بۇۇ وكىلدەرى COVID-19 ىندەتىنىڭ تارالۋىن ازايتۋ ماقساتىندا قازاقستانداعى كەدەيلەرگە ۋاقىتشا 60 مىڭ تەڭگەدەن جاردەماقى بەرىپ، ۇيدە وتىرا بەرۋىن قامتاماسىز ەتۋدى ءجون سانايدى. بۇل تۋرالى بۇۇ-نىڭ دامۋ باعدارلاماسىندا ايتىلىپتى.
بايانداما اۆتورلارى قازاقستاندىق كەدەي وتباسىلاردى اشتان ساقتاۋدىڭ بىرنەشە نۇسقاسىن ۇسىنعان. ءبىرىنشى نۇسقا بويىنشا ۇسىنىلاتىن اقشا كولەمى كەدەيلىكتىڭ شەگىنەن شىعۋعا كومەكتەسپەيدى دەگەن ساراپشىلار ەكىنشى نۇسقا بويىنشا كورسەتىلگەن ورتاشا ءومىر سۇرۋگە جەتەتىن سومانى كورسەتىپتى.
بۇۇ ساراپشىلار ايتقان ءبىرىنشى نۇسقا -$136,91, ياعني 56 600 تەڭگە. ال ەكىنشىسى -$150,23, ياعني تەڭگەمەن 62 200. سونىمەن قاتار بايانداما اۆتورى پاندەميا كەزىندە اسىرەسە، رەسمي جۇمىس ىستەمەيتىن ادامداردىڭ، بوسقىندار مەن ميگرانتتاردىڭ مەملەكەت تاراپىنان بەرىلەتىن كومەكتەردەن قۇر قالعانىن، اناعۇرلىم ارتىق زارداپ شەككەنىن العا تارتادى. وسىعان بايلانىستى حالىقارالىق ۇيىم 132 دامۋشى ەلدەردەگى 2,7 ملرد ادامدى مەملەكەت تاراپىنان ۋاقىتشا قارجىلاي كومەك كورسەتۋگە شاقىرادى. بۇل كەدەيلەر سانى كوپ دەگەن جۇزدەگەن ەلدىڭ قاتارىندا قازاقستان دا بار.
حالىقارالىق ۇيىمنىڭ مىناداي ۇسىنىسىن قازاق بيلىگى نازارعا الا قويار ما ەكەن؟ سەبەبى، كارانتين سالدارىنان اقشاسىز، جۇمىسسىز ۇيىندە قامالعان حالقىنا 42 500 تەڭگەنىڭ ءوزىن ارەڭ بەردى. وندا دا بۇل اقشانىڭ باسىم بولىگى «ۇستاعاننىڭ قولىندا، تىستەگەننىڭ اۋزىندا» كەتتى.
ماسەلەن، العاش رەت 42 500 تەڭگە تاعايىندالعاندا، وسى اقشانى الۋشىدان گورى، قولى جەتپەگەندەر كوپ بولدى. دەسەك تە، 4,5 ملن قازاقستاندىققا 42 500 تەڭگە بەرىپ، قارىق قىلدىق دەگەن قازاق بيلىگى بيىلعى شىلدە ايىندا وسى اقشانى تاعى ءبىر رەتتەن بەرىلەتىنىن حابارلادى. بۇل جولى دا، الدىڭعى جاعداي تاعى قايتالانۋدا. المادىق دەگەندەردىڭ قاراسى مول.
حالقىنا 42 500 تەڭگەنى تەڭ ۇلەستىرە الماي وتىرعان قازاقستان «بۇۇ-نىڭ بايانداماسىنا سايكەس» دەپ حالقىنا الپىس مىڭ تەڭگەدەن تاراتىپ بەرە قويماسى انىق. دەسەك تە، دامىعان وتىز ەلدىڭ قاتارىنا كىرەمىز دەپ جۇرگەندە، كەدەي ەلدەردىڭ قاتارىنان ءبىر-اق شىققانىمىز وتە وكىنىشتى.
مەرۋەرت حۋساينوۆا،
«ادىرنا» ۇلتتىق پورتالى.
