ليۆان استاناسى بەيرۋت قالاسىندا جويقىن جارىلىس ورىن الدى. سالدارىنان بىرنەشە عيمارات قيراپ، مىڭداعان ادام زارداپ شەكتى.
بيلىك وكىلدەرىنىڭ ايتۋىنشا، جارىلىس دانەكەرلەۋ كەزىندە بولعان. اپات پورت قويمالارىنىڭ بىرىندە تاركىلەنگەن 2750 توننا اممياك سەليتراسىنىڭ اسەرىنەن بولۋى مۇمكىن.
ۆيدەودان جارىلىس جۇزدەگەن شاقىرىمعا جوعارىعا كوتەرىلىپ، قانشالىقتى ۇلكەن ايماقتى قامتىعانىن بايقاۋعا بولادى.
جارىلىس سالدارىنان ايەلى مەن قىزى جاراقات العان ليۆان پرەمەر-ءمينيسترى حاسان دياب وقيعاعا كىنالىلەردى تابۋعا ۋادە بەردى. ول «قويمادا التى جىل بويى الدىن-الا شارالار قولدانىلماستان 2750 توننا اممياك سەليتراسىنىڭ ساقتالۋى مۇمكىن ەمەس»، - دەدى.
بەيرۋتتا بولعان جارىلىستان 4 مىڭعا جۋىق ادام جاراقات الىپ، 78 ادام قازا تاپتى. بۇل تۋرالى ليۆاننىڭ دەنساۋلىق ساقتاۋ ءمينيسترى حاماد حاسان مالىمدەدى. كوپتەگەن ادامداردىڭ قايدا جوعالعانى بەلگىسىز. ولاردى ىزدەستىرۋ تۇنگى ۋاقىتتا ەلەكتر قۋاتىنىڭ وشۋىنە بايلانىستى قيىندىق تۋعىزعان.
قر ءسىم-ءنىڭ مالىمدەمەسىنە سايكەس، ليۆانداعى قازاقستاندىق كونسۋل جەڭىل جاراقات العان. اپات بولعان ۋاقىتتا ەلشىلىكتىڭ وزگە قىزمەتكەرلەرى جۇمىس كۇنى اياقتالعاندىقتان عيماراتتان شىعىپ كەتكەن. جۇمىس ۋاقىتى بىتكەنىنە قاراماستان كونسۋل ءوز قىزمەتىن جالعاستىرا بەرگەن. جارىلىس، سونىمەن بىرگە، ەلشىلىكتىڭ عيماراتىنا دا زيان كەلتىردى.
ليۆان جوعارعى قورعانىس كەڭەسى بەيرۋت پورتىنداعى جارىلىستان كەيىن شۇعىل جينالىس وتكىزىپ، قالانى اپاتتى ايماق دەپ جاريالادى. جارىلىسقا بايلانىستى كەڭەس مۇشەلەرى ۇكىمەتكە ەلوردادا ەكى اپتاعا توتەنشە جاعداي جاريالاۋدى ۇسىندى.
اياۋلىم ءابىلدا،
“ادىرنا” ۇلتتىق پورتالى
