Lıvan astanasy Beırýt qalasynda joıqyn jarylys oryn aldy. Saldarynan birneshe ǵımarat qırap, myńdaǵan adam zardap shekti.
Bılik ókilderiniń aıtýynsha, jarylys dánekerleý kezinde bolǵan. Apat port qoımalarynyń birinde tárkilengen 2750 tonna ammıak selıtrasynyń áserinen bolýy múmkin.
Vıdeodan jarylys júzdegen shaqyrymǵa joǵaryǵa kóterilip, qanshalyqty úlken aımaqty qamtyǵanyn baıqaýǵa bolady.
Jarylys saldarynan áıeli men qyzy jaraqat alǵan Lıvan premer-mınıstri Hasan Dıab oqıǵaǵa kinálilerdi tabýǵa ýáde berdi. Ol «Qoımada alty jyl boıy aldyn-ala sharalar qoldanylmastan 2750 tonna ammıak selıtrasynyń saqtalýy múmkin emes», - dedi.
Beırýtta bolǵan jarylystan 4 myńǵa jýyq adam jaraqat alyp, 78 adam qaza tapty. Bul týraly Lıvannyń densaýlyq saqtaý mınıstri Hamad Hasan málimdedi. Kóptegen adamdardyń qaıda joǵalǵany belgisiz. Olardy izdestirý túngi ýaqytta elektr qýatynyń óshýine baılanysty qıyndyq týǵyzǵan.
QR SIM-niń málimdemesine sáıkes, Lıvandaǵy qazaqstandyq konsýl jeńil jaraqat alǵan. Apat bolǵan ýaqytta elshiliktiń ózge qyzmetkerleri jumys kúni aıaqtalǵandyqtan ǵımarattan shyǵyp ketken. Jumys ýaqyty bitkenine qaramastan konsýl óz qyzmetin jalǵastyra bergen. Jarylys, sonymen birge, elshiliktiń ǵımaratyna da zııan keltirdi.
Lıvan Joǵarǵy qorǵanys keńesi Beırýt portyndaǵy jarylystan keıin shuǵyl jınalys ótkizip, qalany apatty aımaq dep jarııalady. Jarylysqa baılanysty keńes músheleri úkimetke elordada eki aptaǵa tótenshe jaǵdaı jarııalaýdy usyndy.
Aıaýlym ÁBILDA,
“Adyrna” ulttyq portaly
