Qytai basşysy Si Szinpin alǧaşqy bolyp Aleksandr Lukaşenkony prezidenttık sailaudaǧy jeŋısımen qūttyqtady.
«Qytai ükımetı men qytai halqynyŋ atynan, sondai-aq jeke özımnıŋ tarapymnan qūttyqtaular men ızgı tılekterımdı bıldırgım keledı. Belarus memleketı sızdıŋ basşylyǧyŋyzben tamaşa jetıstıkterge jetetınıne senımdımın », - delıngen jedelhatta.
QHR prezidentı Qytai-Belarus qatynastaryn damytuǧa ülken män beretının, ärı Lukaşenko ekeuınıŋ arasyndaǧy jeke dostyqty baǧalaitynyn jetkızdı.
Osyǧan deiın Lukaşenko öz halqyna joldaǧan ündeuınde QHR-men dostyq qarym-qatynasta ekenın erekşe atap ötken edı.
«Belarus memleketı - Euraziia ortalyǧyndaǧy jalǧyz tynyş jer. Resei bızdı odaqtas retınde joǧaltyp aludan qorqady, al Europa öz qyzyǧuşylyǧyn tanytyp otyr. Qytai elımızdı özınıŋ dosy dep sanaidy», - dedı sol kezde el prezidentı.
Būl ündeuden keiın ekı memleket arasyndaǧy qatynastardyŋ nyǧaiuyna nazar audaryldy.
OAK-tyŋ 10 tamyzda şyqqan aldyn-ala mälımetterı boiynşa, qazırgı prezident Lukaşenko 80,23%, onyŋ basty qarsylasy Svetlana Tihanovskaia 9,90% dauys jinady.
«Lukaşenko qytailyqtarǧa ünemı taǧzym etedı. Onyŋ tüsınıgı boiynşa Qytai Reseiden görı ülken derjava»
Ekonomika joǧary mektebı, älemdık ekonomika jäne halyqaralyq qatynastar fakultetınıŋ dosentı Andrei Suzdalsev lenta.ru-ǧa bergen sūhbatynda «Belarus memleketı Reseidı Qytaiǧa almastyruǧa tyrysyp jatyr»,- dep habarlady. Onyŋ aituynşa, qazırgı taŋda Belarus Qytai elıne qyzyǧuşylyq tanytyp otyr. Sondai-aq, sarapşy Qytaidyŋ eşqaşan bükıl elge tehnikalyq qyzmet körsetpeitının atap öttı.
Al Aziia-Tynyq mūhity aimaǧy zertteu ortalyǧynyŋ jetekşısı Aleksandr Lomanov gazeta.ru saityna bergen sūhbatynda QHR Belarus elın ülgılı serıktes bolǧany üşın taŋdaǧanyn aitty.
Onyŋ pıkırınşe, būl Qytai tarapynan jasalǧan öte sauatty strategiia bolyp sanalady, öitkenı Belarus Pekinge bılıktı jūmysşylardy ūsyna alady, ärı būl memleket Resei jäne Şyǧys Europa elderıne jaqyn ornalasqan. Serıktes bolu arqyly Qytai öz tauarlaryn jäne investisiialyq jobalaryn alǧa jyljytady.
Lukaşenko otandastaryna jasaǧan ündeuınde Resei Federasiiasynyŋ bauyrlastyq qatynastardy serıktestıkke özgertkenın de atap öttı. Suzdalsev aitqandai, Lukaşenko bırneşe ret Resei men Qytai arasyn arandatuǧa tyrysty. Basşy Beijıŋge Mäskeu turaly bırneşe ret şaǧymdandy. Bıraq Resei Federasiiasy da, QHR da mūndai äreketterdı qoldamady.
«Lukaşenko Mäskeuden qarjylyq kömek alu üşın eldı bopsalauǧa tyrysuda», - dedı Suzdalsev.
Qytai memleketı Belaruske qarjylyq kömek körsettı
Lukaşenko jurnalist Dmitrii Gordonǧa bergen sūhbatynda
«Men Si Szinpinmen kezdesudemın. Ol töraǧa bolmaǧan kezdıŋ özınde de bız jaqsy qarym-qatynasta boldyq. Qytai basşysy «Aleksandr Grigorevich, eger sız Qytaidyŋ qaruyna riza bolsaŋyz, bız sızge kömektesemız»,-dedı. Alaida men ony jasauǧa qarajatym joq ekenın jetkızdım. Si Szinpin menen qanşa qarjy qajet ekenın sūrady. Men somany atadym, ol böldı. Osylaişa bız öz raketamyzdy jasadyq », - dep habarlady. Būl video jurnalistıŋ YouTube kanalynda jariialandy.
Aleksandr Lomanovtyŋ aituynşa, Qytai mūndai serıktestı eŋ aldymen öz bedelı üşın jasady.
«Qytai būl yntymaqtastyqtan köp aqşa almasa da, qytai qaruy postkeŋestık respublikalardyŋ naryǧyna endı. Ol Resei men Europanyŋ tüiısken jerınde satylady. Būl Qytaidyŋ bolaşaqta damuy üşın öte maŋyzdy», - dep atap öttı sarapşy.
Esterıŋızge sala ketsek, būl Qytaidyŋ Belaruske qarjylyq kömek körsetıp otyrǧan alǧaşqy jaǧdaiy emes.
Ötken jyldyŋ jeltoqsan aiynda Minsk Pekinmen 500 million dollar nesie turaly kelısken bolatyn. Belarus Qarjy ministrlıgınıŋ habarlamasynda alynǧan qarajatty kez kelgen maqsatta paidalanuǧa bolatyny aityldy.
Al būǧan deiın Minsk Mäskeuden däl osyndai nesie aludy josparlaǧan edı. Resei prezidentınıŋ baspasöz hatşysy Dmitrii Peskovtyŋ aituynşa, osy mäsele kelıssözderdıŋ kün tärtıbınde boldy jäne Lukaşenko men Resei prezidentı Vladimir Putinnıŋ kezdesuınde talqylandy. Säuır aiynda reseilık tarap Belaruske memlekettık nesie beruge daiyn ekendıgın jariialady, alaida qazan aiynda Minsk qaryz almaitynyn mälımdegen bolatyn.
Diana ASAN,
«Adyrna» ūlttyq portaly
Ūqsas jaŋalyqtar
