نۇر-سۇلتان، BAQ.KZ. بۇگىنگى تاڭدا ەلىمىز كوروناۆيرۋس ىندەتىمەن كۇرەس جۇرگىزۋدە. بۇل ماسەلەنى شەشۋ ماقساتىندا قوسىمشا حالىققا مەديتسينالىق قىزمەت كورسەتۋ ورتالىقتارى اشىلۋدا. وندا ءبىلىم بەرۋ مەكەمەلەرىندە قىزمەت ەتەتىن مەديتسينا قىزمەتكەرلەرى ەڭبەك ەتۋدە.
جامبىل وبلىسى اكىمدىگى ءبىلىم باسقارماسى باسشىسىنىڭ ورىنباسارى تالعات جامالوۆ مەديتسينالىق پۋنكتتەردەگى مەكتەپ مەيىربيكەلەرى ەرىكتى تۇردە جۇمىس ىستەپ جاتقانىن ايتتى. ولار دارىگەردىڭ تەكسەرىسىنەن سوڭ ناۋقاستاردى قابىلداۋدا.
تاراز قالالىق مۇحتار اۋەزوۆ اتىنداعى №33 ورتا مەكتەپتە مەديتسينالىق پۋنكت 20 شىلدەدەن باستاپ جۇمىس ىستەۋدە.
ءبىزدىڭ باستى ماقساتىمىز - ەمحانالاردىڭ جۇمىسىن از دا بولسا جەڭىلدەتۋ. ەكى كۇن ىشىندە بىزگە 11 ادام كەلدى. ولار نەگىزىنەن ورتا جاستاعى ازامتتار. ايتاتىن شاعىمدارى بارلىق تۇرعىندا وزەكتى بولىپ وتىرعان اۋرۋ بەلگىلەرى - باس اۋرۋى، السىزدىك پەن جايسىزدىق. بىزگە قاتارداعى جاعدايلار بايقالاتىن ناۋقاستاردى جولدايدى. ويتكەنى، مەكتەپتەگى مەديتسينالىق پۋنكتتەر كۇردەلى پروتسەدۋرالارعا وراي جابدىقتالماعان، - دەيدى مەكتەپ مەيىربيكەسى ورىنكۇل قويشىعۇلوۆا.
"بۋرىل" القابىنىڭ تۇرعىندارى مەكتەپتەگى مەديتسينالىق پۋنكتەردىڭ جابدىقتالۋىنىڭ جوعارى ونىمدىلىگىن ايتىپ وتىر.
ءبىز ءوز اۋدانىمىزدا وقشاۋلانا ءومىر سۇرۋدەمىز. ەمحانا الىس بولعاندىقتان وندا ەم-دوم الۋ ءۇشىن بارۋ ىڭعايسىز. سول سەبەپتى دارىگەردىڭ بەلگىلەۋىن العان سوڭ بۇلشىقەتكە ەكپە جاساي الاتىن نەمەسە تامشىلار قويا الاتىن كورشىلەردى ىزدەيمىز. ال اۋداننىڭ تاپ ورتاسىندا ورنالاسقان مەكتەپ اركىم ءۇشىن كومەك الۋعا بولاتىن ىڭعايلى جەر. وندا قان قىسىمىن ولشەتىپ، ەكپە سالدىرۋعا، جازىلۋ پروتسەسىن باقىلاۋدا ۇستاۋعا بولادى، - دەيدى جەرگىلىكتى تۇرعىن ەركەبۇلان جانتىلەسوۆ.
وسى اۋداندا ورنالاسقان №54 مەكتەپتىڭ مەديتسينالىق قىزمەتكەرلەرى ءايبيبى دۇيسەنباەۆا مەن ايىم ءۇبايدان جۇمىسقا قۋانا-قۋانا شىققاندارىن ايتتى.
