پنەۆمونيامەن كۇرەستە ەكمو اپپاراتى قولدانىلۋدا

2182
Adyrna.kz Telegram

شىمكەنت قالاسىنداعى كارديولوگيالىق ورتالىقتا پنەۆمونياعا شالدىعىپ، دەنساۋلىعى كۇرت تومەندەگەن ناۋقاستاردى ەكستراكورپورالدى مەمبرانالى وكسيگەناتسيالىق (ەكمو) اپپاراتىنا قوسىپ ەمدەپ وتىر. ماماندار بۇل قۇرىلعىنى يۆل اپپاراتىنا قوسىمشا كومەك رەتىندە ناۋقاستارعا قوسىپ جاتىر ەكەن.

«ەكمو اپپاراتى – وكپە قابىنىپ جۇمىسى قاتتى ناشارلاعان كەزدە قاندى وتتەگىمەن قامتاماسىز ەتەدى. ياعني، ادامنىڭ كۇرە تامىرلارىنان ارنايى تۇتىكشەلەر ارقىلى اپپاراتقا قوسىپ، ەكمو-عا قۇيىلعان قانعا قاجەتتى دەڭگەيدە وتتەگى بەرىلەدى. سوسىن قايتا ادام اعزاسىنا جىبەرىلەدى. وسىنىڭ ارقاسىندا قان اينالىمى جاقسارادى. اتالعان قۇرىلعى ناۋقاسقا دەر كەزىندە كومەك كورسەتۋگە مۇمكىندىك بەرەدى»، - دەيدى شىمكەنت قالالىق كارديولوگيالىق ورتالىقتىڭ ديرەكتورى ەرماعانبەت قۋاتباەۆ.

قالالىق كارديولوگيالىق ورتالىق جانىنان اشىلعان ەكمو ورتالىعىنا شاھاردىڭ وزگە اۋرۋحانالارىنان دەنساۋلىعى كۇرت ناشارلاعان ناۋقاستار جەتكىزىلەدى. ولار دا وسى تاسىلمەن ەمدەلۋدە ەكەن. كۇنى بۇگىنگە دەيىن بۇل اپپاراتقا 5 ناۋقاس قوسىلىپتى. ونىڭ ءبىرىنىڭ دەنساۋلىعى جاقسارعان. دارىگەرلەر ەندى ءبىر جەتىدە ۇيىنە قايتارۋدى جوسپارلاپ وتىر.

پنەۆمونيانىڭ ەل اراسىندا كەڭىنەن تارالۋىنا وراي ەكمو ورورتالىعىندا 35 توسەك-ورىن دايىندالعان. قازىر وندا ناۋقاستار ەم الىپ جاتىر.
بۇگىندە ەكمو ەلىمىزدىڭ وڭىرلەرىندە جەتەرلىك. الايدا، تەك نۇر-سۇلتان قالاسىنداعى ۇلتتىق عىلىمي كارديو-حيرۋرگيالىق ورتالىق پەن شىمكەنتتەگى كارديولوگيالىق ورتالىقتا پنەۆمونيا جانە كورونوۆيرۋسپەن كۇرەسكە قولدانىلىپ جاتىر ەكەن. شىمكەنتتىك كارديولوگتار وزگە وبلىستارداعى ارىپتەستەرىنىڭ دە ەكمو اپپاراتىن وسى ءبىر ىندەتكە قارسى كۇرەستە قولدانۋىن قالايدى.

بىراق ەكمو-نى ادام اعزاسىنا قوسۋ ءۇشىن كارديوحيرۋرگ، انەستەزيولوگ-رەانيماتولوگ، پەرفۋزيولوگ سىندى ماماندار كومانداسى قاجەت. دەسە دە، جۇمىستىڭ 80 پايىز اۋىرتپاشىلىعى مەدبيكەلەردىڭ موينىندا بولاتىن كورىنەدى.
ايتا كەتەيىك، جۇيەلى جۇمىستىڭ ارقاسىندا كۇنى بۇگىنگە دەيىن قالالىق كارديولوگيالىق ورتالىقتىڭ بىردە-ءبىر قىزمەتكەرى جامان ىندەتتى جۇقتىرماعان.

شىمكەنت 

پىكىرلەر