800 myń qazaqstandyq kedeı sanatyna ótedi

1224

Koronavırýs pandemııasy kezinde Qazaqstannyń iskerlik belsendiligi áldeqaıda tejeldi. Bul týraly Centralasia.org habarlady.

Respýblıka ekonomıkasy 1990-jyldardyń sońynan beri alǵash ret úsh paıyz qysqarady, dep esepteıdi Dúnıejúzilik bank mamandary. Halyqaralyq ınstıtýttyń 22 shildede jarııalaǵan baıandamasynda Qazaqstan ekonomıkasy 2021 jyly 2,5 paıyz ósedi dep boljandy.

Dúnıejúzilik bank mamandarynyń pikirinshe, daǵdarystan elde kedeıler kóbeıip, áleýmettik teńsizdik arasy alshaqtaı túsedi. Aldyn ala boljam boıynsha, 2020 jyly kedeıshilik 12,7 paıyzǵa artady. Bank mamandarynyń esepteýine qaraǵanda, bıyl 800 myń adam kedeıler sanatyna túsedi.

Baıandama avtorlarynyń boljamyna sáıkes, koronavırýs pandemııasy jáne ony tejeý áreketteri saldarynan Qazaqstannyń eńbek naryǵy zardap shegedi, ásirese bul daǵdarys biliktiligi tómen jumysshylarǵa aýyr tıedi.

Bıyl alǵashqy toqsanda Qazaqstannyń ishki jalpy ónimi 2,3 paıyz ósim kórsetkenimen, odan soń koronavırýs elge taraǵan ýaqytta ahýal qıyndaı tústi.

"Bılik COVID-19 pandemııasyn tejeýge arnalǵan sharalar qabyldady, al bıýdjettegi qor epıdemııasynyń ekonomıkaǵa áserin jumsartýǵa múmkindik berdi. Degenmen munaıǵa suranystyń tómendigi jáne baǵanyń arzandaýy, sonymen birge pandemııanyń uzaqqa sozylýy ekonomıka bolashaǵyn bulyńǵyrlata tústi. Soǵan qaraǵanda, bıliktiń qordaǵy qarajatyn kedeıler men az qamtylǵan otbasylarǵa qosymsha kómek retinde berip, ekonomıkany qalpyna keltirýge kómektesetin reformany tezdetkeni durys bolady", - dedi Dúnıejúzilik banktiń Qazaqstandaǵy keńsesindegi aǵa ekonomıst Samsý Rahardja.

Bank baıandamasynda pandemııa Qazaqstanda adam kapıtalynyń damýyna keri áser etetini aıtylǵan.

Qazaqstanda koronavırýsty birinshi bolyp juqtyrǵan naýqas bıyl naýryzdyń ortasynda tirkeldi. Densaýlyq saqtaý mınıstrliginiń málimeti boıynsha, qazir 75 myńnan astam adamnyń vırýs juqtyrǵany anyqtalǵan. Úkimet 1 sáýirden bastap koronavırýs statıstıkasyna pnevmonııamen aýyrǵan naýqastardy qosýǵa ýáde berdi.

 

Pikirler
Redakııa tańdaýy