كەشە، 4 تامىزدا فەيسبۋكتاعى پاراقشامدا جانە «ادىرنا» ۇلتتىق پورتالىندا (https://adyrna.kz/index.php/post/43155), سونداي-اق "قازاق ءۇنى" ۇلتتىق پورتالىندا (https://qazaquni.kz/2020/08/04/149984.html) «كەرەكۋدە كەڭەس اسكەرلەرى دارىپتەلۋدە» اتتى سىن ماقالام جاريالانعان ەدى. وندا قازاقستاننىڭ كۇنتىزبەسىندە جوق كسرو اۋە دەسانتى اسكەرلەرىنىڭ اتاۋلى كۇنى 2 تامىزدا كەڭەس وداعى جاۋىنگەرلەرىن ۇلىقتاۋعا ارنالعان كەشەندى ەسكەرتكىشتىڭ اشىلعانىن جازعانبىز. ءدال سول كۇنى كەرەكۋدەگى كەڭەس دەسانتشىلارىنىڭ قر پرەزيدەنتى ق. توقاەۆتىڭ ەپيدەمياعا بايلانىستى جاريالاعان كارانتين تالاپتارىن اياقاستى ەتە وتىرىپ، ورتالىق كوشەلەردە زاڭسىز شەرۋگە شىققانىن دا ايتقانبىز. ماقالادا كورسەتىلگەن ماسەلەلەر جونىندە «ۇلت تاعدىرى» قوزعالىسىنىڭ وبلىستىق ۇيىمى جانە وتانشىل ازاماتتار پاۆلودار وبلىسىنىڭ اكىمى، وبلىس پروكۋرورى، ۇقك وبلىستىق دەپارتامەنتى مەن وبلىس پوليتسيا دەپارتامەنتىنىڭ باسشىلارىنىڭ اتىنا حات تاپسىردى.
جۇرتشىلىقتىڭ نارازىلىعىن تۋدىرعان ەسكەرتكىش بۇگىن الىنىپ تاستالدى! ەستۋىمىزشە، بۇل كەشەندى ەسكەرتكىش ءتيىستى مەكەمەلەردىڭ رۇقساتىنسىز، مامانداردىڭ كەلىسىمىنسىز دەمەۋشىلەردىڭ قارجىسىنا ورناتىلعان.
ەندى زاڭسىز شارالاردى ۇيىمداستىرعان «پاۆلودار قالاسى جانە پاۆلودار وبلىسى بويىنشا دەسانتتىق باۋىرلاستىق» قوعامدىق بىرلەستىگىنىڭ توراعاسى ۆاسيلي ماسلوۆتىڭ ۇستىنەن قىلمىستىق ءىس قوزعالسا جانە رۇقسات ەتىلمەگەن شەرۋگە شىققان قاتارداعى كوك تەلپەكتىلەر 15 تاۋلىككە قامالىپ، كوشە تازالاۋ ءتارىزدى قوعامدىق جۇمىستارعا جۇمىلدىرىلسا قۇبا-قۇپ دەر ەدىك. بالكىم، سوندا عانا ولار قازاقستان رەسپۋبليكاسىنىڭ زاڭىن قۇرمەتتەۋدى ۇيرەنەدى.
قوعام بەلسەندىلەرىنىڭ ءوتىنىش-تىلەكتەرىنە سەرگەك قاراعان جەرگىلىكتى مەملەكەتتىك ورگاندارعا ريزاشىلىق سەزىمىمىزدى بىلدىرەمىز.
ارمان قاني،
پاۆلودار قالاسى.
