سوڭعى كۇندەرى الەۋمەتتىك جەلى قولدانۋشىلارى اسحات ايماعامبەتوۆ تۋرالى جارىسا جازۋدا. ەستەرىڭىزدە بولسا، ءمينيستردىڭ ديسسەرتاتسيالىق جۇمىسىنان شيكىلىك تابىلىپ، سوڭى داۋعا ۇلاسقان ەدى. «ادىرنا» ۇلتتىق پورتالى ايماعامبەتوۆ تۋرالى جەلىلەردە جازىلعان پىكىرلەردى جيناقتادى.
قىدىرالى بولمانوۆ:
الەمدەگى ەڭ ماڭىزدى مينيسترلىك - ءبىلىم جانە عىلىم مينيسترلىگى. وسى ەكەۋى تۇزەلسە عانا قالعانى تۇزەلمەك! قازاق ەلىنىڭ ءبارى ءبىلىم جانە عىلىم ءمينيسترى اسحات ايماعامبەتوۆ باۋىرىمىزدى ءجۇز پايىز قولدايدى. ۇستىمىزدە اللا بار!
بيبىگۇل داۋلەتبەكقىزى:
«الىپپەمىز» بەن «انا ءتىلىن» قايتارىپ بەرگەن ءبىلىم جانە عىلىم ءمينيسترى اسحات ايماعامبەتوۆتە قاي اكەلەرىڭنىڭ اقىسى كەتتى، ايتىڭدارشى ماعان، اينالىپ كەتەيىندەر!؟ سەندەرگە ەشكىم جاقپادى-اۋ... ءدال قازىر 37 جىل قايتا كەلسە، ايماعامبەتوۆتى وتباسىمەن قۇرتىپ جىبەرۋگە دايىن وتىرسىڭدار عوي تەگى... سەندەردىڭ پەيىلدەرىڭ مەن نيەتتەرىڭنەن قورقايىن دەدىم. ايماعامبەتوۆپەن الىسقانشا، بالەۆيرۋسپەن الىسساڭدارشى!
مۇحتار تايجان:
ءبىلىم ءمينيسترى اسحات ايماعامبەتوۆ ورنىندا قالۋ كەرەك دەپ سانايمىن، دوستار. جاس بولسا دا ويلى، تاجىريبەلى جىگىت. ءبىلىم سالاسىن ناقتى قالاي ارتتىرۋ كەرەك ەكەنىن جوسپارى بار. الىپپەنى قايتارىپ وتىر، ءۇش تۇعىرلى ءتىل دەگەن پالەدەن باس تارتىپ جاتىر، قازاق تاريحىن قايتا ەنگىزىپ وتىر. بۇنداي جاس جانە ساۋاتتى مينيسترلەرگە 5 جىلداي ۋاقىت بەرۋ كەرەك دەپ ويلايمىن. سالانىڭ جەتەكشىسى بولعان سوڭ ءوز جوسپارىن جۇزەگە اسىرسىن، ال وعان ۋاقىت كەرەك. ءبىلىم مينيسترلەرىن جىل سايىن اۋىستىرۋدى دوعارۋ كەرەك. ايتپەسە بالالار مەن اتا-انالار، ستۋدەنتتەر، ءبىلىم جۇيەنىڭ لوگيكاسىز رەفورمالارىنان ابدەن شارشادى.
قايرات جولدىبايۇلى:
اسحات ايماعامبەتوۆ سەكىلدى از عانا ۋاقىتتىڭ ىشىندە مۇنشالىق دەڭگەيدە ەل ىقىلاسىنا بولەنگەن باسقا مينيستر جوق شىعار. حالىق ونى كەشەدەن بەرى جاپاي قولداپ جاتىر. ماعان ونىڭ زيالىلىعى مەن قاراپايىمدىلىعى، ماسەلەنى پوپۋليزمگە نەمەسە الەۋمەتتىك جەلىدەن سوققان جەلگە قاراي ەمەس، ۇزاق مەرزىمدى جەمىستى ناتيجەگە قاراي شەشۋگە تالپىناتىندىعى ۇنايدى. جۇمىس ىستەۋىنە كەدەرگى كەلتىرمەي مۇمكىنشىلىك بەرىلسە، ءبىلىم، عىلىم سالاسىندا تىڭعىلىقتى تالاي رەفورما جاسايتىندىعىنا سەنەمىن.
