بۇل جونىندە قالا اكىمى مۇرات ايتەنوۆتىڭ ازاماتتاردى ونلاين قابىلداۋ بارىسىندا ءمالىم بولدى. قابىلداۋعا جازىلعان قالا تۇرعىنى مينتاەۆا گۋليا اسار-2 شاعىن اۋدانىنا اۋىز سۋ جۇيەسىن تارتۋ ماسەلەسىن قوزعادى.
«ءبىزدىڭ شاعىن اۋداننىڭ تۇرعىندار 7 جىلدان بەرى اۋىز سۋدى تاسىپ ىشەدى. اپتاسىنا ءبىر رەت كەلەتىن سۋ تۇرىپ قالادى. بۇل دەنساۋلىققا زيان كەلتىرۋدە. ەڭ ءبىرىنشى وسى ماسەلەنى شەشىپ بەرۋىڭىزدى سۇرايمىز» - دەگەن گۋليا سپاتايقىزى اۋماق تۇرعىندارىنىڭ اتىنان كەلگەنىن جەتكىزدى.
بۇل ماسەلە بويىنشا تۇرعىن ءۇي-كوممۋنالدىق شارۋاشىلىق باسقارماسىنىڭ باسشىسى جولشىبەك شايحسلاموۆ «اسار-2» تۇرعىندارىن ساپالى اۋىز سۋ جۇيەسىمەن قامتاماسىز ەتۋ ماقساتىندا وسى جىلدىڭ ماۋسىم ايىندا قۇرىلىس جۇمىستارى باستالعانىن باياندادى. ونىڭ ايتۋىنشا، جوبا قۇنى 1,5 ملرد تەڭگەنى قۇرايدى. بيىلعا 350 ملن تەڭگە بولىنگەن. بەكىتىلگەن قارجىعا جىلدىڭ سوڭىنا دەيىن 1 مەكتەپ جانە 300 تۇرعىن ءۇي اۋىز سۋ جۇيەسىنە قوسىلادى ەكەن.
- «اسار-2» ەلدىمەكەنىن اۋىز سۋمەن تولىق قامتاسىز ەتۋگە 1,5 ملرد تەڭگە قارجى كەرەك. بۇگىنگى تاڭدا بيۋدجەت جىلدىڭ باسىندا بولىنەتىن بولعاندىقتان، اۋداندى تولىعىمەن اۋىز سۋمەن قامتاماسىز ەتۋ جۇمىستارى ۋاقىتشا توقتاپ تۇر. الايدا، اقشانى ۇنەمدەپ، ءتيىستى جۇمىستاردى جۇرگىزۋگە باعىتتاۋدىڭ ءتيىمدى تۇستارىن قاراستىرامىن. بۇل ماسەلە كەلەسى جىلى تولىق شەشىمىن تابادى» - دەدى مۇرات ايتەنوۆ.
سونداي-اق، سالا باسشىسىنا اۋىز سۋ جۇيەسىن تارتۋدىڭ جوسپارىن قايتا قاراپ شىعۋ جونىندە ناقتى تاپسىرما بەردى.
كەزەكتى وتكەن ونلاين قابىلداۋدا بۇدان وزگە، تاسكەن، تۇران شاعىن اۋداندارىنداعى كۇرمەۋى شەشىلمەگەن ماسەلەلەر كوتەرىلدى. وعان قالا باسشىسى بارلىق ماسەلە كەزەڭ-كەزەڭىمەن شەشىلەتىنىن، جەكە باقىلاۋىندا ەكەنىن ايتتى. سونىمەن قاتار، كەلىپ تۇسكەن وتىنىشتەر بويىنشا اۋدان اكىمدەرى مەن باسقارما باسشىلارىنا ءتيىستى جۇمىستاردى اتقارۋ ءۇشىن تاپسىرمالار جۇكتەدى.
شىمكەنت قالاسى اكىمىنىڭ ءباسپاسوز قىزمەتى
