بۇگىن الەۋمەتتىك جەلىدە ءماجىلىس دەپۋتاتى ازات پەرۋاشەۆتىڭ «سق-فارماتسيا» مەن ءمامس قورىنا قاتىستى، ولاردىڭ شەتەلدەردەن مەديتسينالىق جابدىقتاردى ءوز باعاسىنان الدەنەشە ەسە قىمباتقا ساتىپ العانى تۋرالى ايتقان بەينەجازباسى جاريا بولدى.
ءبىز پارتيانىڭ ءباسپاسوز قىزمەتىنە حابارلاسىپ، اتالعان بەينەجازباعا قاتىستى اقپارات سۇرادىق. سويتسەك، بۇگىن الەۋمەتتىك جەلىدە قر سىبايلاس جەمقورلىققا قارسى كۇرەس اگەنتتىگى وكىلى مەن دەپۋتات پەرۋاشەۆتىڭ بىرلەسكەن تىكەلەي ەفيرى بولعان ەكەن. الگى 5 مينۋتقا جۋىق ۆيدەو سول ەفيردىڭ ءۇزىندىسى كورىنەدى، – دەپ حابارلايدى abai.kz.
وندا «اق جول» پارتياسىنىڭ توراعاسى ازات تۇرلىبەكۇلى «سق-فارماتسيا» مەن ءمامس قورى جۇمىسىنداعى ءبىراز بىلىقتى اشەكەرەلەپ سويلەپتى. مىنە، قاراڭىز:
ازات پەرۋاشەۆ:
– 2012 جىلدىڭ 12 مامىرىندا «اق جول» فراكتسياسى دەنساۋلىق ساقتاۋ جۇيەسى مەن ونىڭ قۇرامىنداعى ۆەدومستۆونىڭ «دەنساۋلىق كودەكسىندەگى» ساتىپ الۋ جۇيەسىنە ەنگىزگەن وزگەرىستەرىنە قارسى نارازىلىق جولداعان ەدى. ءبىز مارشال ارالدارىنان مەديكومەنتتەر مەن جابدىقتاردى قازاقستانداعى جابدىقتار قۇنىنان 4 ەسەگە قىمباتقا ساتىپ العاندار جونىندە فاكتىلەر كەلتىردىك.
بۇل ماسەلەنى ءبىز 2013 جىلدىڭ 6 اقپانىندا قايتا كوتەردىك. ال 2013 جىلدىڭ 6 قاڭتارى كۇنى «اق جول» فراكتسياسى «سق-فارماتسيانىڭ» پرەپاراتتاردى ءوندىرۋشى باعاسىنان، ءوندىرۋشىنىڭ رەسمي سايتىندا كورسەتىلگەن باعادان 3 ەسە قىمباتقا ساتىپ العانى جونىندە باس پروكۋرورعا ساۋال جولدادىق. بۇل – ءدال وسى پرەپاراتتى وندىرۋشىلەر، ءدال وسى پرەپاراتتى باسقا ەلدەرگە ساتقان باعادان 5 ەسەگە قىمبات سوما!
2013 جىلدىڭ 25 اقپانى. ۇكىمەت پەن باس پروكۋراتۋراعا وتاندىق فارماتسەۆتيكالىق كومپانيالارعا «سق-فارماتسيانىڭ» كەدەرگى كەلتىرىپ وتىرعانىن ايتىپ، ساۋال جولدادىق. بۇل كومپانيالار قازاقستان نارىعىنا كىرگەن، كاسىپتەرىن جولعا قويعان كومپانيالار ەدى. ول جەردە ۇزىن-سونار سوت پروتسەسستەرى بولدى. سونىڭ ناتيجەسىندە سوت جەرگىلىكتى ءدارى-دارمەك ءوندىرىسىنىڭ ينۆەستورلارىنا كەدىرگى كەلتىرىپ وتىرعانى جونىندە مەملەكەتتىك ورگاندارعا رەسمي تۇسىنىكتەمە بەرگەن.
