قر ەڭبەك جانە حالىقتى الەۋمەتتىك قورعاۋ مينيسترلىگى ۇستىمىزدەگى جىلدىڭ شىلدە ايىنا ازىق-تۇلىك پەن تۇرمىستىق زاتتار ورىنىنا قاراجات قاراستىرىلعانىن مالىمدەدى.
قازاقستاندىقتار 20-شىلدەدەن باستاپ ايدىڭ اياعىنا دەيىن 5 300 تەڭگەدەن اقشا الادى. بۇل كومەك 5-ءشى الەۋمەتتىك توپقا جاتاتىن ازاماتتارعا بەرىلەدى.
جەرگىلىكتى اتقارۋشى ورگاندار مالىمەتتەرگە سۇيەنە وتىرىپ كومەككە مۇقتاج ازاماتتار ءتىزىمىن جاسايدى. سودان سوڭ ولاردىڭ بانك كارتاسىنا 2اەك كولەمىندەگى قاراجات جىبەرىلەدى.
5-ءشى الەۋمەتتىك توپقا كەلەسى ساناتتاعى ازاماتتار كىرەدى:
- اتاۋلى الەۋمەتتىك كومەك الاتىن وتباسىلار;
- 16 جاسقا دەيىنگى مۇمكىندىگى شەكتەۋلى بالالار;
- ءى، ءىى، ءىىى توپتاعى مۇمكىندىگى شەكتەۋلى ازاماتتار;
- مۇمكىندىگى شەكتەۋلى بالالاردى تاربيەلەپ وتقان اتا-انالار;
- جەرگىلىكتى جۇمىسپەن قامتۋ ورتالىعىندا تىركەلگەن جۇمىسسىز ازاماتتار.
ادامدارمەن قارىم-قاتىناستى ازايتۋ ماقساتىندا ازىق-تۇلىك جانە تۇرمىستىق زاتتار جيىنتىعىن قاراجات رەتىندە تاعايىنداۋ تۋرالى شەشىم قابىلدانعان. ناۋرىز ايىنان مامىر ايىنا دەيىن 1 ميلليون ادامعا 13,5 ميلليارد تەڭگە قاراجات جىبەرىلدى.
ەسكە سالا كەتەيىك، 14-شىلدە كۇنى ۇكىمەت وتىرىسىندا قر پرەمەر-ءمينيسترى اسقار مامين قر ەڭبەك جانە حالىقتى الەۋمەتتىك قورعاۋ مينيسترلىگىنە ازىق-تۇلىك جانە تۇرمىستىق زاتتار جيىنتىعىنىڭ ورىنىنا قارجىلاي كومەك بەرۋدى تاپسىرعان.
BAİRAQ.KZ
