جۇيەدەگى جۇگەنسىزدىك

2648
Adyrna.kz Telegram

مەملەكەتتىك شەكارا كۇزەتىنىڭ ەرەجەلەرىن بۇزعانى ءۇشىن سوتتى بولعان ۇقك شەكارا قىزمەتىنىڭ وفيتسەرىن  جوعارعى سوت اقتاپ شىعاردى. ال اقتالعان وفيتسەرگە  جالا جاپقان مويور مەدەت قوجاحمەتوۆ تارتىپتىك جازاعا دا تارتىلمادى.

قىلمىستىق ءىس ماتەريالىندا بىلاي دەپ ايتىلعان: 2017 جىلدىڭ 27 جەلتوقسانىندا كاپيتان جىبەك تۇرىسبەكوۆا الماتى حالىقارالىق ءاۋجايىندا «ەلدەن شىعۋعا جولى جابىلعان ليۋدميلا وسيپوۆاعا شەكارادان كەدەرگىسىز ءارى زاڭسىز وتۋىنە رۇقسات بەرگەن، سونىڭ سالدارىنان مەملەكەتتىڭ قاۋىپسىزدىك مۇددەسىنە ەلەۋلى زيان كەلتىرىلۋىنە سەبەپ بولدى...».

قر ۇقك اسكەري  پوليتسياسىنىڭ اعا انىقتاۋشىسى مايور مەدەت قوجاحمەتوۆ سوتقا دەيىنگى تەرگەپ-تەكسەرۋ جۇرگىزۋگە كىرىسكەندە، جىبەك تۇرىسبەكوۆانى  ليۋدميلا وسيپوۆاعا كەدەرگىسىز زاڭسىز شەكارادان وتۋىنە رۇقسات بەرگەن دەپ كۇدىكتەنگەن، بىراق ليۋدميلا وسيپوۆا زاڭسىز شەكارادان ءوتتى دەگەن ايىپ كەسىمى اسكەري پروكۋرورمەن بەكىتىلگەن.

كاپيتان جىبەك تۇرىسبەكوۆانىڭ قورعاۋشىسى ايتمۇحانبەت كەمەلحانوۆ بۇل جەردە  تۇرلى  قىلمىستىق قۇقىقبۇزۋشىلىقتىڭ بەلگىسى بارىن ايتىپ، ءوز رەنىشىن ءبىلدىردى.

– بۇل شاتاسۋ سوتقا دەيىنگى تەرگەپ-تەكسەرۋ كەزەڭىندە جاسالعان، بىراق انىقتاۋدىڭ بارىسىن قاداعالايتىن اسكەري پروكۋرور مەن سوتتىڭ ەكى ساتىسى دورەكى قۇقىق بۇزۋشىلىقتارعا ەشقانداي دا نازارلارىن اۋدارماعان. سوتتا  جىبەك تۇرىسبەكوۆا كىناسىن مويىندادى دەپ كورسەتكەن، بىراق بۇل ولاي ەمەس ارينە: ول، ياعني جىبەك تۇرىسبەكوۆا، بىرنەشە رەت ەشقانداي قىلمىس جاساماعاندىعىن ارىزدانىپ ايتقان. سوت سوندا دا كاپيتان جىبەك تۇرىسبەكوۆانى كىنالى دەپ تاۋىپ، ونىڭ تاراپىنان جابىرلەنۋشىلەر وتەماقىسى قورىنا 24 050 تەڭگە تولەتىپ،  سوتتاپ جىبەرگەن.

انىقتاۋ مالىمەتى بويىنشا، كاپيتان جىبەك تۇرىسبەكوۆا، ازاماتتىق سوت شەڭبەرىندە  شەتەلگە شىعۋعا تىيىم سالىنعانىنا قاراماستان، ليۋدميلا وسيپوۆاعا يندياعا ۇشۋعا رۇقسات بەرگەن. جىبەك تۇرىسبەكوۆانىڭ قورعاۋشىسى ايتمۇحانبەت كەمەلحانوۆ وسيپوۆانىڭ ءىسى بويىنشا  ەشقانداي سوت شەشىمى جوق ەكەنىن سوتتا دالەلدەپ شىقتى. تەك قانا كولىك سالىعى بويىنشا 562 716 تەنگە سوماداعى بەرەشەكتى ءوندىرىپ الۋ جايلى سالىق بۇيرىعى (بۇل بۇيرىق سوت شەشىمىنىڭ كۇشىن يەلەنبەيدى  - اۆت.) بولعان ەكەن.