ءبىز بالالارمەن جانە ولاردىڭ اتا-انالارىمەن تىعىز بايلانىس ۇستايمىز. سوندىقتان جەرگىلىكتى تۇرعىنداردىڭ ءبىرشاماسىن جاقسى تانيمىز. مۇنداي جاعدايدا ولارعا كومەك كورسەتپەۋ ساتقىندىقپەن پارا-پار بولار ەدى. ءبىزدىڭ مەديتسينالىق پۋنكت وتكەن اپتادا اشىلعان. وسى ۋاقىت ارالىعىندا بىزگە 19 ادام جۇگىندى. مەكتەپتە قاجەتتى پروتسەدۋرالاردى جۇرگىزۋگە بار جاعداي جاسالعان. ەڭبەگىمىز ەلگە پايدالى بولادى دەپ ۇمىتتەنەمىز، - دەيدى مەيىربيكە ءايبيبى دۇيسەنباەۆا.
قالانىڭ شەتىندەگى اۋداندار ءۇشىن ناۋقاستاردىڭ مەكتەپتەردەگى مەديتسينالىق پۋنكتتەردە قابىلدانۋى ەكىنشى تىنىس اشىلعانداي اسەر ەتتى.
ءبىز جۇمىسقا ءبىرىنشى وتىنىشتەن سوڭ-اق شىقتىق. كوروناۆيرۋسپەن كۇرەس كەزىندە سوعىس كەزىندەگىدەي ءار جاۋىنگەردىڭ ماڭىزى زور. ونىڭ ۇستىنە ءبىزدىڭ اۋدانعا مەديتسينالىق كومەكتىڭ جەتۋى قيىندىق تۋدىرادى. ءبىزدىڭ مەكتەپ "كىرپىش زاۋىتى" اۋدانىندا ورنالاسقان. مۇندا بارىسحان القابى مەن اقبۇلىم اۋىلىنان دا ادامدار كەلىپ تۇرادى. كەيدە تامشى قويۋ قيىن بولىپ جاتادى. ويتكەنى، اۋىلدىق جەردە مەديتسينالىق ءبىلىمى بار ادامدى تابۋ قيىن. سوندىقتان ارىپتەسىم ەكەۋمىز تابان اۋدارماي جۇمىس ىستەپ جاتىرمىز. ەكى اپتا ىشىندە بىزگە كومەك الۋ ءۇشىن 47 ادام كەلدى. ونىڭ 11-ءىن بۇگىن قابىلدادىق، - دەيدى №60 ورتا مەكتەپتىڭ مەيىربيكەسى ساۋلە بەينەۋوۆا.
ەكىنشى مەيىربيكە بايان قالماعانبەتوۆا دا جۇمىسىنىڭ جاڭا قىرىن زور ىنتامەن قابىلداپ، پۋنكت كىرەبەرىسىندە ناۋقاستاردى قارسى الىپ، تەمپەراتۋراسىن ولشەپ، جەكە قورعانىس قۇرالدارىنىڭ بار-جوعىن تەكسەرۋدە.
مەن مەديتسينا سالاسىنا ادامدارعا كومەك بەرۋ ماقساتىندا كەلدىم. قازىر مەنىڭ كومەگىم بارىنشا پايدالى بولاتىن شاق كەلدى. ناۋقاستاردى ۇنەمى كوتەرىڭكى كوڭىلمەن، كۇلىمدەپ قارسى الامىن. ويتكەنى، بۇل كەزدە ولارعا بارىنشا جاعىمدى ەموتسيالار كەرەك. جۋىردا بىزگە 92 جاستاعى ءبرونحيتى بار قاريا كەلدى. ءبىز اقساقالدى ەمدەپ، اۋرۋىنان ايىقتىرىپ جىبەردىك. ول كىسىنى كورگەن سايىن العىسىن الىپ، كۇنى بويىنا كوڭىلىم كوتەرىلىپ جۇرەدى، - دەيدى ول.
ءاربىر ناۋقاستىڭ قازاقستاندىق ازاماتتاردىڭ ءومىرى ءۇشىن كۇرەسكە ءوز ۇلەستەرىن قوسىپ جۇرگەن مەيىربيكەلەرگە العىستارى شەكسىز.
جامبىل وبلىسى اكىمدىگى ءبىلىم باسقارماسى باسشىسىنىڭ ورىنباسارى تالعات جامالوۆتىڭ ايتۋى بويىنشا، مەكتەپتەردەگى مەديتسينالىق پۋنكتتەر ناۋقاستاردى وقۋ جىلى باستالعانعا دەيىن قابىلدايدى.
BAQ.KZ
