800 مىڭ قازاقستاندىق كەدەي ساناتىنا وتەدى

1306

كوروناۆيرۋس پاندەمياسى كەزىندە قازاقستاننىڭ ىسكەرلىك بەلسەندىلىگى الدەقايدا تەجەلدى. بۇل تۋرالى Centralasia.org حابارلادى.

رەسپۋبليكا ەكونوميكاسى 1990-جىلداردىڭ سوڭىنان بەرى العاش رەت ءۇش پايىز قىسقارادى، دەپ ەسەپتەيدى دۇنيەجۇزىلىك بانك ماماندارى. حالىقارالىق ينستيتۋتتىڭ 22 شىلدەدە جاريالاعان بايانداماسىندا قازاقستان ەكونوميكاسى 2021 جىلى 2,5 پايىز وسەدى دەپ بولجاندى.

دۇنيەجۇزىلىك بانك ماماندارىنىڭ پىكىرىنشە، داعدارىستان ەلدە كەدەيلەر كوبەيىپ، الەۋمەتتىك تەڭسىزدىك اراسى الشاقتاي تۇسەدى. الدىن الا بولجام بويىنشا، 2020 جىلى كەدەيشىلىك 12,7 پايىزعا ارتادى. بانك ماماندارىنىڭ ەسەپتەۋىنە قاراعاندا، بيىل 800 مىڭ ادام كەدەيلەر ساناتىنا تۇسەدى.

بايانداما اۆتورلارىنىڭ بولجامىنا سايكەس، كوروناۆيرۋس پاندەمياسى جانە ونى تەجەۋ ارەكەتتەرى سالدارىنان قازاقستاننىڭ ەڭبەك نارىعى زارداپ شەگەدى، اسىرەسە بۇل داعدارىس بىلىكتىلىگى تومەن جۇمىسشىلارعا اۋىر تيەدى.

بيىل العاشقى توقساندا قازاقستاننىڭ ىشكى جالپى ءونىمى 2,3 پايىز ءوسىم كورسەتكەنىمەن، ودان سوڭ كوروناۆيرۋس ەلگە تاراعان ۋاقىتتا احۋال قيىنداي ءتۇستى.

"بيلىك COVID-19 پاندەمياسىن تەجەۋگە ارنالعان شارالار قابىلدادى، ال بيۋدجەتتەگى قور ەپيدەمياسىنىڭ ەكونوميكاعا اسەرىن جۇمسارتۋعا مۇمكىندىك بەردى. دەگەنمەن مۇنايعا سۇرانىستىڭ تومەندىگى جانە باعانىڭ ارزانداۋى، سونىمەن بىرگە پاندەميانىڭ ۇزاققا سوزىلۋى ەكونوميكا بولاشاعىن بۇلىڭعىرلاتا ءتۇستى. سوعان قاراعاندا، بيلىكتىڭ قورداعى قاراجاتىن كەدەيلەر مەن از قامتىلعان وتباسىلارعا قوسىمشا كومەك رەتىندە بەرىپ، ەكونوميكانى قالپىنا كەلتىرۋگە كومەكتەسەتىن رەفورمانى تەزدەتكەنى دۇرىس بولادى", - دەدى دۇنيەجۇزىلىك بانكتىڭ قازاقستانداعى كەڭسەسىندەگى اعا ەكونوميست سامسۋ راحاردجا.

بانك بايانداماسىندا پاندەميا قازاقستاندا ادام كاپيتالىنىڭ دامۋىنا كەرى اسەر ەتەتىنى ايتىلعان.

قازاقستاندا كوروناۆيرۋستى ءبىرىنشى بولىپ جۇقتىرعان ناۋقاس بيىل ناۋرىزدىڭ ورتاسىندا تىركەلدى. دەنساۋلىق ساقتاۋ مينيسترلىگىنىڭ مالىمەتى بويىنشا، قازىر 75 مىڭنان استام ادامنىڭ ۆيرۋس جۇقتىرعانى انىقتالعان. ۇكىمەت 1 ساۋىردەن باستاپ كوروناۆيرۋس ستاتيستيكاسىنا پنەۆمونيامەن اۋىرعان ناۋقاستاردى قوسۋعا ۋادە بەردى.

 

پىكىرلەر
رەداكتسيا تاڭداۋى