا نە بولادى؟” دەگەن جاعدايعا بايلانىستى رولدەردى ءبولىپ قويعانبىز. بۇگىن قاراساق، ءدال تاپقاندايمىز. سوندىقتان ۆەنەسۋەلا نۇسقاسى بەلارۋستە نەرەال. ءتىپتى ونداي جاعداي بولا قالسا دا، بىزدە ءبارى الدىن الا قاراستىرىلعان»، – دەدى ول.
بەلارۋس باسشىسى ۆەنەسۋەلاداعى وقيعالاردا كەلىسىم مەن ساتقىندىق بولعانىن اتاپ ءوتتى.
«امەريكالىقتار قالاعانىنىڭ ءبارىن پرەزيدەنتتى كۇشتەپ اكەتپەي-اق جاساۋعا بولاتىن ەدى»، – دەدى لۋكاشەنكو.
سونىمەن قاتار ول قوعام مەن بيلىك ەليتاسىنىڭ جاۋاپكەرشىلىگىن ەرەكشە اتاپ ءوتتى.
«بۇعان جول بەرمەۋ ءۇشىن ارقايسىمىز ءوز ورنىمىزدى ءبىلىپ، قولدان كەلگەننىڭ ءبارىن ىستەۋىمىز كەرەك. قانداي ديكتاتۋرا نەمەسە اۆتوريتاريزم بولماسىن، ءار ادامدى ماجبۇرلەۋ مۇمكىن ەمەس. سوندىقتان ءبىز بۇل الاي-دۇلەي الەمدە الدا جۇرۋگە ءماجبۇرمىز. ەگەر مۇنى تۇسىنسەك، ءبارى دۇرىس بولادى»، – دەپ تۇيىندەدى بەلارۋس پرەزيدەنتى.