وسى كەدەرگىلەردىڭ كەسىرىنەن قازاقستان نارىعىنداعى وتاندىق ءدارى-دارمەك ءوندىرىسىنىڭ ۇلەسى 30 پايىزعا كەمىگەن. «نەگە ءبىز قاراپايىم پاراتسەتامولدىڭ ءوزىن شەتەلدەن يمپورتتاپ وتىرمىز»، – دەگەندى بۇگىن جەلىلەردەن وقىپ وتىرمىز.. مىنە، وسىنىڭ بارلىعىنا جاڭاعى جاعدايلار سەبەپ. وسىنىڭ بارلىعىنا «سق-فاماتسيانىڭ» وتاندىق وندىرۋشىلەردى شەتەلدىك كومپانيالار الدىندا جىعىپ بەرگەنى سەبەپ.
جارايدى، بۇلار 2012-2013 جىلدارداعى ماسەلەلەر دەيىك. مىنە، جاقىندا عانا بولعان جايت. 16 شىلدە كۇنى كاسىپكەر قۋانىش كەرىمقۇلوۆ جازدى. قۋانىش قازاقستانداعى العاشقى جەكە كلينيكا اشقان ادام. مەدساقتاندىرۋ قورى پارا الىپ، ستاتسيونارلىق قىزمەت كورسەتۋگە رۇقسات بەرەتىن كەلىسىمدەر جاساعانى تۋرالى الەۋمەتتىك جەلىدەگى جەكە پاراقشاسىندا جازدى. ونىڭ جازۋىنشا، مەدساقتاندىرۋ قورى 100 جانە ودان دا كوپ توسەگى بار ءاربىر ستاتسيوناردا ءوجج (يۆل) اپپاراتتارىن قوسقاندا تولىق جابدىقتالعان 15 رەانيماتسيالىق توسەك بولۋى كەرەك دەگەن ستاندارتتاردى دا ەلەمەگەن. دەمەك، 100 جانە ودان دا كوپ توسەگى بار ءاربىر ستاتسيوناردا كەم دەگەندە 15 ءوجج (يۆل) اپپاراتتارى بولۋى كەرەك ەدى. ال مىناۋ ىندەت كەلگەن كەزدە سول ءوجج (يۆل) اپپاراتتارى بولماي شىقتى عوي. دەمەك، قانشاما ادامنىڭ ءولىمى پارا ءۇشىن وسىنداي كەلىسىمدەر جاساعان وسى قوردىڭ موينىندا دەگەن ءسوز! مەن وسى جازبا جاريالانعان كۇنى-اق، اتالعان فاكتى بويىنشا سىبايلاس جەمقورلىققا قارسى كۇرەس اگەنتتىگىنە جۇگىنۋ ءۇشىن، دەنساۋلىق ساقتاۋ مينيسترلىگىنە ساۋال جولداپ، اتالعان ستاندارتتاردىڭ بار-جوعىن سۇرادىم. ەگەر بىزگە جاقىن ارادا، 10 كۇننىڭ ىشىندە جاۋاپ بەرمەيتىن بولسا، ءبىز ءوزىمىز سىبايلاس جەمقورلىق اگەنتتىگىنە جۇگىنەتىن بولامىز.
مىنە، تاعى ءبىر مىسال. «كاپيتال پليۋس» جشس. بۇل – قازاقستاندا ءوجج (يۆل) اپپاراتتارىن شىعارۋمەن اينالىساتىن كومپانيا. ولاردىڭ ۇسىنىپ وتىرعان باعاسى – 13 ميلليون تەڭگە. ءتىپتى، بىزدىكىلەر حالىقارالىق تەحنيكالىق تالاپتارعا ساي شىعارىلسا دا، ءبىزدىڭ دەنساۋلىق ساقتاۋ مينيسترلىگى ولاردى سوڭعى ۋاقىتقا دەيىن ەلەمەي، ءدال سونداي اپپاراتتاردى شەتەلدەن 30 ميلليونعا ساتىپ الىپ كەلدى. ياعني، بۇل اقشاعا قازىرگىدەن گورى 2,5-3 ەسەگە ارتىق ءوجج (يۆل) اپپاراتتارىن الۋعا بولاتىن ەدى. مۇنداي مىسالدار وتە كوپ. جانە ءبىز وسىلاردىڭ ارقايسىسىنا ءوز ۋاقىتىندا رەاكتسيا ءبىلدىرىپ كەلدىك. ءارى قاراي دا سولاي بولا بەرمەك…
