بەلسەندى رۋسلان جانپەيىسوۆ (شىن ەسىمى - بەيبارىس رايىمبەكوۆ) ءبىر جىلعا باس بوستاندىعىنان ايىرىلدى، - دەپ حابارلايدى شىمكەنت قالاسى سوتىنىڭ ءباسپاسوز قىزمەتىنە سىلتەمە جاساعان "ادىرنا" پورتالى.
30 شىلدەدە رۋسلان جانپەيىسوۆكە قاتىستى سوت ۇكىمى شىقتى. ول جابىرلەنۋشىنىڭ دەنساۋلىعىنا ورتاشا اۋىر دارەجەدە زيان كەلتىردى، سونداي-اق بيلىك وكىلىنە ءتىل تيگىزدى، تەلەكوممۋنيكاتسيا جەلىسىندە بەينە جازبالار تاراتتى دەگەن ايىپتار بويىنشا كىنالى دەپ تانىلدى.
سونداي-اق سوت جابىرلەنۋشى تاراپتىڭ تالابىن دا قاناعاتتاندىرىپ، جانپەيىسوۆتەن 550 مىڭ تەڭگە ءوندىرىپ الدى.
ء"ىستى قاراۋ بارىسىندا سوت ايىپتالۋشىنىڭ تاپانشا سياقتى اەروزول قۇرالىن پايدالانىپ، جابىرلەنۋشىنىڭ كوزىنە وق اتقانى انىقتالدى. سالدارىنان جابىرلەنۋشىنىڭ ەكى كوزى حيميالىق كۇيىك الىپ، ونىڭ كورۋ قابىلەتى تومەندەگەن. اەروزول قۇرالىنىڭ قۇرامىندا بۇرىش بولعان. سونداي-اق، ول قوعامدىق ورىندا ك. ەسىمدى پوليتسيا قىزمەتكەرىنە ءتىل تيگىزىپ، ونىڭ ۆيدەوسىن ينتەرنەتكە جۇكتەگەن", - دەلىنگەن حابارلامادا.
سوت وتىرىسى بارىسىندا جانپەيىسوۆ جابىرلەنۋشىنىڭ دەنساۋلىعىنا زيان كەلتىردى دەگەن ايىپقا قاتىستى ءوز كىناسىن مويىنداعان جوق. سوت بەلسەندىنىڭ وسىعان دەيىن دە زاڭ بۇزعانىن ەسكەرگەن.
"سوت ايىپتالۋشى مەن ونىڭ ادۆوكاتىنىڭ جابىرلەنۋشىنىڭ بەتىنە امالسىزدان وق اتقانىن جانە جابىرلەنۋشى وعان قارسى زاڭسىز ارەكەتتەردى جاساعانى تۋرالى دالەلدەرىن ەسكەرگەن جوق. وسى جانە باسقا دا ايىپتاۋلار سوت بارىسىندا تەكسەرىلدى. كۋاگەردىڭ، جابىرلەنۋشىنىڭ كۋاگەرلىك ەتۋى، ۆيدەو، سوت ساراپتامالىق قورىتىندىسى نەگىزىندە ايىپتالۋشىنىڭ دالەلدەرى تەرىسكە شىعارىلدى", - دەيدى سوتتىڭ ءباسپاسوز قىزمەتى.