بايان الاگوزوۆا:
سوڭعى كۇندەرى اسحات ايماعامبەتوۆ الەۋمەتتىك جەلىدە ءجيى تالقىلاناتىن تۇلعاعا اينالدى. كارانتين كەزىندە ءبىز 3 مينيستر تۋرالى عانا كوپ ەستيمىز، دەسە دە جاس ءمينيستردىڭ ءىسى مەنى دە قىزىقتىردى. ول سونشا نە ءبۇلدىرىپ ۇلگەردى؟ ايماعامبەتوۆ ءبىر جىل بۇرىن كەلسە دە، بىرقاتار عىلىمي-زەرتتەۋ ينستيتۋتتارىنىڭ ديرەكتورلارىن اۋىستىردى، ديپلومداردى بىلاي دا بىلاي باسىپ شىعاراتىن جەكە ۋنيۆەرسيتەتتەردى اشكەرەلەدى، ولاردىڭ 40-ى مەملەكەتتىك گرانتتاردان ايىرىلدى، عالىمدارعا دەگەن تالاپتى كۇشەيتىپ ۇلگەردى، الىپپە مەن انا ءتىلىن قايتاردى. ەندى سۇراق: اسحات قاناتۇلى قانشا بەدەلدى ادامنىڭ تىنىسىن تارىلتىپ، جولدارىن كەسىپ ءوتتى؟
ساكەن مايعازيەۆ:
ءبىلىم جانە عىلىم ءمينيسترى اسحات ايماعامبەتوۆتىڭ وقۋ باعدارلاماسىنا "الىپپە" مەن "انا ءتىلىن" قايتارعانىنا قۋانىشىمدا شەك جوق. 2002-جىلدان ەڭبەك جولىن باستاعاننان بەرى ءبىلىم سالاسىندا جۇرگەن اسحاتتاي ءمينيستردىڭ قازىرگى ءبىلىم سالاسىنا جاساپ جاتقان ەڭبەگى مەن وزگەرىستەرىنە جەكە باسىم ءدان ريزامىن! ءوزى وسى سالادا 20 جىلداي ەڭبەك ەتكەننەن كەيىن، ءبىلىم سالاسىندا بولىپ جاتقان كەلەڭسىزدىكتەردى بايقاپ، از ۋاقىتتىڭ ىشىندە جەمىستەرىمەن ءبىزدى قۋانتىپ جاتقان كورەگەندىلىگىنە ءتانتىمىن
ءلاززات كەندەبايقىزى:
ەلىم دەيتىن ەر بولماسا، ەرىم دەيتىن ەل قايدان بولسىن؟! تانىماسام دا، ءبىلىم سالاسىنا ونشا قاتىسىم بولماسا دا، ا.ايماعامبەتوۆ مىرزاعا حالىقپەن بىرگە تىلەۋلەسپىن. حالىقتىڭ قولداۋى-از ۋاقىتتىڭ ىشىندە بولسا دا، ەل ءۇشىن ەتكەن ەڭبەگى زايا كەتكەن جوق دەگەن ءسوز عوي. وسىدان ارتىق قانداي باعا كەرەك؟! حالىقتىڭ ىقىلاسىن، شىنايى باعاسىن اقشاعا دا، ات باسىنداي التىنعا دا ساتىپ الۋ مۇمكىن ەمەس! حالىققا تاپ قازىر كەرەگى- ونىڭ ديسسەرتاتسياسىنىڭ دۇرىس-بۇرىستىعى ەمەس، جۇمىستىڭ كوزىن تاۋىپ، ىستەۋى.
قانات ابىلقايىر:
كوز الدىمىزدا اسحات ايماعامبەتوۆ دەگەن تۇلعا تۋدى. ەندى ول قىزمەتىنەن كەتسە دە، كەتپەسە دە - حالىقتىڭ ۇلى. مۇنداي ابىروي وتىز جىل بيلىك ساحناسىنان تۇسپەي جۇرگەن ەشبىر شال-كەمپىردە جوق.
اقمارال شاتەمىرقىزى:
ءبىز بىلەتىن اسحات ايماعامبەتوۆ - ءوز ءىسىنىڭ مامانى. ناعىز مۇعالىم. مەكتەپ پروبلەماسىنىڭ ازايۋىنا تىكەلەي ادال كۇشىن قوسقان، مۇعالىمدەردىڭ ۇنىنە قۇلاق اسقان، مۇعالىمدەر ورتاسىنان تابىلا بىلگەن، ءبىلىم سالاسىنىڭ ناعىز ءمينيسترى. بارلىق مينيسترلەرگە ۇلگى بولعان مينيستر. ەل باسىنا كۇن تۋعان كەزدە دە ءبىلىم سالاسى توقىراپ قالعان جوق. مۇعالىمدەرمەن، اتا-انالارمەن ءجيى قارىم-قاتىناسقا تۇستى. قيىن ساتتە دە ونلاين بايلانىستا بولىپ، مۇعالىمدەر جۇرەگىنە سەنىم ۇيالاتا ءبىلدى.
قۇرمەتتى وقىرمان، ال ءسىز ءمينيستردىڭ ءوز قىزمەتىندە قالعانىن قولدايسىز با؟
ديانا اسانوۆا، «ادىرنا» ۇلتتىق پورتالى
