تالعار اۋدانىنىڭ اكىمى جولان وماروۆ قايتىس بولدى. بۇل تۋرالى بەلگىلى قالامگەر جاناربەك ءاشىمجان ءوزىنىڭ فەيسبۋك پاراقشاسىندا جازدى.
"جولى دا，جالى دا，جونى دا بولەك جولانىم-اي... ارىسىم-اي... باتىرىم-اي... كەيىنگى بۋىننىڭ ىشىندە وزا شاۋىپ，ەلدىڭ كوشىن باستاعان ساناۋلى ساڭلاق ەدىڭ. كەگەن-رايىمبەك اۋدانىن ساتىمەن تۇلەتىپ，تالعار حالقىن دا رەتىمەن قۋانتىپ كەلە جاتىر ەدىڭ عوي...
سەنىم مەن ۇمىتتىڭ，جاۋاپكەرشىلىك پەن ناتيجەنىڭ قادىرىن ارتتىرعان，ەل-حالىقتىڭ جاعدايىنان باسقا ۋايىمىڭ جوق ەدى. ناعىز كەمەلىڭە كەلگەن شاعىڭ ەدى，جاساعان بەرگەن جان باۋىرىم-اي. ءىنىم-اي！اڭقىلداعان اقجۇرەگىم！بالداعى التىن سەمسەرىم-اي！
... نەشە كۇننەن بەرى جۇرەگىم سۋىلداپ ءجۇر ەدى. دۇعا تىلەپ ەدىم. "جاماندىقتىڭ الدىن جاقسى جاڭالىقتار الادى" دەپ，كوڭىلدى نوتالارمەن نازاردى باسقا جاققا بۇرۋعا تىرىسىپ باعىپ ەدىك... "جولانتاي，باتىر عوي，بارىن جەڭىپ تىك تۇرىپ كەتسە ەكەن" دەپ قۇداي تاعالادان تىلەپ ەدىك.
سەنى كورگەن سايىن القىمىن اپپاق ساقالى جاپقان 80-90-داعى الىپ ابىز قاريا كوز الدىما كەلەتىن ەدى.
قوس وكپەڭ ەشقاشان القىنباپ ەدى عوي，القىنسا دا ەلدىك ىستەردا عانا القىناتىن ەدى عوي... اتىڭ وشكىر قۋ ىندەت. ىرگەمدى قيراتىپ كەتكەنىڭ-اي...
كورمەگەن كوشەڭدە جاراتقان يەم پاناسىنا السىن，جارىعىم. يمان نۇرىڭ پەيىشتىڭ تورىندە شالقىسىن. قانداي قيىن... مەملەكەتكە كەرەك ەڭ ساپالى ازاماتتاردىڭ ءبىرى كەتتى ارامىزدان" دەگەن جازبا قالدىرعان جاناربەك ءاشىمجان.
ارتىنان "بۇگىن تاڭەرتەڭ اۋدان اكىمى جولان وماروۆ پنەۆمونيادان قايتىس بولدى. جولان ىبىراياقىنۇلى 1979 جىلى تۋعان. تۋىستارى مەن جاقىندارىنا قايعىرا كوڭىل ايتامىز", - دەپ اۋداندىق اكىمدىك تە حابارلادى.
"ادىرنا" ۇلتتىق پورتالى
