«TikTok» جەلىسىندە قۇمار ويىن ۇيىمداستىرعان الماتى قالاسىنىڭ 2 تۇرعىنى 4 ايدا 13 ملن تەڭگەگە جۋىق تابىس تاپقان. قر قارجىلىق مونيتورينگ اگەنتتىگى «TikTok» جەلىسىندە مۇنداي قۇمار ويىندار ۇيىمداستىرىپ، "قارجىنى قارشا كۇرەگەن" 100-دەن استام اككاۋنتتى انىقتادى. مۇنداي ارەكەتتەردىڭ زاڭعا قايشى ەكەندىگىن مالىمدەپ، قولدانۋشىلارعا ەسكەرتۋ جاسادى، دەپ حابارلايدى "ادىرنا" ۇلتتىق پورتالى قر قارجىلىق مونيتورينگ اگەنتتىگىنىڭ ءباسپاسوز قىزمەتىنە سىلتەمە جاساپ.
ءباسپاسوز قىزمەتىنىڭ حابارلاۋىنشا، نەگىزىنەن «TikTok» جەلىسىندە كەڭ ەتەك العان مۇنداي ويىندارعا كارتا ويىنى، سۇيەك لاقتىرۋ جانە ونلاين رۋلەتكا كىرەدى. ويىنداردىڭ تالاپتارى بارلىعىندا بىردەي. ولار قولدانۋشىلاردى ءباس تىگۋگە شاقىرادى. ونىڭ تورتتەن ءبىرى ۇيىمداستىرۋشىدا قالادى، قالعانىن جەڭىمپاز الادى. ءباس تىگۋلەردى قابىلداۋ جانە ۇتىستاردى بەرۋ بانكتىك ونلاين اۋدارىمدار ارقىلى جۇزەگە اسىرىلادى.
«جەلىلىك تالداۋ ناتيجەسىندە ءبىز ونلاين ويىندى تاراتاتىن 100-دەن استام اككاۋنت انىقتادىق. وسى جەردە ۇيىمداستىرۋشىلار مەن قاتىسۋشىلارعا بۇل ارەكەتتىڭ زاڭسىز ەكەنىن ەسكەرتەمىز. قر قىلمىستىق كودەكسىنىڭ 307-بابىندا زاڭسىز ويىن بيزنەسىن ۇيىمداستىرعانى ءۇشىن جاۋاپكەرشىلىك قاراستىرىلعان. قازىردىڭ وزىندە سوتتالعاندار بار، - دەدى وكىلدىك.
ماسەلەن، «TikTok» جەلىسىندە قۇمار ويىن ۇيىمداستىرعان الماتى قالاسىنىڭ 2 تۇرعىنى 4 ايدا 13 ملن تەڭگەگە جۋىق تابىس تاپقان. تەرگەۋ قورىتىندىسى بويىنشا ولاردىڭ 1,5 جىلعا باس بوستاندىعى شەكتەلدى.
سونىمەن قاتار، قازىرگى ۋاقىتتا سوت «TikTok» جەلىسىندە ۇقساس مازمۇنداعى كونتەنت ءۇشىن 4 ۇيىمداستىرۋشىعا قاتىستى ءىس قارالىپ جاتىر.
قۇرمەتتى ازاماتتار، وسىنداي قۇمار ويىندارعا ارالاسپاۋلارىڭىزدى سۇرايمىز. بۇل زاڭعا قايشى. سونداي-اق، اتا-انالاردان بالاڭىزدىڭ مىنەز-قۇلقىنا، ونىڭ كورەتىن كونتەنتىنە جانە ونىڭ ونلاين ساۋداسىنا نازار اۋدارۋىن سۇرايمىز»،-دەلىنگەن قر قارجىلىق مونيتورينگ اگەنتتىگى حابارلاماسىندا.
"ادىرنا" ۇلتتىق پورتالى