بىراق، قوس سوت ساتىسى اتالعان انىق جايدى ەسەپكە الماعان. سونىمەن قاتار، شەكارادان ليۋدميلا وسسيپوۆا وتكەنىنە دە نازار اۋدارماعان، ويتكەنى – «رەگۋلا 7024» تەحنيكالىق قۇرالى  وسيپوۆانىڭ پاسپورتىنداعى اتاتەگىن ەكى «س» ارىپىمەن اعىلشىن جانە ورىس تىلدەرىندە وقىعان، ال ونداي اتاتەگى بار كىسىگە «بۇركىت» بازاسى ەشقانداي دا قۇقىقتىق شەكتەۋ قويماعان.

– «بۇركىت» بازاسى جايلى  بولعان دەرەكتى بىرنەشە كۋاگەرلەر راستاعان، ال تەرگەۋ مەن سوت  جىبەك تۇرىسبەكوۆانى «مەملەكەتتىڭ قاۋىپسىزدىك مۇددەسىنە» ەلەۋلى زيان كەلتىردى دەپ ساناعان. بۇل – جەڭىلىرەك ايتساق، ساندىراق نەمەسە ماعىناسىزدىق! –  دەيدى قورعاۋشى ا.ج.كەمەلحانوۆ.

ءارى قارايعى قىزىققا توقتالساق. جىبەك تۇرىسبەكوۆانى ايىپتاعان  انىقتاۋشى م.قوجاحمەتوۆ قىزمەتىنىڭ پارىزى بويىنشا، ليۋدميلا وسيپوۆانىڭ مەملەكەتتىك شەكارانى زاڭسىز ءوتۋى دەرەگى بويىنشا تاعى ءبىر قىلمىستىق ءىس قوزعاۋعا مىندەتتى ەتىن. بىراق، ول ل.وسيپوۆاعا قاتىستى قىلمىستىق ءىس قوزعامادى. وندا نە ءۇشىن كاپيتان ج.تۇرىسبەكوۆا سوتتالدى دەگەن سۇراق تۋىندايدى؟

قورعاۋشى ا.ج.كەمەلحانوۆ جوعارعى سوتقا سوت كەسىمدەرىنەن باس تارتۋ جانە قىلمىستىق ءىستى توقتاتۋ جايلى ءوتىنىش ءبىلدىردى. باس پروكۋراتۋرا تاراپىنان دا ج.تۇرىسبەكوۆانىڭ ءىس-ارەكەتتەرىندە قىلمىس قۇرامى جوقتىعىنا باسا نازار اۋدارىلىپ،  كاسساتسيالىق شاعىمدانۋ ءتۇسىرىلدى. ءسويتىپ، بۇل قىلمىستىق ءىستى جوعارعى سوتتىڭ قىلمىستىق ءىس بويىنشا سوت القاسىنىڭ توراعاسى ابدراشيت جۋكەنوۆ باستاعان ءۇش تورەشى دەپ اتالاتىن ۇجىم قاراپ شىعىپ، سوت ۇكىمىنىڭ كۇشىن جويدى.

"...جوعارعى سوت القاسى مىنا قورىتىندىعى  كەلدى، جىبەك تۇرىسبەكوۆانىڭ ءىس-ارەكەتتەرىندە  قىلمىس قۇرامى جوقتىعىنا بايلانىستى، وعان قاتىستى سوت ۇكىمىنىڭ كۇشىن جويادى", - دەلىنەدى جوعارى سوتتىڭ شەشىمىندە.

