ەلىمىزدە ەنگىزىلگەن توتەنشە جاعداي كەزىندە شىمكەنت قالاسىنىڭ اكىمى مۇرات ايتەنوۆتىڭ تاپسىرماسىمەن ەمحانالارى جانىنان تاۋلىك بويى جۇمىس ىستەيتىن 58 ءموبيلدى توپ قۇرىلعان بولاتىن.
ازاماتتاردىڭ قاۋىپسىزدىگىن ەسكەرە وتىرىپ، مۇرات دۇيسەنبەكۇلى ءموبيلدى بريگادالار سانىن الىدە ارتتىرۋ قاجەتتىگىن ايتقان بولاتىن. سول سەبەپتى، ولاردىڭ سانى بۇگىندە 197-گە جەتتى. بۇل تۋرالى شىمكەنت قالاسىنىڭ دەنساۋلىق ساقتاۋ باسقارماسى باسشىسىنىڭ مىندەتىن اتقارۋشىسى تيميرحان ۆارزيلوۆ اقپاراتتىق-كوممۋنيكاتسيالىق ورتالىعىندا وتكەن بريفينگتە مالىمدەدى.
«شىمكەنت قالاسىنداعى ەمحانالار جانىندا بۇعان دەيىن 58 ءموبيلدى توپ جۇمىس ىستەپ كەلگەن بولسا، بۇگىندە ونىڭ سانى 197 جەتتى. ولارمەن 16-مىڭعا جۋىق ناۋقاسقا ۇيگە ارنالعان ستانتسيونارلىق قىزمەت كورسەتىلگەن. سونىمەن بىرگە 45 مىڭ پاتسيەنتكە ءموبيلدى بريگادا قىزمەتى ارقىلى ۇيلەرىنە ءدارى-دارمەك جەتكىزىلدى. اتقارىلعان جۇمىستار قالاداعى ەپيدەميولوگيالىق جاعدايدىڭ جاقسارۋىنا ءوز اسەرىن تيگىزدى. ناقتىراق ايتقاندا، جەدەل جاردەم كومەگىن شاقىرتۋشىلار سانى كۇنىنە 38 پايىزعا ازايدى»،-دەدى ت. ۆارزيلوۆ.
سونداي-اق بريفينگتە سالاعا جاۋاپتىلار ستانتسيونارلاردا ەم الۋشى ناۋقاستاردىڭ سانى كۇرت تومەندەگەنىن مالىمدەدى. سوڭعى ون كۇننىڭ ىشىندە ناۋقاستار سانى 2882-دەن 1240-قا دەيىن ازايعان. ناتيجەسىندە ستانتسيونارلارداعى توسەك ورىننىڭ جۇكتەمەسى 78,7 پايىزدان 33 پايىزعا دەيىن كەمىپ وتىر.
شىمكەنت
