كەيدە كينوگەرلەر مەن كورەرمەننىڭ تالعامى ءبىر جەردەن شىعا بەرمەيدى. "سيقىرلى SMM" كىتابى اۆتورىنىڭ ءبىرى ابزال دوسىم ادامداردىڭ تانىمىن ارتتىراتىن ەڭ ۇزدىك 7 كينوسىن اتاپ، ويىمەن ءبولىستى.
1. ينتەرستەللار. رەجيسسەر كريستوفەر نولاننىڭ تۋىندىسى. فيلم عىلىمي فانتاستيكا جانرىندا بولعانىمەن فيلمدەگى بارلىق ارەكەتتەردىڭ عىلىمي نەگىزى بار. سەبەبى ءفيلمنىڭ عىلىمي كونسۋلتانتى - فيزيكا سالاسىندا نوبەل سىيلىعىنىڭ يەگەرى كيپ تورن، جوباعا كەلمەس بۇرىن اقىلعا قونىمسىز كورىنىستەردىڭ بولماۋىن قاداپ ايتقان ەكەن. قارا قۇردىم، وقيعالار كوكجيەگى، سالىستىرمالىق تەورياسى تۋرالى تانىمدى كەڭەيتىپ، قىزىعۋشىلىقتى وياتار تۋىندى.
ءفيلمنىڭ ساۋندترەگى، ومىرگە كەلۋ تاريحى بولەك اڭگىمە. قۇلاققاپتى نىعىزداپ ساۋندترەكتى قوسقاندا اينالاداعى تىرشىلىك وزگەشە ماڭىزعا يە بولا باستايدى. كەيدە بويىڭدى ۇرەي بيلەپ، كەيدە ادامزات تاعدىرىنداعى ەڭ ۇلكەن دراماعا كۋا بولىپ وتىرعانىڭداي سەزىم سىيلايدى.
2. ماتريتسا. اعايىندى ۋوچوۆسكيلەردىڭ تريلوگياسى. 1999 جىلدان باستاپ شىعا باستاعان فيلمدەگى ارنايى ەففەكتىلەر سول زامانداعى تەحنولوگيالاردىڭ وزىق ۇلگىسى بولىپ تابىلادى. بۇرىن سول ەففەكتىلەرى ءۇشىن كورگەن بولساق، وسى كارانتيندە يدەياسى ءۇشىن قايتالاپ كورىپ شىقتىم. ەگەر سالماقتى ديالوگتارى، وتكىر سيۋجەتى، ميعا سالماق تۇسىرەتىن يدەياسى بولماعاندا ءجاي عانا فانتاستيكا بولىپ قالۋشى ما ەدى. سونىسىمەن دا قۇندى. امەريكا كينەماتوگرافيا ونىمدەرىنىڭ التىن قورىنا ەنگەن يگى تۋىندى.
3. ناچالو. بۇل دا رەجيسسەر كريستوفەر نولاننىڭ تۋىندىسى. IMDb-دە 13 ورىندا تۇرۋىنىڭ ءوزى بەكەر ەمەس. ءبىزدىڭ فيلمدەر تاريح تۇگەندەپ بولا الماي جاتقاندا باتىس كينەماتوگرافياسى ادام قيالىنىڭ شەكاراسىن ىزدەپ كەتكەن. ادامنىڭ تۇسىنە ەنۋ ارقىلى ونىڭ ويىنا يدەيا ەگۋ، ءارى اقپارات ۇرلاۋ ودان ارى ۇيقىنىڭ ەكى-ءۇش دەڭگەيىنە دەيىن تەرەڭدەي ءتۇسۋ...
4. پەرۆومۋ يگروكۋ پريگوتوۆيتسيا. مەن ءۇشىن بۇل ءفيلمنىڭ رەجيسسەر، اكتەر سياقتى اتريبۋتتارى ماڭىزدى ەمەس. ءبىر عانا يدەياسى قىزىق. بولاشاقتا ۆيرتۋالدى الەمنىڭ رەالدان قىزىق بولىپ كەتەتىنى سونشا، ادامزاتتىڭ ءبارى ۆيرتۋال الەمدە كوبىرەك بولۋعا ۇمتىلادى. سەبەبى ول جاقتاعى مۇمكىندىگىڭ شەكسىز. وزىڭە قالاعان دەنە، قالاعان ءتۇر، قالاعان كيىم، قالاعان الەمدى جاساپ الاسىڭ. قىزىقتىعى مەن اسەرى جاعىنان ۆيرتۋال الەم رەالدى باسىپ وزادى. مەنىڭشە قازىر شىعىپ جاتقان ۆيرتۋالدى 3d شلەمدەرمەن تاكتيلدى قولعاپتار وسى ءۇردىستىڭ العىشارتتارىن جاساپ جاتىر.
5. لوبستەر. رەجيسسەر، ستسەناريستەرىن بىلمەيمىن. بىراق باستى رولدە كولين فاررەل. مۇنداعى ۋتوپيالىق الەمنىڭ ەڭ باستى ماقساتى ادامدى جۇپسىز قالدىرماۋ. بۇل الەمدەگى ءار ادامنىڭ مىندەتتى تۇردە جۇبى بولۋى كەرەك. ەگەر جۇبىڭ جوق بولسا سەنى 40 كۇنگە ارنايى ورتالىققا جىبەرەدى. 40 كۇن ىشىندە وزىڭە جۇپ تاپپاساڭ جانۋارعا اينالدىرىپ جىبەرەدى دە ءتۇبى اڭشىنىڭ قولىنان قازا تاباسىڭ. جۇپ قۇرۋداعى باستى كريتەري - ەكەۋىنىڭ ءبىر ۇقساستىقتارى بولۋى كەرەك. ماحاببات دەگەن تۇسىنىك جوق. ەگەر جۇبىڭ كوزىلدىرىك تاقسا، سەن دە تاققان بولۋ كەرەكسىن، مۇرنى قاناي بەرەتىن بولسا، سەنىڭ دە مۇرنىڭ قاناي بەرەتىن بولۋى كەرەك. ورتالىق قىزمەتكەرلەرىن الداۋ وڭاي ەمەس. ال ولار ءوز كەزەگىندە تەزىرەك جۇپتى بولۋىڭا ارەكەت ەتەدى. ءتىپتى ماستۋرباتسيا جاساماسىن دەپ قولىن كىسەندەپ تاستايدى.
6. ۆرەميا. دجاستين تيمبەرلەيك دەگەن ءانشى جىگىت باستى رولدە. فيلم يدەياسى سۇمدىق . جىلداپ قاعاز اقشا ۇستاماي جۇرە بەرسەڭىز ءومىرىڭىز وسى فيلمدەگى ومىردەن اۋماي قالادى. شوتىڭىزعا تسيفرلار كەلەدى، تسيفرلار كەتەدى. كىمنىڭ تسيفرى كوپ، سول باي ءارى ۇزاق جاسايدى.
7. شوكيرۋيۋششايا ازيا. ەسكى دەرەكتى فيلم. اتى ايتىپ تۇرعانداي ەۋروپالىقتار ءۇشىن وزگە پلانەتا بولىپ كورىنەتىن ازيالىقتار جايىندا. ونداعى ادام شوشيتىن راسىمدەر، مورالدىق نورمالاردان اسىپ تۇسەتىن ءومىر سالتىن كورسەتكەن.
ابزال دوسىم
