ەستە ساقتاۋ قابىلەتى تۇراقتى ەمەس. ادامنىڭ جاسى كەلە ول ناشارلاي بەرەدى. الايدا بۇل قابىلەتتى تابيعي جولمەن جاقسارتۋعا بولاتىنىن ۇمىتپاۋ كەرەك.
قانتتى از پايدالانىڭىز
قانتتى شامادان تىس تۇتىنۋ ەستە ساقتاۋ قابىلەتىنىڭ بۇزىلۋىنا اسەر ەتەدءى. تەڭگەرىمسىز تاماقتانۋ ميدىڭ كولەمىنىڭ ازايۋىنا اكەلۋى مۇمكىن. راتسيونداعى قانت مولشەرىن ازايتۋ وسىنداي پروبلەمالاردى بولدىرماۋعا كومەكتەسەدى جانە تۇتاستاي العاندا دەنساۋلىققا وڭ سەپتىگىن تيگىزەدى.
بالىق مايىن جەپ تۇرىڭىز
بالىق مايى ومەگا-3 قانىقپاعان ماي قىشقىلدارىنا، سونىڭ ىشىندە ەيكوساپەنتاەنويد پەن دوكوزاگەكساەنويدكە باي. ول جۇرەك اۋرۋلارىنىڭ پايدا بولۋ قاۋپىن تومەندەتەدى . بالىق پەن بالىق مايىن جەۋ اسىرەسە قارت ادامداردىڭ ەستە ساقتاۋ قابىلەتىن جاقسارتا الادى.
مەديتاتسياعا ۋاقىت تابىڭىز
مەديتاتسيا ادامدى تىنىشتاندىرىپ، قان قىسىمىن تۇسىرەدى. ول نەگىزىنەن قىسقا مەرزىمدى جادتى جاقسارتادى. عالىمدار تايۆان كوللەدجىنىڭ ستۋدەنتتەرىنە تاجىريبە جاساپ، مەديتاتسيا جاساعان ستۋدەنتتەردىڭ جاساماعاندارعا قاراعاندا كەڭىستىكتىك جۇمىس جادى ەداۋىر جاقسىراق بولعاندىعىن انىقتادى.
سالماعىڭىزدى قاداعالاڭىز
سەمىزدىك - بۇل تانىمدىق قۇلدىراۋدىڭ قاۋىپتى فاكتورى. ارتىق سالماق ادامنىڭ ميىنا كەرى اسەر ەتەدى. زەرتتەۋشىلەر 18 جاستان 35 جاسقا دەيىنگى ادامدارعا ەستە ساقتاۋ قابىلەتىن انىقتاۋعا ارنالعان تەست جۇرگىزدى. ناتيجەسىندە دەنەدەگى ارتىق سالماق ماسساسى جادتىڭ بۇزىلۋىنا اكەلەتىنىن دالەلدەدى. سونىمەن قاتار سەمىرۋ التسگەيمەر اۋرۋىنىڭ پايدا بولۋىنا اسەر ەتەدى.
ۇيقىڭىزدى قاندىرىڭىز
از ۇيىقتاۋ ادامنىڭ ەستە ساقتاۋ قابىلەتىن بۇزادى. ەرەسەك ادام تاۋلىگىنە 7-8 ساعات ۇيىقتاۋ كەرەك. تۇنگى دەمالىس كەزىندە قىسقا مەرزىمدى ەستەلىكتەر ۇزاق مەرزىمدى ەستەلىكتەرگە اينالادى.
ساناڭىزدى جاتتىقتىرىڭىز
سانالىلىق - سىزدىڭ سەزىمدەرىڭىزدى جانە قورشاعان ورتاڭىزدى جاقسى تۇسىنەتىن پسيحيكالىق كۇي. ول مەديتاتسيانىڭ ءبىر بولىگى رەتىندە قولدانىلادى. زەرتتەۋلەر سانانى جاتتىقتىرۋدىڭ سترەسستى ازايتۋعا جانە ەستە ساقتاۋ قابىلەتىن جاقسارتۋعا ءتيىمدى ەكەنىن راستايدى. ول تانىمدىق قۇلدىراۋ قاۋپىن ازايتادى.
الكوگولدى از ءىشىڭىز
الكوگول دەنساۋلىقتىڭ كوپتەگەن اسپەكتىلەرىنە، سونىڭ ىشىندە ەستە ساقتاۋ قابىلەتىنىڭ بۇزىلۋىنا اسەر ەتەدى. كۇنىنە 36 گرامنان ارتىق مولشەردە الكوگولدى پايدالاناتىن ورتا جاستاعى ەر ادامنىڭ ەستە ساقتاۋ قابىلەتى ىشپەيتىندەرگە قاراعاندا التى جىلعا ەرتە تومەندەيدى.
D ءۆيتامينىنىڭ دەڭگەيىن تەكسەرىڭىز
D دارۋمەنى دەڭگەيىنىڭ تومەندەۋىنىڭ جاعىمسىز سالدارىنىڭ ءبىرى - تانىمدىق فۋنكتسيانىڭ ناشارلاۋى. بۇل زاتتىڭ جەتىسپەۋشىلىگى كوبىنەسە سۋىق كليماتى بار ەلدەردىڭ تۇرعىندارىنا ءتان.
دەنەڭىزدى شىنىقتىرىڭىز
بەلسەندى ءومىر ءسۇرۋ ميعا پايدالى. ول كەز-كەلگەن جاستاعى ادامداردىڭ ەستە ساقتاۋ قابىلەتىن جاقسارتۋعا كومەكتەسەدى. كۇندەلىكتى جاتتىعۋ جاساۋ نەيروپروتەكتورلى اقۋىزداردىڭ سەكرەتسياسىن جوعارىلاتادى جانە نەيرونداردىڭ ءوسۋى مەن دامۋىنا اكەلەدى.
قابىنۋعا قارسى ونىمدەردى تاڭداڭىز
قابىنۋعا قارسى تاماقتارعا شاي، جەمىستەر مەن كوكونىستەر جاتادى. ولار يممۋندىق جۇيەنى ىنتالاندىرادى، بوس راديكالداردى كەتىرەدى. جيدەكتەر انتيوكسيدانتتارعا باي.
شوكولاد جەڭىز
شوكولاد ميدىڭ قان اينالىمىن جاقسارتادى. فلاۆونويدتارى بار قارا شوكولادتى جەيتىندەردىڭ جادى انتيوكسيدانتتارى جوق اق شوكولادتى سۇيەتىندەرگە قاراعاندا الدەقايدا جاقسى. ماكسيمالدى پايدا الۋ ءۇشىن قۇرامىندا 70% كاكاو بار شوكولادتى تاڭداۋ كەرەك.
ديانا اسانوۆا، «ادىرنا» ۇلتتىق پورتالى
