Shymkent qalasyndaǵy kardıologııalyq ortalyqta pnevmonııaǵa shaldyǵyp, densaýlyǵy kúrt tómendegen naýqastardy ekstrakorporaldi membranaly oksıgenaııalyq (EKMO) apparatyna qosyp emdep otyr. Mamandar bul qurylǵyny IVL apparatyna qosymsha kómek retinde naýqastarǵa qosyp jatyr eken.
«EKMO apparaty – ókpe qabynyp jumysy qatty nasharlaǵan kezde qandy ottegimen qamtamasyz etedi. Iaǵnı, adamnyń kúre tamyrlarynan arnaıy tútiksheler arqyly apparatqa qosyp, EKMO-ǵa quıylǵan qanǵa qajetti deńgeıde ottegi beriledi. Sosyn qaıta adam aǵzasyna jiberiledi. Osynyń arqasynda qan aınalymy jaqsarady. Atalǵan qurylǵy naýqasqa der kezinde kómek kórsetýge múmkindik beredi», - deıdi Shymkent qalalyq kardıologııalyq ortalyqtyń dırektory Ermaǵanbet Qýatbaev.
Qalalyq kardıologııalyq ortalyq janynan ashylǵan EKMO ortalyǵyna shahardyń ózge aýrýhanalarynan densaýlyǵy kúrt nasharlaǵan naýqastar jetkiziledi. Olar da osy tásilmen emdelýde eken. Kúni búginge deıin bul apparatqa 5 naýqas qosylypty. Onyń biriniń densaýlyǵy jaqsarǵan. Dárigerler endi bir jetide úıine qaıtarýdy josparlap otyr.
Pnevmonııanyń el arasynda keńinen taralýyna oraı EKMO orortalyǵynda 35 tósek-oryn daıyndalǵan. Qazir onda naýqastar em alyp jatyr.
Búginde EKMO elimizdiń óńirlerinde jeterlik. Alaıda, tek Nur-sultan qalasyndaǵy Ulttyq ǵylymı kardıo-hırýrgııalyq ortalyq pen Shymkenttegi kardıologııalyq ortalyqta pnevmonııa jáne koronovırýspen kúreske qoldanylyp jatyr eken. Shymkenttik kardıologtar ózge oblystardaǵy áriptesteriniń de EKMO apparatyn osy bir indetke qarsy kúreste qoldanýyn qalaıdy.
Biraq EKMO-ny adam aǵzasyna qosý úshin kardıohırýrg, anestezıolog-reanımatolog, perfýzıolog syndy mamandar komandasy qajet. Dese de, jumystyń 80 paıyz aýyrtpashylyǵy medbıkelerdiń moınynda bolatyn kórinedi.
Aıta keteıik, júıeli jumystyń arqasynda kúni búginge deıin qalalyq kardıologııalyq ortalyqtyń birde-bir qyzmetkeri jaman indetti juqtyrmaǵan.
Shymkent
