پوليتسيا دەپارتامەنتى: شورناق اۋىلىنداعى جاعداي تۇراقتى

696

تۇركىستان وبلىسى شورناق اۋىلىنداعى جاعداي تۇراقتى. بۇل تۋرالى تۇركىستان وبلىسىنىڭ پوليتسيا دەپارتامەنتى حابارلادى.

 

"الەۋمەتتىك جەلىلەردە ءبىر توپ ازاماتتار پوليتسيا قىزمەتكەرىنىڭ قاتىسۋىمەن وزدەرىنىڭ نارازىلىقتارىن بىلدىرگەن بەينەجازبا تارالعان بولاتىن.

بۇعان دەيىن حابارلانعانداي، تۇركىستان وبلىسى كەنتاۋ قالاسىنا قاراستى شورناق اۋىلىندا پوليتسيا قىزمەتكەرلەرى الدىن الىپ، توقتاتقان تۇرمىستىق جانجال ورىن الدى.

وقيعا ورنىنا ءبىرىنشى بولىپ كەلگەن كەنتاۋ قالالىق پب-ءنىڭ ۋچاسكەلىك پوليتسيا ينسپەكتورى جانجالدى جاعدايدى توقتاتۋ شارالارىن جۇرگىزدى. پوليتسيا قىزمەتكەرى العان جاراقاتىنا جانە ازاماتتاردىڭ بەلسەندى باعىنباۋشىلىعىنا قاراماستان ءوز مىندەتىن اتقارىپ، كۇش پەن اتىس قارۋىن قولدانۋعا جول بەرمەدى. ۋچاسكەلىك پوليتسيا ينسپەكتورى مەن ءۇش اۋىل تۇرعىنى تاستان جاراقات العان. ولارعا مەديتسينالىق كومەك كورسەتىلدى.

كەلەسى كۇنى شورناق اۋىلىندا ارانداتۋشىلار جينالىپ، جاقىن ماڭداعى اۋىل تۇرعىندارىن زاڭعا قايشى ارەكەتتەر جاساۋعا شاقىرعان. اتالعان جايت پوليتسيا قىزمەتكەرلەرىمەن بىردەن توقتاتىلدى. اۋىل تۇرعىندارىمەن وبلىستىڭ قوعامدىق جانە اكىمدىك وكىلدەرى كەزدەستى.
جۇرگىزىلگەن ىزدەستىرۋ ءىس-شارالارى بارىسىندا كريمينالدىق پوليتسيا قىزمەتكەرلەرى 4 ازاماتتى انىقتاپ، ۇستادى. ونىڭ 2-ەۋى سوتتىڭ شەشىمىمەن قاماۋعا الىندى. قازىرگى ۋاقىتتا ورىن العان وقيعانىڭ تولىق ءمان-جايى انىقتالۋدا. بۇزاقىلىق فاكتىسى بويىنشا سوتقا دەيىنگى تەرگەۋ امالدارى جۇرگىزىلۋدە، - دەلىنگەن حابارلامادا.

"ادىرنا" ۇلتتىق پورتالى

پىكىرلەر
رەداكتسيا تاڭداۋى