دەمەك، جىبەك تۇرىسبەكوۆا تەرگەۋ مەن سوتتىڭ زاڭسىز ءىس-ارەكەتتەرى مەن كەلتىرىلگەن زيانداردان وڭالتىلۋعا جانە زياندى وتەپ الۋعا قۇقىعى بار دەگەن ءسوز. ءوز قۇقىقتارىن پايدالاندى دا. جىبەك تۇرىسبەكوۆا ارنايى قىزمەت مايورى مەدەت قوجاحمەتوۆتى قىلمىستىق جاۋاپكەرشىلىككە تارتۋ ءۇشىن، ءىىم وڭتۇستىك ايماقتىق اسكەري تەرگەۋ باسقارماسى باستىعىنىڭ اتىنا ارىز ءتۇسىردى.

– انىقتاۋشى م.قوجاحمەتوۆ، مەنىڭ كىنالى ەمەستىگىمدى الدىن-الا بىلە تۇرا، سوندا دا قىلمىستىق ءىس قوزعادى، – دەيدى جىبەك تۇرىسبەكوۆا. – مەنىڭ پىكىرىم: انىقتاۋشى، الماتى گارنيزونىنىڭ اسكەري پروكۋرورىن الداپ سوعىپ، ماعان قاتىستى جالعان قىلمىستىق ءىستى سوتقا جىبەرگىزدى، سونىڭ سالدارىنان مەنى سوتتىڭ قوس ساتىسى دا زاڭسىز سوتتاپ جىبەردى. مورالدىق جانە ادامگەرشىلىك تۇرعىدا ازاپ شەگۋىمدى ايتپاعاندا، مەنىڭ كونستيتۋتسيالىق قۇقىعىم، بوستاندىعىم، ار-وجدانىم تاپتالدى، – م.قوجاحمەتوۆ، ونىڭ ۇستىنە ماعان سوتتالعان دەگەن اتتى دا ءىلدى. سونىمەن قاتار، قىزمەتتەن دە ىسىنە جاۋاپسىز دەگەن جامان اتپەن قۋىلدىم، وتباسىم ءومىر ءسۇرۋ قاراجاتىنان دا ايىرىلدى. جوعارى سوتتىڭ، باس پروكۋراتۋرانىڭ ادىلەتتى شەشىمىنىڭ، قورعاۋشى ا.كەمەلحانوۆ اعامىزدىڭ وتە جوعارى بىلىكتىلىگىنىڭ، كاسىبيلىگىنىڭ جانە ادامگەرشىلىگىنىڭ ارقاسىندا اقتالىپ شىقتىم. ال مەن ەندى بولاشاقتا وسىنداي زاڭسىز جاعدايلاردى بولدىرماۋ ءۇشىن،  اعا انىقتاۋشى م.قوجاحمەتوۆ ءوزىنىڭ ىستەگەن زاڭسىز ارەكەتىنە بايلانىستى زاڭ الدىندا قاتاڭ جاۋاپ بەرۋى ءتيىس دەپ سانايمىن.

 

قارجى مينيسترلىگى بيۋدجەتتىك باعدارلاما اكىمشىلىگى رەتىندە جانە بيۋدجەتتىڭ يەسى بولا تۇرا، زاڭ كۇشىنە ەڭگەن سوتتىڭ زاڭدى شەشىمى بار بولعانىنا قاراماستان، وسى ءىس بويىنشا، بۇگىنگى كۇنگە دەيىن قىلمىستىق قۋدالاۋ ورگاندارىمەن كەلتىرىلگەن  مورالدىق جانە ماتەريالدىق زياننىڭ قارجىلاي تۇردەگى  وتەماقىسىن، ءار ءتۇرلى سەبەپتەرمەن بۇركەمەلەپ  تولەمەي وتىر. سونىمەن قاتار، جاساعان زاڭسىز ارەكەتتەرىنە ساي اعا انىقتاۋشى م.قوجاحمەتوۆقا دا، ءبىرىنشى ساتى سوتىنىڭ تورەشىسى د.الياسقاروۆقا دا ەشقانداي شارا دا، جازا دا قولدانعان تۋرالى اقپارات جوق.

ازىرگە جىبەك تۇرىسبەكوۆانىڭ بۇرىنعى قىزمەتىنە ورالعانى عانا كوڭىلىنە مەدەۋ بولىپ تۇر.

جاسۇلان ءناۋرىزالى،

«ادىرنا» ۇلتتىق پورتالى

پىكىرلەر