قىتايلىق جاس رەجيسسيور تسزين ي تۇسىرگەن "بوتانيك ءفيلمى" 14 ءساۋىر كۇنى «ۇلتتىق كينوونەرى اليانسى» ارقىلى قىتاي كينوتەاترلارىندا كورسەتىلىمگە جول تارتادى. بۇل تۋرالى قىتايدىڭ ونلاين حالىق گازەتى جازدى, دەپ حابارلايدى "ادىرنا".
فيلم قىتايدىڭ شىڭجاڭ ءوڭىرىنىڭ سولتۇستىگىندەگى شەكارا اۋىلىندا ءومىر سۇرەتىن قازاق بالاسىنىڭ تاعدىرىن ارقاۋ ەتەدى. تۋىندىدا كەيىپكەر تابيعاتتاعى ءاربىر وسىمدىك پەن تىرشىلىك يەسىنىڭ ءوسىپ-ءونۋى مەن جويىلۋى ارقىلى ءومىردىڭ ءمانىن، قوشتاسۋ مەن تامىر تارتۋ ۇعىمدارىن تۇسىنە باستايدى. وسى ارقىلى فيلم ءجاسوسپىرىمنىڭ رۋحاني جەتىلۋ جولىن نازىك ءارى اسەرلى جەتكىزەدى.
رەجيسسيور تسزين ي ءۇشىن بۇل — العاشقى تولىقمەتراجدى جۇمىس. ونىڭ ايتۋىنشا، فيلمدە قازاق حالقىنىڭ جىلقى، بۇركىت جانە وزگە دە جان-جانۋارلارعا قاتىستى كيەلى تۇسىنىكتەرى مەن كونە اڭىزدارى كورىنىس تابادى. سونىمەن قاتار تۋىندى تابيعاتتىڭ ادام سەزىمى مەن دۇنيەتانىمىنا ىقپالىن تەرەڭ اشىپ كورسەتۋگە باعىتتالعان.
«بوتانيك» ءفيلمى حالىقارالىق دەڭگەيدە جوعارى باعالانىپ ۇلگەردى. اتاپ ايتقاندا، بەرلين حالىقارالىق كينوفەستيۆالى اياسىندا «جاڭا بۋىن بالالار» بايقاۋىندا ۇزدىك تولىقمەتراجدى فيلم اتاندى. سونداي-اق كاير حالىقارالىق كينوفەستيۆالى كەزىندە «حالىقارالىق سىنشىلار اپتالىعى» سەكتسياسىندا ارنايى اتالىم الىپ، Netpac سىيلىعىمەن ۇزدىك ازيالىق فيلم رەتىندە تانىلدى.
بۇدان بولەك، سيانگان حالىقارالىق كينوفەستيۆالى اياسىندا رەجيسسيور ۇزدىك رەجيسسيور ماراپاتىن جەڭىپ السا، فيلم حالىقارالىق كينوسىنشىلار فەدەراتسياسىنىڭ جۇلدەسىنە يە بولدى. ال باستى ءرولدى سومداعان ەسىل جاقسىلىقۇلى شىنايى اكتەرلىك ويىنى ءۇشىن بەيجىڭ حالىقارالىق كينوفەستيۆالى «نۇرلى بولاشاق» سەكتسياسىندا ۇزدىك اكتەر اتاندى.
تابيعات پەن ادام بولمىسىنىڭ تەرەڭ بايلانىسىن كوركەم تىلمەن جەتكىزەتىن بۇل تۋىندى كورەرمەنگە ەرەكشە اسەر سىيلاۋى كۇتىلەدى.
